Be ka se isịnede

Be ka se isịnede

 IBUOTIKỌ UKPEPN̄KPỌ 16

Ka Iso Wụt ke Amama Nte Jesus Akakpade Afak Nnyịn

Ka Iso Wụt ke Amama Nte Jesus Akakpade Afak Nnyịn

Eyen owo ekedi man edinọ ukpọn̄ esie nte ufak ke ibuot ediwak owo.’MARK 10:45.

ỌYỌHỌ IKWỌ 18 Kọm Abasi ke Ndikọnọ Jesus Edifak Nnyịn

SE IDIKPEPDE *

1-2. Nso idi ufak? Ntak emi iyomde enye?

ADAM ama ọfọn ama, akana enye ye nditọ esie ẹdu uwem ke nsinsi. Edi ini enye akanamde idiọkn̄kpọ, nsinsi uwem ama atak enye ye nditọ esie. Adam okokokoi anam idiọkn̄kpọ, inyeneke se enye ekpeketịn̄de anyan̄a idem. Edi nditọ esie? Mmọ ikeduehe n̄kpọ ndomokiet, inyụn̄ idịghe mmọ ẹkedọn̄ enye akanam idiọkn̄kpọ. (Rome 5:12, 14) Adam ama odot n̄kpa. Edi ndi enyene se Jehovah edinamde man nditọ Adam ẹkeme ndidu uwem ke nsinsi? Ih! Esisịt ini ke Adam ama akanam idiọkn̄kpọ, Jehovah ama ọtọn̄ọ ndinam ẹdiọn̄ọ nte Enye edisan̄ade inyan̄a ediwak miliọn nditọ Adam isio ke idiọkn̄kpọ ye n̄kpa. (Gen. 3:15) Ke ini emi Jehovah ekenịmde ama ekekem, enye ama ọnọ Eyen esie oto heaven edinọ “ukpọn̄ esie nte ufak ke ibuot ediwak owo.”—Mark 10:45; John 6:51.

2 Nso idi ufak? Ke ini ẹtịn̄de ẹban̄a ufak ke N̄wed Abasi Christian Usem Greek, ẹsida ẹtịn̄ ẹban̄a uwem Jesus emi enye akadade edep se Adam ọkọduọkde. (1 Cor. 15:22) Ntak emi okoyomde ẹnọ ufak-a? Sia Jehovah edi Abasi unenikpe. Ke ibet emi enye ọkọnọde nditọ Israel, enye ọkọdọhọ ẹnọ uwem ke uwem. (Ex. 21:23, 24) Adam ama ayak mfọnmma uwem emi enye ekenyenede atak. Jesus ama ọnọ mfọnmma uwem esie man ekekem ye ibet emi Abasi ọkọnọde do. (Rome 5:17) Oro ama anam Jesus akabade edi “Nsinsi Ete” ọnọ kpukpru mbon emi ẹbuọtde idem ke ufak.—Isa. 9:6; Rome 3:23, 24.

3. John 14:31 ye 15:13 ẹwụt ke nso ikanam Jesus enyịme ndikpa mfak mme owo?

3 Jesus ama enen̄ede ama Ete esie onyụn̄ ama nnyịn, oro  akanam enye enyịme ndikpa mfak nnyịn. (Kot John 14:31; 15:13.) Kpa ima oro akanam enye ọsọn̄ọ ada anam uduak Abasi tutu esịm n̄kpa. Se Jesus akanamde oro ayanam n̄kpọ etie ye mme owo nte Jehovah okoyomde etie, isọn̄ onyụn̄ etie nte Enye okoyomde etie ke ntọn̄ọ. Imọn̄ ineme ke ibuotikọ emi se ikanamde Abasi ayak Jesus enen̄ede ọbọ ufen ntre mbemiso enye akpade. Iyeneme n̄ko ekpri iban̄a apostle John emi ekenen̄erede ama nte Jesus ekedikpade afak nnyịn. Ke akpatre, iyeneme nte ikemede ndiwụt ke enem nnyịn nte Jesus ekedikpade afak nnyịn, ye se ikemede ndinam man inen̄ede ima se Jehovah ye Jesus ẹnamde ẹnọ nnyịn oro.

NTAK EMI JEHOVAH AKAYAKDE JESUS ỌBỌ UFEN-E?

Tie kere kpukpru ufen emi Jesus ọkọbọde man ekeme ndifak nnyịn! (Se ikpehe 4)

4. Tịn̄ nte ẹkesan̄ade ẹwot Jesus.

4 Kere se ẹkenamde Jesus mbemiso ẹwotde enye. Jesus ekpekekeme ndikot mme angel ke udịm ke udịm ẹdi ẹdikpeme enye, edi enye ama ayak mbonekọn̄ Rome ẹmụm enye ẹnyụn̄ ẹmia enye n̄kpa n̄kpa. (Matt. 26:52-54; John 18:3; 19:1) Ikpa emi ẹkedade ẹmia enye ama awak enye ikpaidem. Ofụri edem esie edidi unan unan, iyịp ke efehe, mmọ ẹfiak ẹmenede ndodobi eto ẹnọ enye obiom kpa ke edem oro. Jesus ama ọtọn̄ọ ndibiom eto oro n̄ka itie emi ẹkeyomde ndiwot enye, edi etise ibifịk okụre enye, ntre mbonekọn̄ ẹmụm owo efen ẹte ọbọ enye eto oro obiom. (Matt. 27:32) Ini mmọ ẹsịmde itie emi ẹyomde ndiwot enye, mbonekọn̄ ẹma ẹda okpukwak ẹkọn̄ enye ubọk ye ukot ẹdian ke eto ndutụhọ oro. Nte Jesus ọkọn̄ọde ke eto oro etehede, udobi idem esie ama anam nde okpukwak oro aka iso asiaha. Mme ufan esie ẹma ẹfụhọ, eka esie atua, edi ikpọ owo mme Jew ẹdada ẹsak enye. (Luke 23:32-38; John 19:25) Jesus ama ọbọ ufen ke ediwak hour. Nte enye ọkọn̄ọde oro anam esịt ye obufre esie ẹnam utom ẹkan nte ẹkpenamde, oro onyụn̄ anam ọsọn̄ enye ndikot ibifịk. Jesus ama ọdiọn̄ọ ke imọ imọsọn̄ọ ida ye Abasi isịm akpatre, ntre enye ama ada akpatre ibifịk ọbọn̄ akam ọnọ Ete esie. Okokụre oro, enye ọtọ itọn̄ etehede, akpa. (Mark 15:37; Luke 23:46; John 10:17, 18; 19:30) Enye akakpa n̄kpa ndọk, ẹma ẹnyụn̄ ẹkama enye ẹtụhọde mbemiso ẹwotde enye!

5. Nso ikabiak Jesus ikan usụn̄ emi ẹkewotde enye?

5 Idịghe usụn̄ emi ẹkewotde Jesus akabiak enye akan. Idiọkn̄kpọ emi ẹkedọhọde nte enye anamde yak ẹyom ndiwot enye akakam abiak enye akan. Ẹkedọhọ ke enye osụn̄i Abasi. Ikọ mmọ ọkọwọrọ ke enye idaha Abasi ke n̄kpọ, inyụn̄ ikponoke enyịn̄ Abasi. (Matt. 26:64-66) Jesus ndikam n̄kekere ke ata ata imọ ke ẹyom ndidọhọ ke imọ ikponoke Ete imọ ama afịna enye tutu enye ọdọhọ Ete esie ekpedi usụn̄ odu, yak enye okûyak utọ n̄kpọ oro etịbe. (Matt. 26:38, 39, 42) Nso ikanam Jehovah ayak edima Eyen esie ọbọ ufen onyụn̄ akpa? Ẹyak ineme ntak ita.

6. Ntak emi akanade ẹkọn̄ Jesus ke eto ndutụhọ?

6 Akana ẹkọn̄ Jesus ke eto man mme Jew ẹbọhọ isụn̄i emi okomụmde mmọ. (Gal. 3:10, 13) Mmọ ẹma ẹn̄wọn̄ọ ke iyenịm Ibet Abasi, edi mmọ ikedinịmke Ibet oro aba. Oro ama anam isụn̄i odoro mmọ ke idem ọkọrọ ye idiọkn̄kpọ emi mmọ ẹkedade-da ẹmana ẹto Adam. (Rome 5:12) Ibet emi Abasi ọkọnọde nditọ Israel ọkọdọhọ owo ama anam idiọkn̄kpọ emi odotde n̄kpa, yak ẹwot enye; ẹma ẹwot ẹma, ẹkeme ndikọn̄ okpo esie ke eto. * Ibet oro  ama ọdọhọ n̄ko ke owo emi ẹkọn̄de ke eto edi n̄kpọ isụn̄i ọnọ Abasi. (Deut. 21:22, 23; 27:26) Jesus ndikọkọn̄ọ ke eto ama anam enye obiomode mme Jew isụn̄i emi okomụmde mmọ. Mmọ ẹma ẹbọhọ isụn̄i oro, n̄kpa esie ama onyụn̄ an̄wam mmọ kpa ye oro mmọ ẹkesịnde enye.

7. Nso idi ọyọhọ ntak iba emi akanamde Abasi ayak Eyen esie ọbọ ufen?

7 Ẹyak ineme ọyọhọ ntak iba emi akanamde Abasi ayak Eyen esie ọbọ ufen. Enye eketịm Jesus idem ọnọ ini emi enye edidide Akwa Oku nnyịn. Se ikọwọrọde Jesus ama anam enye okụt ke imemke owo ndikop uyo Abasi ini ẹnen̄erede ẹdomo owo. Esịt ama enen̄ede etịmede enye tutu enye ọbọn̄ akam “ke ọkpọsọn̄ eseme ye mmọn̄eyet” oyom un̄wam. Se Jesus okokụtde oro ama anam esịt etịmede enye. Oro anam enye ọdiọn̄ọ se ifịnade nnyịn onyụn̄ anam “enye ekeme ndin̄wam” nnyịn ‘ke ini idomo.’ Imenen̄ede ima nte Jehovah ọnọde nnyịn Akwa Oku emi ekemede “nditua nnyịn mbọm ke mmemidem nnyịn”!—Heb. 2:17, 18; 4:14-16; 5:7-10.

8. Nso idi ọyọhọ ntak ita emi Abasi akayakde ẹnen̄ede ẹdomo Jesus?

8 Ọyọhọ ntak ita emi akanamde Jehovah ayak ẹnen̄ede ẹdomo Jesus edi ke enyene akpan mbụme kiet emi akanade ke isọn̄, emi akanade ẹbọrọ. Mbụme oro ekedi m̀mê owo ekeme ndika iso nsọn̄ọ nda ye Jehovah idem ke ini ẹnen̄erede ẹdomo enye. Satan ọdọhọ ke utọ owo oro idụhe! Enye ọdọhọ ke se iyomde ndibọ Abasi ke ubọk anam yak ikpono enye. Enye ọdọhọ ke inyụn̄ itie nte Adam ete nnyịn, ke nnyịn imaha Jehovah. (Job 1:9-11; 2:4, 5) Jehovah ama ọdiọn̄ọ ke Jesus Eyen imọ ọyọsọn̄ọ ada ye imọ, oro akanam enye ayak ẹdomo enye ke kpukpru usụn̄ emi ẹkemede ndidomo owo. Jesus ama ọsọn̄ọ ada ye Jehovah onyụn̄ owụt ke Satan edi osu nsu.

APOSTLE JOHN AMA ENEN̄EDE AMA NTE JESUS AKAKPADE AFAK NNYỊN

9. Nso ke apostle John akanam emi ikpekpebede?

9 Se Bible ekpepde aban̄a ufak anam ediwak mme Christian ẹtetịm ẹbuọt idem ye Jehovah. Mmọ ẹka iso ẹkwọrọ ikọ kpa ye ukọbọ, ẹnyụn̄ ẹsọn̄ọ ẹda ẹyọ kpukpru se ẹkpenanam mmọ tutu mmọ ẹsọn̄. Apostle John ekedi utọ owo oro. Etie nte enye ama ọsọn̄ọ ada ọkwọrọ aban̄a Christ ye ufak ebe isua 60. Ini enye ekperede ndisịm isua 100, ukara Rome ẹma ẹkọbi enye ke isuo Patmos. Etie nte mmọ ẹkekere ke enye ayanam mme owo ẹsọn̄ ibuot ye ukara mmimọ ‘ke ntak emi enye eketịn̄de aban̄a Abasi onyụn̄ etiede ntiense aban̄a Jesus.’ (Edi. 1:9) John ama enen̄ede ọbuọt idem ye Jehovah onyụn̄ ọsọn̄ọ ada ọyọ. Enye odot se ikpekpebede!

10. Didie ke mme n̄wed Bible emi John ekewetde ẹwụt ke enye ama ama ufak?

10 Ke mme n̄wed Bible emi John ekewetde, enye ama ewet nte imọ imade Jesus iketre, inyụn̄ imade n̄kpa emi enye ekedikpade afak nnyịn. Se enye ekewetde aban̄a ufak m̀mê ufọn emi ibọde ito ufak ama ebe itie 100. Kiet edi emi: “Edieke owo ekededi anamde idiọkn̄kpọ, nnyịn imenyene andin̄wam emi odude ye Ete, kpa Jesus Christ, edinen owo.” (1 John 2:1, 2) Mme n̄wed Bible emi enye ekewetde ẹwụt n̄ko ke ‘nditie ntiense nnọ Jesus’ edi ata akpan n̄kpọ. (Edi. 19:10) Se John ekewetde oro owụt ke enye ama enen̄ede ama ufak. Didie ke nnyịn n̄ko ikeme ndiwụt ke imama ufak?

DIDIE KE AFO EKEME NDIWỤT KE ENEM FI NTE JESUS AKAKPADE AFAK NNYỊN?

Ima inen̄ede ima nte Jesus akakpade afak nnyịn, iyesịn ndinam idiọkn̄kpọ (Se ikpehe 11) *

11. Nso idin̄wam nnyịn ikan idomo?

11 Sịn ndinam idiọkn̄kpọ. Edieke inen̄erede ima nte Jesus akakpade afak nnyịn, nnyịn ididọhọke ite: ‘Ufọn idụhe ndidomo  nditre ndinam idiọkn̄kpọ idomo ama edi. Mmekeme ndinam idiọkn̄kpọ ekem ndọhọ Abasi efen ọnọ mi.’ Utu ke ndidọhọ ntre ke ini idomo edide, ikpakam idọhọ ite: ‘Nsa mi-o! N̄kpasan̄a didie nnam utọ n̄kpọ oro ke kpukpru se Jehovah ye Jesus ẹnamde ẹnọ mi emi?’ Se idin̄wamde nnyịn inam emi edi ndiben̄e Jehovah ọnọ nnyịn odudu, ikpe enye ubọk ite ‘okûyak nnyịn iduọ idụk idomo.’—Matt. 6:13.

12. Didie ke ikpanam se 1 John 3:16-18 etịn̄de?

12 Ma nditọete. Ima ima nditọete, imowụt n̄ko ke imama nte Jesus akakpade afak nnyịn. Ntak edide ntre? Jesus ikakpaha inọ nnyịn kpọt, ama akpa ọnọ nditọete nnyịn n̄ko. Enye ndikakpa nnọ mmọ owụt ke enye enen̄ede ama mmọ. (Kot 1 John 3:16-18.) Nte inamde n̄kpọ ye nditọete nnyịn ke isida iwụt ke imama mmọ. (Eph. 4:29, 31–5:2) Imesin̄wam mmọ ini mmọ ẹdọn̄ọde m̀mê ke ini mmọ ẹnyenede ikpọ mfịna, utọ nte ini oyobio, ikan̄, m̀mê mmọn̄ abiatde n̄kpọ mmọ. Edi nso ke ikpanam ini eyenete etịn̄de m̀mê anamde n̄kpọ emi ayatde nnyịn?

13. Ntak emi ikpefende nditọete nnyịn?

13 Eyenete akpanam se iyatde fi, ndi esisọn̄ fi ndifen ndusụk ini? (Lev. 19:18) Ekpedi ntre, nam item emi N̄wed Abasi ọnọde mi ete: “Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye owo. Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre.” (Col. 3:13) Ini ekededi emi ifende inọ eyenete, iwụt Ete nnyịn eke heaven ke imenen̄ede ima nte Jesus akakpade afak nnyịn. Nso ke ikeme ndinam man ika iso inen̄ede ima se Jesus akanamde oro?

NSO KE AKPANAM MAN ENEN̄EDE AMA NTE JESUS AKAKPADE AFAK NNYỊN?

14. Siak n̄kpọ kiet emi ikpanamde man itetịm ima ufak.

14 Kọm Jehovah ke enye ndikọnọ Jesus edikpa afak nnyịn. Sista Joanna emi odụn̄de ke India, emi edide isua 83 ọdọhọ ete: “N̄kere ke edi akpan n̄kpọ ndidi mma mbọn̄ akam kpukpru usen ami n̄kọm Jehovah nte enye ọkọnọde Jesus edikpa afak nnyịn.” Ama ọbọn̄ akam idemfo, kere ndudue emi akanamde usen oro nyụn̄ dọhọ Jehovah efen ọnọ fi. Edi ekpedi ama anam akwa idiọkn̄kpọ, ana eketịn̄ ọnọ mbiowo n̄ko. Mmọ ẹyekpan̄ utọn̄ ẹnọ fi ẹnyụn̄ ẹda N̄wed Abasi ẹnọ fi item. Mmọ ẹyetie ye afo ẹbọn̄ akam ẹben̄e Jehovah efen ọnọ fi man  afo ekeme ndifiak n̄kpere enye.—Jas. 5:14-16.

15. Ntak emi ikpenen̄erede ikot inyụn̄ itie ikere se ikotde iban̄a ufak?

15 Tie kere ban̄a ufak. Sista Rajamani emi edide isua 73 ọdọhọ ete: “Ini ekededi emi n̄kotde mban̄a ufen emi Jesus ọkọbọde, mmọn̄eyet esisiaha mi ke enyịn.” Ekeme ndibiak fi n̄ko ama etie ekere kpukpru ufen emi Eyen Abasi ọkọbọde. Edi ama enen̄ede etie ekere nte Jesus akawade idemesie ke ibuot nnyịn, eyetetịm ama enye ye Ete esie. Nso idin̄wam fi enen̄ede etie ekere aban̄a ufak? Edi ndida ini nnen̄ede n̄kpep n̄kpọ mban̄a enye.

Jesus akada edinam emi mîwakke n̄kukọhọ owụt mme mbet esie nte mmọ ẹdisitide n̄kpa esie kpukpru isua (Se ikpehe 16)

16. Didie ke ndikpep mbon en̄wen mban̄a ufak ekeme ndin̄wam nnyịn? (Se ndise ikpaedem Enyọn̄-Ukpeme emi.)

16 Kpep mbon en̄wen ban̄a ufak. Ini ekededi emi itịn̄de inọ mbon en̄wen iban̄a ufak, imesitetịm ima nte Jesus akakpade afak nnyịn. Imenyene mme n̄wed ye mme vidio emi isidade inam mbon en̄wen ẹdiọn̄ọ ntak emi akanade Jesus akpa afak nnyịn. N̄wed kiet emi ikemede ndida nnam oro edi ekpri n̄wed Eti Mbụk Emi Otode Abasi! Ibuotikọ ọyọhọ ukpepn̄kpọ 4 ọdọhọ ete “Anie Edi Jesus Christ?” Mîdịghe, imekeme ndida ọyọhọ ibuot 5 ke n̄wed Nso ke Bible Ekpep Nnyịn? in̄wam mmọ. Ibuotikọ enye oro edi “Ufak Edi Akakan Enọ Abasi.” N̄kpọ en̄wen emi isinamde yak anam inen̄ede ima ufak edi ndidụk Editi n̄kpa Jesus kpukpru isua, nnyụn̄ nsịn idem n̄kot mbon en̄wen ẹtiene ẹdụk. Jehovah ndidọhọ nnyịn ikpep mbon en̄wen iban̄a Eyen imọ edi ata n̄kpọ ukpono!

17. Nso inam ufak edi akakan enọ emi Abasi ọnọde nnyịn?

17 Imenyene ediwak n̄kpọ emi akpanamde ida ufak ke ọsọn̄urua, inyụn̄ ikaka iso ima nte Jesus ekedikpade afak nnyịn. Ke ntak ufak, imekeme ndinen̄ede n̄kpere Jehovah kpa ye emi nnyịn mîfọnke ima. Ke ntak ufak, ẹyebiat kpukpru utom Devil. (1 John 3:8) Ke ntak ufak, isọn̄ emi eyetie nte Jehovah okoyomde enye etie ke ntọn̄ọ. Ofụri isọn̄ eyedi Paradise. Kpukpru owo emi afo edikụtde ẹyema Jehovah ẹnyụn̄ ẹnam n̄kpọ esie. Ntre ẹyak isiyom usụn̄ kpukpru usen iwụt ke imenen̄ede ima ufak emi edide akakan enọ emi Abasi ọnọde nnyịn!

ỌYỌHỌ IKWỌ 20 Afo Ọkọnọ Nnyịn Edima Eyen Fo

^ ikp. 5 Nso ikanam ẹtụhọde Jesus ẹnyụn̄ ẹwot enye? Imọn̄ ikụt ibọrọ ke ibuotikọ emi. Ibuotikọ emi ayan̄wam nnyịn n̄ko itetịm ima nte Jesus akakpade afak nnyịn.

^ ikp. 6 Mbon Rome ẹma ẹsida okpukwak ẹkọn̄ abiatibet ẹdian ke eto ye uwem mîdịghe ẹbọbọp enye ẹdian ke eto oro. Jehovah ama ayak ẹwot Eyen esie ntre.

^ ikp. 55 NDISE: Nditọete ita iduọhọ idụk idomo. Akpa esịn ndise oburobụt ndise. Ọyọhọ iba esịn ndin̄wọn̄ sika. Ọyọhọ ita esịn ndibọ ubọkedem.