Be ka se isịnede

Be ka se isịnede

 MBỤK EYOUWEM

Ndisan̄a ye Mbon Oro Ẹnyenede Ọniọn̄ Ọfọn ye Ami

Ndisan̄a ye Mbon Oro Ẹnyenede Ọniọn̄ Ọfọn ye Ami

TUEP ama odu etieti usenubọk usen kiet ke Brookings, ke South Dakota, ke U.S.A. Mma mfiọk ke usen oro eyebịt nte ice. Edi idem ayakpa fi ndifiọk ke nnyịn owo ifan̄ ikodu ke an̄wa ke utọ mbịtmbịt oro, ke inyek ke ntak etuep. Ikada ikpere n̄kpọ emi ẹsidọn̄de mmọn̄ ẹnọ mme unam ẹn̄wọn̄. Mbịtmbịt mmọn̄ ama ekpere ndiyọhọ n̄kpọ mmọn̄ oro. Yak nnọ fi ekpri mbụk mban̄a idemmi man ọfiọk se ikanamde ida do.

NTE N̄KPỌ EKETIEDE KE UBON NNYỊN

Ete mi ye Alfred eyeneka esie

N̄kamana ke March 7, 1936. Nnyịn idi owo inan̄, ndien ami ndi akpatre eyen. Nnyịn ikodụn̄ ke in̄wan̄ ete mi ke edem usiahautịn South Dakota. Nnyịn ikesitọ in̄wan̄, edi idịghe enye ekedi ata akpan utom nnyịn. Ete ye eka mi ẹkena baptism ke 1934. Sia mmọ ẹma ẹkeyak idem ẹnọ Jehovah, ndinam n̄kpọ Abasi ekedi ata akpan utom mmọ. Ete mi, Clarence, ekedi asan̄autom otu (emi ẹdiọn̄ọde idahaemi nte anam-ndutịm otu mbiowo) ke ekpri esop nnyịn ke Conde, South Dakota. Ekem, Alfred eyeneka esie ama edi asan̄autom otu n̄ko.

Ama esinem nnyịn ndidụk mbono esop nnyụn̄ nsan̄a ke ufọk ke ufọk ntịn̄ se Abasi aduakde ndinam ke ini iso nnọ mme owo. Uwụtn̄kpọ oro ete ye eka mi ẹkenịmde ẹnọ nnyịn ye se mmọ ẹkekpepde nnyịn ama enen̄ede an̄wam nnyịn ima n̄kpọ Abasi. Ami ye Dorothy eyeneka mi ikedi mme asuanetop ke ini ikedide isua itiokiet. Ke 1943, mma nsịn enyịn̄ ke Ufọkn̄wed Utom Ukara Abasi, emi mîkebịghike ẹketọn̄ọ.

Ini n̄kasiakde usụn̄ ke 1952

Nnyịn ikesidaha ikpọ ye n̄kpri mbono inam mbubru. Brọda Grant Suiter ekedi etịn̄ikọ emi okotode-to edidụk akamba mbono emi ẹkenịmde ke 1949, ke Sioux Falls, ke South Dakota. Ke nteti  ibuotikọ esie emi ekedide, “Enye Ekpere Akan Nte Afo Ekerede!” Enye ama ọsọn̄ọ etịn̄ ke akpana kpukpru mbon oro ẹma ẹkeyak idem ẹnọ Jehovah ẹsịn ifịk ẹkwọrọ eti mbụk Obio Ubọn̄ Abasi emi ama ọkọtọn̄ọ ndikara ke heaven. Emi ama anam mi nyak idem nnọ Jehovah. Ke mbono circuit oro ẹkenịmde ke Brookings, ke n̄kodu ke an̄wa ke usen etuep oro n̄ketịn̄de mban̄a ke ntọn̄ọ ntọn̄ọ. N̄kodu do sia n̄koyom ndina baptism. Ẹkenịm nnyịn owo inan̄ baptism ke n̄kpọ emi ẹsidọn̄de mmọn̄ ẹnọ mme unam ẹn̄wọn̄, ke November 12, 1949.

Ke mma n̄kana baptism, mma mbiere ndisiak usụn̄. N̄kọtọn̄ọ ndisiak usụn̄ ke January 1, 1952, ke ini n̄kedide isua 15. Bible ọdọhọ ke “owo eke asan̄ade ye mbon ọniọn̄ eyenyene ọniọn̄,” ndien mma nnyene ediwak mbon emi ẹnyenede ọniọn̄ ke ufọk nnyịn, emi ẹken̄wamde mi nsiak usụn̄. (N̄ke 13:20) N̄kesisan̄a ye Julius eyeneka ete mi, emi ekedide isua 60, nsiak usụn̄. Kpa ye oro enye mîkedịghe n̄ka mi, ama esinem nnyịn ndisan̄a kiet n̄kwọrọ ikọ. Mma n̄kpep ediwak n̄kpọ nto enye. Ikebịghike, adiahaeka mi ama ọtọn̄ọ utom usiakusụn̄ n̄ko.

MME ESENYỊN CIRCUIT ẸMA ẸN̄WAM MI

Ke ini n̄kedide ekpri, ete ye eka mi ẹma ẹsikot mme esenyịn circuit ye iban mmọ ẹdidu ye nnyịn. Brọda Jesse Cantwell ye Lynn an̄wan esie, ẹma ẹnen̄ede ẹn̄wam mi. Mmọ ẹma ẹtiene ẹn̄wam mi mbiere ndisiak usụn̄. Nte mmọ ẹken̄wamde mi akanam mbiere ndida uwem mi nnam n̄kpọ Abasi. Mmọ ẹma ẹsikot mi ndisan̄a ye mmimọ n̄kwọrọ ikọ ini ekededi emi mmọ ẹdide ẹdise mme esop oro ẹkekperede nnyịn. N̄kpọ emi ama enem mi tutu onyụn̄ an̄wam mi!

Esenyịn circuit en̄wen emi ekedide edise esop nnyịn ekedi Bud Miller; n̄wan esie ekekere Joan. N̄kedi isua 18 ini oro, ndien ẹma ẹtọn̄ọ ndifịna mi ndidụk ekọn̄. Itieutom uda owo ke ekọn̄ ẹma ẹdọhọ nnam utom emi mîdiyakke nda san̄asan̄a nte Jesus ọkọdọhọde. Edi idịghe se n̄koyomde ndinam edi oro. N̄koyom ndisịn idem n̄kwọrọ eti mbụk Obio Ubọn̄. (John 15:19) Ntre, mma ndọhọ mmọ ẹsịn mi enyịn̄ nte ọkwọrọikọ.

Esịt ama enen̄ede enem mi ke ini Brọda Miller ekenyịmede nditiene mi, ke ini itieutom uda owo ke ekọn̄ ẹkeyomde ndikụt mi. Brọda Miller ikesifeheke owo enyịn. Enye ama ọdiọn̄ọ Ikọ Abasi etieti,  ntre enye ndikasan̄a ye ami ama anam mi nnyene uko. Se ikenemede ye mbon itieutom uda owo ke ekọn̄ ama anam mmọ ẹnyịme ndisịn mi enyịn̄ nte ọkwọrọikọ ke 1954. Ndien emi ama anam mi n̄keme ndinam utom en̄wen ke esop Abasi.

Ini n̄kedide Bethel; nda ye trọk In̄wan̄ Enyọn̄-Ukpeme

Ikebịghike, ẹma ẹkot mi ndi Bethel. Ẹkedọhọ n̄kanam utom ke ebiet emi ẹkesikotde In̄wan̄ Enyọn̄-Ukpeme ke Staten Island, ke New York. Mma nnam utom do ke n̄kpọ nte isua ita. Mma n̄kpep ata ediwak n̄kpọ do, sia n̄kanam utom ye mbon emi ẹnyenede ọniọn̄.

UTOM BETHEL

Ami ye Brọda Franz ke WBBR

Ufọkutom radio emi ẹkekotde WBBR ama odu n̄ko ke Staten Island. Mme Ntiense Jehovah ẹma ẹsida radio emi ẹkwọrọ ikọ, ọtọn̄ọde ke 1924 esịm 1957. N̄kpọ nte owo 15 m̀mê 20 kpọt ẹkesinam utom ke In̄wan̄ Enyọn̄-Ukpeme. Ediwak nnyịn ikedi uyen, ikonyụn̄ inen̄ekede inyene ifiọk. Edi, Eldon Woodworth, eyenete emi ẹyetde aran, oro okokponde akan nnyịn, ama odu do ye nnyịn. Enye ama enen̄ede enyene ọniọn̄. Enye akada nnyịn nte nditọ esie, ndien emi ama enen̄ede an̄wam nnyịn. Ke ini ikesinyenede n̄kpri ndutan̄uyo, Brọda Woodworth ama esidọhọ ete: “Esikpa owo idem ndikụt se Ọbọn̄ adade mbon oro mîfọnke ima anam ke utom esie.”

Harry Peterson ama ama ukwọrọikọ etieti

Brọda Frederick W. Franz akanam utom ye nnyịn n̄ko. Enye ama enyene ọniọn̄ onyụn̄ enen̄ede ọfiọk Ikọ Abasi. Enye ama ama kpukpru nnyịn, esinyụn̄ an̄wam nnyịn kiet kiet. Brọda Harry Peterson ekesitem udia ọnọ nnyịn. Ama esimem nnyịn utom ndikot enye Peterson akan ndikot akpa enyịn esie, Papargyropoulos. Enye n̄ko ekedi owo emi ẹyetde aran, ama esinyụn̄ ama ukwọrọikọ etieti. Kpa ye emi Brọda Peterson ekenyenede ata ediwak n̄kpọ ndinam ke Bethel, enye ikesitreke ndika ukwọrọikọ. Enye ama esinịm ata ediwak magazine kpukpru ọfiọn̄. Brọda Peterson ama ọfiọk Ikọ Abasi etieti, ama esinyụn̄ ọbọrọ nnyịn ata ediwak mbụme emi ikesibụpde enye.

MMA N̄KPEP N̄KPỌ NTO NDITỌETE IBAN EMI ẸNYENEDE ỌNIỌN̄

Ke in̄wan̄ oro, ima inyene itie emi ikesinyịmide mfri inyụn̄ idiọn̄ mme n̄kpọ-in̄wan̄ eken idọn̄ ke iko atian. Ima isidọn̄ n̄kpọ emi iyọhọ n̄kpọ nte  iko 45,000 kpukpru isua inọ ẹka Bethel. Ima isinyụn̄ idọn̄ ibọk oro mîdiyakke se idọn̄de ke mme iko oro ẹbiara. N̄kanam utom ye Sista Etta Huth ke ebiet emi; enye ama enyene ọniọn̄ etieti. Enye ekesinam kpukpru ibọk oro ikesidọn̄de ke mme iko emi. Nditọete iban en̄wen ẹma ẹsidi ẹdin̄wam ke ini iyomde ndidọn̄ mme n̄kpọ emi ke iko. Sista Etta ekesinọ mmọ utom. Kpa ye edide enye ekesise aban̄a nte ẹdọn̄de mme n̄kpọ ke iko, enye ama esikpeme nte anamde n̄kpọ, onyụn̄ okpono nditọete emi ẹkedade usụn̄ ke in̄wan̄ oro. Sista Etta ama enen̄ede osụk ibuot ọnọ mbon oro ẹdade usụn̄ ke esop Abasi.

Ami, N̄wan mi, ye Etta Huth

Sista Angela Romano ama esitiene edin̄wam nnyịn ke utom. Sista Etta ama an̄wam enye ke ini enye okodụkde esop obufa. Mma mfiak nsobo ye owo en̄wen emi enyenede ọniọn̄; owo emi ekedi Sista Angela Romano. Mmasan̄a ye enye nnam n̄kpọ Abasi ke ofụri isua 58. Nnyịn ikọdọ ndọ ke April 1958. Nnyịn imanam ediwak utom ke esop Abasi. N̄wan mi ndisọn̄ọ nda ye Jehovah ke ofụri isua emi, anam ndọ nnyịn etetịm enem. Mmenịm ke enye ayaka iso ọsọn̄ọ ada ye Jehovah inamke n̄kpọ m̀mê nso itịbe.

UTOM ISỤN̄UTOM YE UTOM ORO ẸSAN̄ADE-SAN̄A

Ke ini ẹkenyamde ufọkutom radio WBBR emi okodude ke Staten Island ke 1957, mma n̄ka n̄kanam utom ke Bethel Brooklyn ke ekpri ini. Ke mma n̄kọdọ ndọ, mma n̄kpọn̄ Bethel n̄kasiak usụn̄ ke Staten Island ke n̄kpọ nte isua ita. Mma n̄kam nnam utom nnọ mbon emi ẹkedepde ufọkutom radio nnyịn. Ẹkekot ufọkutom mmọ WPOW.

Ami ye n̄wan mi ima ibiere ke nnyịn idiyomke ikpọ n̄kpọ man ikpekeme ndika n̄kanam utom ke ebiet ekededi emi esop Abasi oyomde nnyịn ika. Ntem, ke 1961, ima ikeme ndika Falls City ke Nebraska n̄kanam utom akpan asiakusụn̄. Ikebịghike, ẹma ẹkot nnyịn ididụk Ufọkn̄wed Utom Obio Ubọn̄ ke South Lansing, New York. Ini oro, ẹkesinịm ufọkn̄wed emi ọfiọn̄ kiet. Ufọkn̄wed emi ama enem nnyịn etieti, ndien ikekere ke ẹdifiak inọ nnyịn inyọn̄ Nebraska. Idem ama akpa nnyịn ke ini ẹkedọhọde ikanam utom isụn̄utom ke Cambodia. Nnyịn ima ikop mme n̄kpọ emi nnyịn mîkopke akpa, ikụt ndiye n̄kpọ emi nnyịn mîkwe akpa, inyụn̄ idia ediwak n̄kpọ emi akanam nnyịn mîdiaha. Ama ọdọn̄ nnyịn ndidu do mbịghi n̄kwọrọ ikọ.

Edi, mfịna ama ọtọn̄ọ ke Cambodia, ntre ima iwọrọ ikodụn̄ ke South Vietnam. Ke isua iba ama ekebe, mma ndọn̄ọ etieti. Ntre, ẹma ẹdọhọ ifiak inyọn̄ obio nnyịn. Ke idem ama ọkọsọn̄ mi, nnyịn ima ifiak itọn̄ọ utom uyọhọ ini.

Ini ẹkenamde ndụn̄ọde ye nnyịn ke TV, ke 1975

Ke March 1965, ẹma ẹdọhọ isisan̄a ise mme esop. Ami ye n̄wan mi imanam utom circuit ye district ke isua 33, ima isinyụn̄ itiene idiomi ikpọ mbono inyụn̄ in̄wam ke ini mbono emi. Mma nsima ndidụk ikpọ mbono toto ke ini emi n̄kedide ekpri, ntre ekenenem mi nditiene ndiomi mme mbono emi. Ke ofụri isua emi ikasan̄ade ise mme esop ke New York City, ẹkesinịm ediwak ikpọ mbono emi ke Yankee Stadium.

ẸFIAK ẸKOT NNYỊN KE BETHEL

Ami ye n̄wan mi imanam nsio nsio utom oro ẹnemde ẹnyụn̄ ẹsọn̄de, kpa nte nditọete eken oro ẹdude ke utom uyọhọ ini ẹsinamde. Ke uwụtn̄kpọ, ke 1995, ẹma ẹdọhọ nsitiene n̄kpep n̄kpọ ke  Ufọkn̄wed Unọ Mme Asan̄autom Ukpep. Ke isua ita ẹbede, ẹma ẹkot nnyịn ifiak idi Bethel. Ama enem mi ndifiak ndu ke ebiet emi n̄kọtọn̄ọde utom uyọhọ ini ke isua 40 emi ẹkebede. Mma nnam utom ke Itieutom Utịmutom nnyụn̄ mfiak n̄kpep nditọete n̄kpọ ke nsio nsio ufọkn̄wed esop Abasi. Ke 2007, Otu Emi Ẹsede Ẹban̄a Utom Nnyịn ẹma ẹsiak Itieutom Emi Ẹsede Ẹban̄a Mme Ufọkn̄wed Esop Abasi. Itieutom emi ẹsise ẹban̄a mme ufọkn̄wed esop Abasi emi ẹnịmde ke Bethel. Ami n̄kedi esenyịn itieutom emi ke ediwak isua.

Ẹkpụhọde ediwak n̄kpọ ke mme ufọkn̄wed esop Abasi ẹnyụn̄ ẹkpụhọ ndusụk ufọkn̄wed emi. Ẹma ẹsiak Ufọkn̄wed Mbiowo ke 2008. Ndien ke isua iba ẹbede, mbiowo emi ẹbede 12,000 ẹma ẹdụk ufọkn̄wed emi ke Patterson ye ke Bethel Brooklyn. Ke ẹnịm ufọkn̄wed emi ke nsio nsio itie idahaemi. Ke 2010, ẹkedikot Ufọkn̄wed Unọ Mme Asan̄autom Ukpep, Ufọkn̄wed Ukpep Bible Eke Nditọete Iren Emi Mîdọhọ Ndọ. Kpa isua oro, ẹma ẹsiak ufọkn̄wed en̄wen emi ẹkotde, Ufọkn̄wed Ukpep Bible Eke Mme Christian Oro Ẹdọde Ndọ.

Ke isuautom 2015, ẹma ẹmen ufọkn̄wed iba emi ẹtọ ẹdian kiet ẹsiak obufa ufọkn̄wed emi ẹkotde, Ufọkn̄wed Mme Ọkwọrọ Obio Ubọn̄. Nditọete emi ẹdọde ndọ, ye nditọete iren ye iban emi mîdọhọ ndọ ẹdụk ufọkn̄wed emi. Esịt ama enem nditọete ndikop ke ẹyenịm ufọkn̄wed emi ke ata ediwak n̄kọk itieutom. Enem mi ndifiọk ke ata ediwak nditọete ẹyenyene ifet nditiene ndụk ufọkn̄wed esop Abasi; esinem mi n̄ko ndifiọk nditọete emi ẹyakde n̄kpọ atak mmọ man ẹkeme nditiene ndụk ufọkn̄wed emi.

Ke ini nsitiede n̄kere nte uwem mi etiede, ọtọn̄ọde ke ini emi mmen̄kanaha baptism tutu esịm mfịn emi, mmesikọm Jehovah ke ndinam mbon emi ẹnyenede ọniọn̄ ẹn̄wam mi nnam n̄kpọ esie. Ndusụk mmọ ikedịghe n̄ka mi, ikonyụn̄ itoho obio nnyịn, edi mmọ ẹma ẹnen̄ede ẹma Abasi. Nte mmọ ẹkedude uwem ẹnyụn̄ ẹnamde n̄kpọ owụt ke mmọ ẹma Jehovah etieti. Mbon emi ẹnyenede ọniọn̄, emi nnyịn ikpasan̄ade kiet, ẹyọyọhọ esop Abasi. Ami ke idemmi mmasan̄a ye mmọ, mmonyụn̄ n̄kụt ke emi ọfọn ye ami.

Esinem mi ndisobo ye nditọ ufọkn̄wed emi ẹtode nsio nsio idụt