Be ka se isịnede

Be ka se isịnede

 MBỤK EYOUWEM

Ima Ikụt ‘Pearl Emi Ekọmurua Okponde’

Ima Ikụt ‘Pearl Emi Ekọmurua Okponde’

WINSTON ye Pamela (Pam) Payne ẹdu ke n̄kọk itieutom Australasia. Uwem enem mmọ mbiba etieti. Edi mmọ ẹma ẹnyene mme mfịna n̄ko, esịnede ndikpep nte ẹsinamde n̄kpọ ke nsio nsio obio, ye idịbi ndibụn̄ọ Pamela. Kpa ye kpukpru emi, mmọ itreke ndima Jehovah ye ikọt esie, inyụn̄ itreke ndikop inem ukwọrọikọ. Ini ikanamde ndụn̄ọde emi ye mmọ, ima idọhọ mmọ ẹtịn̄ ndusụk se mmọ ẹkesobode.

Winston, tịn̄ nọ nnyịn nte ọkọtọn̄ọde ndiyom Abasi.

N̄kokpon ke in̄wan̄ kiet emi oyomde usụn̄ ọkpọn̄ obio ke Queensland ke Australia. Ubon nnyịn ikesikaha ufọkabasi. Uwem mi ekenen̄ede edi sụk mi sụk ubon nnyịn ke ntak itie emi ikodụn̄de. Mma ntọn̄ọ ndiyom Abasi ini ndide n̄kpọ nte isua 12. Mma mbọn̄ akam mben̄e enye nte anam mi nnen̄ede mfiọk enye. Nte ini akakade, mma n̄kpọn̄ in̄wan̄ oro n̄kanam utom ke Adelaide ke South Australia. Mma n̄kụt Pam ini n̄kakade nduọkodudu ke Sydney. N̄kedi isua 21 ini oro. Enye ama etịn̄ aban̄a n̄ka ido ukpono emi ẹkekotde British-Israel, emi ẹdọhọde ke mbon Britain ẹto esien Israel emi ẹkesopde. N̄ka oro ẹdọhọ ke mme esien Israel oro ẹdi obio ubọn̄ esien Israel duop emi ẹkekade ntan̄mfep ke isua 740 B.C.E. Ntre ini n̄kọnyọn̄de n̄ka Adelaide, mma n̄keneme mban̄a n̄kpọ emi ye owo itieutom nnyịn emi ama ọkọtọn̄ọ ndikpep Bible ye Mme Ntiense Jehovah. Ikeneme nneme ke hour ifan̄ kpọt. Akpan ibuot nneme nnyịn ekedi se Mme Ntiense Jehovah ẹnịmde. Ke ima ikeneme nneme oro ima, mma n̄kụt ke Abasi ọbọrọ akam oro n̄kọbọn̄de ini ndide eyenọwọn̄. Akpanikọ emi aban̄ade Andibot mi ye Obio Ubọn̄ esie ke n̄kekpep oro! Mma n̄kụt ‘pearl emi ekọmurua okponde.’—Matt. 13:45, 46.

Pam, afo n̄ko ọkọtọn̄ọ ndiyom pearl oro ini edide uyen. Akanam didie okụt?

N̄kokpon ke Coffs Harbour ke New South Wales. Ubon nnyịn ẹma ẹsika ufọkabasi. Ete mi, eka mi, ete eka mi, ye eka eka mi ẹma ẹnịm se n̄ka ido ukpono British-Israel ẹkekpepde. Ẹkekpep mi, ekpri eyeneka mi eren, adiahaeka mi, ye nditọ eyeneka eka  mi ke mbon emi Abasi amade akan ẹdi mbon emi mme ete ete mmọ ẹtode Britain. N̄kenịmke utọ n̄kpọ oro, n̄konyụn̄ n̄kpereke Abasi. Ini n̄kedide isua 14, mma n̄ka nsio nsio ufọkabasi, utọ nte Anglican, Baptist, ye Seventh-day Adventist. Edi mmọ ikosụk in̄wamke mi mfiọk Abasi.

Ubon nnyịn ẹma ẹdiwọrọ ẹkedụn̄ ke Sydney. Do ke n̄kokụt Winston ini enye akakade nduọkodudu. Nte enye ama eketetịn̄, se n̄kenemede ye enye mban̄a ido ukpono ama anam enye ọtọn̄ọ ndikpep Bible ye Mme Ntiense Jehovah. Ekem enye ama esidọn̄ itie Bible ọyọhọ mme leta emi enye ewetde mi. Yak ntịn̄ akpanikọ, ama afịna mi ke nsonso oro, ama esiyat mi. Edi sụn̄sụn̄ sụn̄sụn̄, mma ndikụt ke se enye ekesiwetde edi akpanikọ.

Ke 1962, mma n̄wọrọ n̄ka Adelaide man n̄kodu n̄kpere Winston. Enye ama anam n̄kodu ye ebe ye n̄wan emi ẹkekerede Thomas ye Janice Sloman. Mmọ ẹkedi Mme Ntiense Jehovah, ẹkenyụn̄ ẹdi mme isụn̄utom ke Papua New Guinea. Mmọ ẹma ẹfọn uwem ye ami utọ oro idụhe; n̄kedi isua 18 kpọt ini oro, mmọ ẹma ẹnyụn̄ ẹn̄wam mi nnen̄ede mfiọk Jehovah. Mma ntọn̄ọ ndikpep Bible n̄ko, ndien ikebịghike, mma nnịm ke mmokụt akpanikọ. Ke ami ye Winston ima ikanam ndọ, ima itọn̄ọ utom uyọhọ ini inikiet inikiet. Kpa ye mme idomo, utom oro akakam an̄wan̄wam nnyịn idọdiọn̄ ida eti pearl oro ikokụtde ke ọsọn̄urua.

Winston, tịn̄ nte n̄kpọ eketiede ini ọkọtọn̄ọde ndinam n̄kpọ Jehovah.

A. Map emi owụtde mme ebiet emi ikanamde utom circuit

B. Stamp efọkn̄wed ndusụk isuo. Kiribati ye Tuvalu ke ẹkesikot Gilbert and Ellice Islands

C. Ediye isuo Funafuti ke Tuvalu. Enye esịne ke otu ediwak isuo emi ikakade ikese mbemiso ẹnọde mme isụn̄utom ẹka

Esisịt ini ke ima ikanam ndọ, Jehovah ama ọtọn̄ọ ndinọ nnyịn san̄asan̄a utom inam ke esop esie. (1 Cor. 16:9) Brọda Jack Porter emi ekedide esenyịn circuit nnyịn okowụt nnyịn akpa utom oro ini enye ekedide edise ekpri esop nnyịn. (Ami ye enye isịne ke otu mbon Kọmiti N̄kọk Itieutom Australasia idahaemi.) Jack ye Roslyn an̄wan esie ẹma ẹdọhọ nnyịn inam utom usiakusụn̄. Ima inam usiakusụn̄ ke isua ition. Ini n̄kedide isua 29, ẹma ẹdọhọ mi ye n̄wan mi ikanam utom circuit ke South Pacific Islands emi n̄kọk itieutom Fiji ẹkesede enyịn ini oro. Mme isuo emi ẹkesịnede ẹnọ nnyịn ẹkedi American Samoa, Samoa, Kiribati, Nauru, Niue, Tokelau, Tonga, Tuvalu, ye Vanuatu.

Mme owo ke ndusụk isuo emi ẹkedude ata nsannsan ẹkesikpekpeme nte ẹnamde n̄kpọ ye Mme Ntiense Jehovah ini oro, ntre akana inyene mbufiọk ye ọniọn̄. (Matt. 10:16) Owo ikesiwakke ke mme esop oro ikesikade ikese, ndusụk esop ikonyụn̄ inyeneke ufọk ndinọ nnyịn idu. Ntre ima isibụp mbon obio m̀mê imekeme ndidu ye mmọ. Mmọ ẹma ẹsifọn uwem ye nnyịn etieti.

Winston, amama utom ukabade n̄wed etieti. Akasan̄a didie edima?

Winston ke enịm ufọkn̄wed mbiowo ke Samoa

Ini ikọtọn̄ọde utom circuit ke isuo Tonga, nditọete do ẹkenyene tract ifan̄ kpọt ke usem Tongan emi edide kiet ke otu usem emi ẹsemde ke Polynesia. Mmọ ẹkesikama n̄wed Akpanikö oro Adade osim Nsinsi Uwem ke Ikọmbakara ẹkpep mme owo Bible. Ntre ini ikenịmde ufọkn̄wed mbiowo ke ọfiọn̄ kiet, mbiowo ita ẹma ẹnyịme ndikabade n̄wed oro nsịn ke usem Tongan kpa ye oro mmọ mîkenen̄ekede idiọn̄ọ Ikọmbakara. Pam akataip se mmọ ẹkekabarede, ekem ima inọ ẹkemịn̄ ke n̄kọk itieutom United States. Akada nnyịn n̄kpọ nte ọfiọn̄ iba ndikụre kpukpru n̄kpọ. Kpa ye oro se ẹkekabarede mîkenen̄ekede inem, n̄wed oro ama an̄wam ediwak mbon emi ẹsemde Tongan ẹkpep akpanikọ. Ami ye Pam idịghe mme akabade n̄wed, edi se ikanamde oro ama anam inen̄ede ima utom ukabade n̄wed.

Pam, nso ke mme isuo oro ẹkeda ẹkpụhọde ye Australia?

Ima isidụn̄ ke moto emi n̄ko ini inamde utom circuit

Ata ediwak n̄kpọ! Mme n̄kpọ emi ẹkesifịnade nnyịn ke ndusụk ebiet ẹkedi udịm ọbọn̄, ọkpọsọn̄ ufiop ye ọkpọsọn̄ mbịtmbịt, eku, ye udọn̄ọ. Nnyịn ikesinyụn̄ inyeneke udia ekem nnyịn ndusụk ini. Edi ke  mbubreyo, ama esinem tutu ndida ke ufọk nnyịn nse inyan̄ibom. Ufọk nnyịn ikenyeneke ibibene, ọkọm okonyụn̄ edi n̄kanya. Nte ufọk mbon Polynesia ekesiwakde nditie edi oro. Ọfiọn̄ ama esiyama ndusụk okoneyo tutu ida ikụt mbukpọn̄ isịp mbakara, un̄wana ọfiọn̄ ama esinyụn̄ ọtọ ke inyan̄ ayama. Mme n̄kpọ ntre ẹma ẹsinam itie ikere n̄kpọ inyụn̄ ibọn̄ akam, ndien oro ama esin̄wam nnyịn ikere nti n̄kpọ utu ke ufen.

Ima ima nditọwọn̄ do tutu sia mmọ ẹma ẹsinọ owo imam ẹnyụn̄ ẹsinen̄ede ẹyom ndifiọk n̄kpọ mban̄a nnyịn emi ikedide mfiaowo. Ini ikakade Niue, ekpri eyen erenowo kiet ama ọfiọn̄ọ ubọk Winston emi etiede idet idet onyụn̄ ọdọhọ ete: “Mmama ntan̄ fo emi.” Osụk etie nte enye ikekwe owo enyenede idet-ubọk ntre akpa inyụn̄ ifiọkke nte okpokotde idet-ubọk!

Ama esibiak nnyịn ndikụt nte ediwak owo ẹbuenede, ndinyụn̄ n̄kụt nte uwem ọkọsọn̄de ye mmọ. N̄kann̄kụk mmọ ama eye, edi eti usọbọ ikodụhe, edin̄wọn̄ mmọn̄ ikonyụn̄ iwakke. Edi eketie nte kpukpru oro ikafịnake nditọete nnyịn. Mmọ ẹkeda ke nte uwem ekpetiede edi oro. Esịt ama esinem nditọ mbon ẹma ẹkam ẹdodu ye ubon mmọ, ẹnyene itie ẹsop idem ẹkpono Jehovah, ẹnyụn̄ ẹkeme nditoro enye. Nte mmọ ẹkedude uwem ama an̄wam nnyịn ida ini nnyịn inam se idide akpan n̄kpọ ikan ikûnyụn̄ uyom ikpọ n̄kpọ.

Pam, nte ekesisan̄ade enyene mmọn̄ onyụn̄ etem udia ndusụk ini ama okpụhọde ye se ekemehede. Ekesinam didie?

Pam ke eyet ọfọn̄ ke Tonga

Mmenen̄ede mma se ete mi ekekpepde mi. Enye ama ekpep mi ediwak n̄kpọ, utọ nte ndibara ikan̄ ke an̄wa ntem n̄kpọ, ndinyụn̄ nda ekpri se nnyenede ndu uwem. Isan̄ kiet emi ikakade Kiribati, ikodụn̄ ke ekpri ufọk n̄kanya emi ẹdade nnyanyan̄a ẹnam ibibene ẹnyụn̄ ẹdade coral ẹsịn isọn̄. Ke ini n̄koyomde nditem udia, mma ntịbi odudu ke isọn̄ ndọn̄ ikpọk isịp mbakara nda mbara ikan̄. Mma ntiene iban n̄kada ke udịm man ntop mmọn̄ ke obube mmọn̄. Mmọ ẹketebe urụk ke ibuot eto emi ọniọn̄de n̄kpọ nte ikpat itiokiet ẹda ẹtop mmọn̄. Eto oro ekesitie nte eto uwam, edi utu ke nditori uwam, mmọ ẹkesitebe iko. N̄wan emi oyomde ndikoi mmọn̄ oyotop urụk esie esịn ke obube oro onyụn̄ ọwọn̄ọde itọn̄ubọk esie ke nnennen ini; iko oro ọyọwọn̄ọde ana, mmọn̄ onyụn̄ ọdọn̄ọ ọyọhọ. N̄kekere ke inyeneke se isịnede do. Edi enyịn ama an̄wan̄a mi ke ama ekedisịm ini mi nditop. Mma ntop urụk mi nsịn ediwak ini, edi iko mi ọyọkọtọ mmọn̄ ọfiọrọ! Ke kpukpru owo ẹma ẹkesak yak akak, n̄wan kiet ama edin̄wam mi. Mmọ ẹma ẹsifọn uwem etieti ẹnyụn̄ ẹn̄wam owo.

Mbufo mbiba ẹma ẹma utom mbufo ke mme isuo oro. Ndi ẹkpema ndidọhọ nnyịn ndusụk se ikenen̄erede inem mbufo?

Winston: Ama ada ini ekpri mbemiso an̄wan̄ade nnyịn nte ẹsinamde ndusụk n̄kpọ. Ke uwụtn̄kpọ, ke ini nditọete ẹkotde fi ufọk, mmọ ẹyemen kpukpru udia emi mmọ ẹkeyomde ndidia usen oro ẹdi. Ke nsonso oro, nnyịn ikọdiọn̄ọke ke akpana idia isụhọ inọ mmọ. Ntre ima isikụre kpukpru se ẹmende ẹdi! Edi ke ima ikedifiọk nte ẹsinamde ke n̄kan̄ oro, ima isisụhọ inọ mmọ. Nditọete ẹma ẹyọ nnyịn kpa ye kpukpru ndudue nnyịn. Ini ikanamde utom circuit, ama esinem mmọ etieti ndikụt nnyịn n̄kpọ nte ọfiọn̄ itiokiet ama ebe. Ke ẹsiode mbon esop mmọ ẹfep, nnyịn ikedi n̄kukụre Ntiense Jehovah emi mmọ ẹkesikụtde ini oro.

Winston ada nditọete usụn̄ ke ukwọrọikọ ini idude ke Niue Island

Nnyịn ndikesika n̄kese mmọ ama anam mbon obio mmọ ẹfiọk n̄kpọ ẹban̄a esop Abasi. Ediwak owo ke obio ẹkekere ke nditọete nnyịn ẹnyụn̄ ẹsiak obufa ido ukpono ke idemmọ. Ntre ke ini mmọ ẹkụtde isenowo iba emi ẹkade ukem ido ukpono oro ẹtode idụt en̄wen ẹdi, mmọ ẹma ẹda oro ẹfiọk ke Mme Ntiense Jehovah ẹdu ke ofụri ererimbot ẹnyụn̄ ẹkere ẹban̄a kiet eken, esịt ama onyụn̄ enem mmọ.

 Pam: Kiet ke otu n̄kpọ emi mmendifreke eketịbe ke Kiribati. Nditọete ikawakke ke esop oro, ebiowo kiet kpọt okonyụn̄ odu. Enye ekekere Itinikai Matera, ama onyụn̄ odomo ukeme esie ndise mban̄a nnyịn. Usen kiet, enye ama esịn nsenunen kiet ke akpasa edidọhọ ete: “Mbufo ẹnyene.” Nnyịn ikesiwakke ndikụt nsenunen nta ini oro. Ekpri se enye akatatde ubọk ọnọ nnyịn oro ama enem nnyịn tutu.

Pam, idịbi ama obụn̄ọ fi nte ini akakade. Nso ikan̄wam fi ọyọ?

Mma nyomo ke 1973 ini ikodude ke South Pacific. Ima ifiak inyọn̄ Australia, do ke idịbi okobụn̄ọ mi ke ọfiọn̄ inan̄ ebede. N̄kpọ oro ama afịna Winston etieti n̄ko sia eyen esie ke ekedi n̄ko. Ubiak oro ama ọtọn̄ọ ndiwọrọ mi ke esịt nte ini akakade, edi esịt ekenen̄ede ana mi sụn̄ ini ẹkesiode Enyọn̄-Ukpeme April 15, 2009. “Mme Mbụme Oro Mme Andikot Ẹbụpde” ke Enyọn̄-Ukpeme oro ekedi: “Ndi eyen emi akpade eka ke idịbi eyeset?” Ibuotikọ oro ọkọdọhọ ke esịne Jehovah ke ubọk, ke enye esinam se inende kpukpru ini. Enye ayanam Eyen esie ‘abiat utom Satan’ man anam kpukpru ubiak emi isobode ke idiọk ererimbot emi ẹtre. (1 John 3:8) Ibuotikọ oro ama onyụn̄ an̄wam nnyịn idọdiọn̄ ima ọsọn̄urua “pearl” emi inyenede ke ntak emi idide mme asan̄autom Jehovah! Ndiọn̄ọke nte uwem nnyịn ẹkpetiede mîkpedịghe se Abasi aduakde ndinam ke Obio Ubọn̄ esie.

Ke eyen nnyịn ama akakpa, ima ifiak itọn̄ọ utom uyọhọ ini. Ima idu ọfiọn̄ ifan̄ ke Bethel ke Australia ekem ifiak itọn̄ọ utom circuit. Ke ima ikodu isua inan̄ ke Sydney ye ke mme obio-in̄wan̄ ke New South Wales, ẹma ẹkot nnyịn idi Bethel ke Australia ke 1981. Do ke idu tutu emi.

Winston, ndi utom fo ke South Pacific Islands an̄wam fi idahaemi edide owo Kọmiti N̄kọk Itieutom Australasia mi?

Ih, an̄wam. Akpa kan̄a, ẹma ẹdọhọ Australia ẹse ẹban̄a American Samoa ye Samoa. Ekem ẹma ẹtọ n̄kọk itieutom New Zealand ye Australia ẹdian kiet ẹkot Australasia. Idahaemi, efakutom Australasia esịne Australia, American Samoa ye Samoa, Cook Islands, New Zealand, Niue, Timor-Leste, Tokelau, ye Tonga. Esop Abasi ẹma ẹdọn̄ mi n̄kese ediwak ke otu oro. Nditọete ke mme isuo oro ẹma n̄kpọ Abasi. Ndikodu ye mmọ an̄wam mi etieti idahaemi ndude ke n̄kọk itieutom nse mban̄a mmọ mi.

Winston ye Pam Payne ke n̄kọk itieutom Australasia

Ke akpatre, nyom ndidọhọ ke ebịghi ami ye Pam ikọfiọk ke idịghe ikpọ owo kpọt ẹsiyom Abasi. Nte eke nnyịn eketiede anam ifiọk emi. Nditọwọn̄ ẹtiene ẹyom ‘pearl emi ekọmurua okponde’ ekpededi mbon en̄wen ke ubon mmọ idọn̄ke enyịn. (2 Ndi. 5:2, 3; 2 Chron. 34:1-3) Imọfiọk ke Jehovah edi edima Abasi emi oyomde kpukpru owo, ikpọ ye n̄kpri, ẹnyene nsinsi uwem!

Ini ami ye Pam ikọtọn̄ọde ndiyom Abasi n̄kpọ nte isua 50 emi ekebede, nnyịn ikọfiọkke ebiet emi oro edidade nnyịn ikesịm. Akpanikọ Obio Ubọn̄ enen̄ede edi pearl emi owo mîkemeke ndida okụk ndep! Imebiere ndida ofụri odudu nnyịn mmụm ọsọn̄urua pearl emi n̄kama!