Be ka se isịnede

Be ka se isịnede

 SE IDIN̄WAMDE UBON | UKAMA NDITỌ

Nte Ekpekpepde Eyen Fo Ndisụhọde Idem

Nte Ekpekpepde Eyen Fo Ndisụhọde Idem

SE ISINAMDE ỌSỌN̄

  • Eyen fo edi isua duop kpọt, edi enye atan̄ idem etieti!

  • Enye oyom kpukpru owo ẹnam se ededi oro imọ iyomde.

Emekeme ndikere m̀mê nso idọk enye ibuot. Kpa ye oro oyomde enye okop inemesịt, uyomke enye ekere ke imọfọn ikan kpukpru owo.

Ndi emekeme ndikpep eyen fo ndisụhọde idem, edi unamke enye ekere ke imọ iwọrọke n̄kpọ?

SE AKPANADE ỌDIỌN̄Ọ

Ke ediwak isua emi ebede, ẹkesidọhọ mme ete ye eka ẹnam se ededi oro nditọ mmọ ẹdọhọde, ẹtoro mmọ idem ke ini mmọ mînamke n̄kpọ ndomokiet, ẹkûnyụn̄ ẹtụnọ mmọ. Ẹkekere ke edieke ẹkamade nditọwọn̄ nte nsenunen, ke oro ayanam esịt enem mmọ, ke mmọ idinyụn̄ ikereke ke mmimọ iwọrọke n̄kpọ. Ndi ntre ke edi? N̄wed emi ẹkotde Generation Me ọdọhọ ke utu ke emi ndinam nditọwọn̄ ẹdiọn̄ọ idem ẹnyụn̄ ẹkop inemesịt, ke emi esinam mmọ ẹkabade ẹda idemmọ nte n̄kpri abasi.

Ediwak nditọwọn̄ emi ẹkesitorode, idem ke ini mmọ mînamke n̄kpọ ndomokiet, isidiọn̄ọke se ẹkpenamde ke ini n̄kpọ mîtiehe nte mmọ ẹkekerede, ke ini ẹsuade ẹnọ mmọ, ye ke ini mmọ ẹnamde ndudue. Sia ẹkekpepde mmọ ndiyom ufọn idemmọ kpọt, esisọn̄ mmọ ndinyene nti ufan ke mmọ ẹma ẹkekpon. Emi esinam esịt etịmede ediwak mmọ, mmọ isinyụn̄ ikopke inemesịt.

Nditọwọn̄ ndisịn idem nnam eti n̄kpọ esinam mmọ ẹkop inemesịt, idịghe ete ye eka mmọ ndikama mmọ ntan̄ ase. Ntre, ana mme ete ye eka ẹkpep nditọ mmọ ndisịn idem nnam n̄kpọ, utu ke nditak ke nditotoro mmọ. Ana mmọ ẹsịn idem ẹkpep n̄kpọ ekededi oro mmọ ẹmekde ẹnyụn̄ ẹdiọn̄ọ ndinam n̄kpọ oro ọfọn. (Mme N̄ke 22:29) Ana mmọ ẹkere ẹban̄a mbon en̄wen n̄ko. (1 Corinth 10:24) Mmọ idikemeke ndinam kpukpru emi edieke mmọ mîsụhọkede idem.

 SE AKPANAMDE

Toro eyenọwọn̄ ke ini enye anamde n̄kpọ ọfọn. Edieke eyen fo ebede udomo, toro enye. Edieke enye mîbehe, kûduọhọ andikpep esie. Utu ke oro, n̄wam enye ọfiọk nte akpanamde ọfọn akan oro isan̄ en̄wen. Emi ayan̄wam enye ekpep ndisụhọde idem. Kûdi m̀mê enye anam ọfọn m̀mê inamke, afo otoro enye.

Nen̄ede eyen fo edieke enye anamde ndudue. Emi iwọrọke ke ana otụnọ enye ini ekededi oro enye anamde ndudue. (Colossae 3:21) Edi kûmen iso ufep ke ini enye anamde akamba ndudue. Nyụn̄ nen̄ede enye edieke enye ọtọn̄ọde ndinyene idiọk edu. Mîdịghe ntre, idiọk edu oro eyemehe enye.

Yak idọhọ ke eyen fo ọtọn̄ọ ndinam inua. Edieke mûnen̄ekede enye, enye ekeme nditọn̄ọ ndikohode idem ndien mbon en̄wen idimaha enye. Ntre, nam eyen fo ọdiọn̄ọ ke mme owo isimaha owo emi anamde inua, ndien ke enye ekeme ndidia bụt edieke enye mîkpemeke. (Mme N̄ke 27:2) Nam enye ọdiọn̄ọ n̄ko ke owo emi mîdaha idem esie ke n̄kpọ ikaha isinamke inua. Edieke enen̄erede eyen fo ntem, emi ayanam enye ekpep ndisụhọde idem, edi idinamke enye ekere ke imọ iwọrọke n̄kpọ.—Se se Bible etịn̄de ke Matthew 23:12.

Nam eyen fo ọfiọk ke idịghe kpukpru ini ke n̄kpọ esisan̄a nte iyomde. Edieke ọnọde eyen fo se ededi emi enye oyomde, enye edida idemesie nte ọbọn̄. Ke uwụtn̄kpọ, edieke eyen fo oyomde n̄kpọ emi mûnyeneke okụk ndidep, dọhọ enye ke ifọnke owo anyanade ebịne n̄kpọ emi ubọk esie mîsịmeke. Edieke akaduakde ndimen enye n̄ka n̄koyom itie ndia uwem edi ukemeke, nam enye ọdiọn̄ọ ke idịghe kpukpru ini ke n̄kpọ esisan̄a nte iyomde, nyụn̄ nam enye ọfiọk se afo esinamde edieke n̄kpọ mîsan̄ake nte okoyomde. Utu ke ndikama eyen fo nte eyen ọbọn̄, tọn̄ọ idahaemi kpep enye mme n̄kpọ emi enye edikụtde ama okpon owo.—Se se Bible etịn̄de ke Mme N̄ke 29:21.

Kpep enye ndisin̄wam mbon en̄wen. Nam eyen fo okụt ke “inemesịt odu ke ndinọnọ akan ke ndibọbọ.” (Utom 20:35) Didie ke akpanam emi? Emekeme nditie ye enye n̄wet enyịn̄ mbon emi ẹyomde owo an̄wam mmọ aka urua, ọdiọn̄ n̄kpọ, mîdịghe emen mmọ aka n̄kpọ. San̄a ye enye ka kan̄wam ndusụk mmọ. Nam eyen fo okụt nte esịt enemde fi ke ini an̄wamde mbon en̄wen. Emi ayanam eyen fo okụt ke omosụhọde idem, ndien enye n̄ko eyekpebe fi.—Se se Bible etịn̄de ke Luke 6:38.