Be ka se isịnede

Be ka se isịnede

Mme Mbụme Oro Mme Andikot Ẹbụpde

Mme Mbụme Oro Mme Andikot Ẹbụpde

Ntak emi Mme Ntiense Jehovah mînyịmeke ẹsion̄o se mmọ ẹdọn̄de ke ikpehe Intanet mmọ ẹkedọn̄ ke ikpehe Intanet en̄wen?

Sia nnyịn mîsinyamke-nyam mme n̄wed ye mme vidio nnyịn, ndusụk owo ẹkere ke idiọkke ndision̄o mmọ ke ikpehe Intanet nnyịn n̄kọdọn̄ ke ikpehe Intanet idemmọ m̀mê ke ikpehe Intanet emi mme owo ẹsidade ẹneme nneme. Edi mbon oro ẹnamde utọ n̄kpọ emi ẹbiat ibet oro aban̄ade nte ẹkpenamde n̄kpọ ke mme ikpehe Intanet nnyịn. * Emi esida ikpọ mfịna edi. Ibet oro enen̄ede anam an̄wan̄a ke owo inyịmeke owo ndomokiet emen ndise, n̄wed, mme idiọn̄ọ nnyịn (utọ nte jw ye jw.org), ikwọ, ye vidio ke jw.org ẹkesịn ke ikpehe Intanet en̄wen ekededi, edide ikpehe Intanet oro ẹsidade ẹnọ mme owo etop, n̄wed, vidio, ikwọ, m̀mê enye oro mme owo ẹsidade ẹneme nneme. Ntak emi nnyịn mînyịmeke ẹnam utọ n̄kpọ oro?

Owo ndomokiet inyeneke unen ndimen se ision̄ode n̄kọdọn̄ ke ikpehe Intanet en̄wen

Ibet inyịmeke owo ndomokiet osion̄o se idọn̄de ke mme ikpehe Intanet nnyịn ọkọdọn̄ ke ikpehe Intanet en̄wen. Mbon mfiakedem ye mbon oro mîmaha nnyịn ẹsimen mme n̄kpọ oro esop Abasi ẹsion̄ode ẹkedọn̄ ke ikpehe Intanet mmọ man ẹda ẹtap nditọete ye mbon en̄wen. Mmọ ẹsidọn̄ n̄ko mme n̄kpọ emi ẹkemede ndinam mme owo ẹkere m̀mê se esop Abasi ẹkpepde enen. (Ps. 26:4; N̄ke 22:5) Ndusụk owo ẹsida idiọn̄ọ jw.org m̀mê ndusụk n̄kpọ oro idọn̄de ke mme ikpehe Intanet nnyịn ẹsuan etop n̄kpọurua mmọ, ndusụk ẹwet ke n̄kpọurua mmọ, ye ke mme application oro ẹsidọn̄de ke fon m̀mê ke tablet. Ukara ẹnọ nnyịn unen ndikpan owo ekededi ndinam utọ n̄kpọ oro. (N̄ke 27:12) Edi edieke iyakde mme owo, ekpededi nditọete nnyịn, ẹsion̄o se idọn̄de ke mme ikpehe Intanet nnyịn ẹkedọn̄ ke ikpehe Intanet en̄wen, m̀mê ẹda mme idiọn̄ọ nnyịn (utọ nte jw ye jw.org) ẹnam mbubehe, esop ididaha  ye nnyịn ke ini ikotde mbon oro ẹnamde utọ n̄kpọ emi ikpe.

Ndika ebiet en̄wen ekededi n̄kosion̄o mme n̄wed, ikwọ ye vidio nnyịn ekeme ndisịn nnyịn ke fehesan̄. “Ofụn emi anamde akpanikọ onyụn̄ enyenede ọniọn̄” kpọt ke Jehovah ọdọhọ ekpep ikọt imọ n̄kpọ. (Matt. 24:45) N̄kukụre ikpehe Intanet oro “ofụn” emi adade ekpep nnyịn Ikọ Abasi edi www. jw.org, tv.jw.org, ye wol.jw.org. “Ofụn” emi onyụn̄ enyene application ita kpọt oro ẹsidọn̄de ke fon m̀mê tablet. Application ita oro ẹdi JW Language®, JW Library®, ye JW Library Sign Language®. Nnyịn idaha mme ikpehe Intanet ye mme application nnyịn isuan etop n̄kpọurua, ererimbot Satan inyụn̄ isabakede mmọ. Edieke ikade ikpehe Intanet en̄wen ikosion̄o n̄wed, ikwọ, ye vidio nnyịn, inam didie idiọn̄ọ ke mbon oro ẹmende mmọ ẹkedọn̄ do ikpụhọke n̄kpọ?​—Ps. 18:26; 19:8.

N̄ko-n̄ko, ndimen se idọn̄de ke mme ikpehe Intanet nnyịn n̄kọdọn̄ ke ikpehe Intanet oro mme owo ẹsidade ẹneme nneme ekeme ndinọ mbon mfiakedem ye mbon oro mîmaha nnyịn ufan̄ ndiwet n̄kpọ emi ekemede ndinam owo okûnịm se esop Jehovah ẹkpepde. Ndusụk nditọete ẹsitiene ẹfan̄a n̄kpọ ke ikpehe Intanet, edi emi esikam ananam ẹsuene enyịn̄ Jehovah. Intanet idịghe itie emi ikpadade ‘ifụre ifụre ido iteme mbon oro ẹbiọn̄ọde-biọn̄ọ’ nnyịn. (2 Tim. 2:​23-25; 1 Tim. 6:​3-5) Mme owo ẹsida enyịn̄ esop Abasi, Otu Emi Ẹsede Ẹban̄a Utom Nnyịn, ye mbon otu emi ẹsiak ikpehe Intanet. Idụhe owo Otu Emi Ẹsede Ẹban̄a Utom Nnyịn emi enyenede ikpehe Intanet idemesie, inyụn̄ idụhe owo mmọ ndomokiet emi esikade ekeneme nneme ke ikpehe Intanet oro mme owo ẹsidade ẹneme nneme.

Ndidọhọ mme owo ẹsika jw.org an̄wam ediwak owo ẹkop “eti mbụk.” (Matt. 24:14) Imaka iso ndinam mme ikpehe Intanet ye mme application nnyịn ẹtetịm ẹfọn man ida ikwọrọ ikọ. Imoyom kpukpru owo ẹtiene ẹdia ufọn mme n̄kpọ emi. Nte iwetde ke “Nte Ẹkpedade Ikpehe Intanet Emi Ẹnam N̄kpọ,” emekeme ndida e-mail nnọ owo n̄wed m̀mê vidio emi odude ke jw.org, mîdịghe ọ-kọpi itie emi n̄wed m̀mê vidio oro esịnede ọnọ enye ke e-mail. Ke ini idọhọde mbon oro ẹmade Ikọ Abasi ẹsika mme ikpehe Intanet nnyịn, nnyịn in̄wam mmọ ẹfiọk ke “ofụn emi anamde akpanikọ” ke Abasi ada ekpep nnyịn Bible mfịn.

^ ikp. 1 Ka isọn̄ isọn̄ akpa page jw.org/efi kefịk “Nte Ẹkpedade Ikpehe Intanet Emi Ẹnam N̄kpọ.” Kpukpru se ẹtịn̄de do ebehe kpukpru n̄kpọ oro idọn̄de ke mme ikpehe Intanet nnyịn.