Be ka se isịnede

Be ka se isịnede

 SE BIBLE ETỊN̄DE ABAN̄A | IDOMO

Idomo

Idomo

Ediwak ndọ abiara, mme owo ẹdọn̄ọ, esịt onyụn̄ afịna ediwak owo ke ntak emi mmọ ẹkeduọde ẹdụk idomo. Nso ke ikpanam man nnyịn ididuọ idụk idomo?

Nso idi idomo?

Edieke ọdọn̄de fi ndinam n̄kpọ emi mîfọnke, idomo edi oro. Ke uwụtn̄kpọ, nte osụk asan̄ade edep n̄kpọ, afo okụt n̄kpọ emi amade. Esịt kiet ọdọhọ ke emekeme ndiyịp n̄kpọ oro owo ikwe fi. Edi esịt en̄wen ọdọhọ okûyịp. Afo ọsọsọp osio utọ ekikere oro efep ke esịt fo onyụn̄ ebe aka uwa fo. Idahaoro, emebe idomo enye oro.

SE BIBLE ỌDỌHỌDE

 

Idiọk ekikere ndidụk owo esịt iwọrọke ke enye edi idiọkowo. Bible ọdọhọ ke kpukpru nnyịn imesisobo idomo. (1 Corinth 10:13) Se ikam idide akpan n̄kpọ edi se nnyịn inamde ke ini isobode idomo. Ndusụk owo ẹsika iso ẹkere ẹban̄a idiọk n̄kpọ oro ọdọn̄de mmọ tutu mmọ ẹnam idiọkn̄kpọ. Mbon en̄wen ẹsisọp ẹsio idiọk ekikere ẹfep ke esịt mmọ.

“Idomo esịm owo kiet kiet ke ini udọn̄ idemesie odụride onyụn̄ atapde enye.”​—James 1:14.

Ntak emi ọfọnde isọsọp isio idiọk ekikere emi odụkde nnyịn esịt ifep?

Bible etịn̄ se isitịbede mbemiso owo anam idiọkn̄kpọ. James 1:15 ọdọhọ ete: “Ke ini [idiọk] udọn̄ emi oyomode, aman idiọkn̄kpọ.” Emi ọwọrọ ke edieke ikade iso ikere idiọk n̄kpọ, iyesịm idaha emi nnyịn mîdikemeke nditre ndinam idiọkn̄kpọ oro, kpa nte n̄wan emi uman omụmde mîkemeke ndikpan eyen ndimana. Edi nnyịn imekeme ndisio idiọk udọn̄ oro mfep ke esịt nnyịn, imonyụn̄ ikeme nditre ndinam idiọkn̄kpọ oro ọdọn̄de nnyịn.

NTE BIBLE EKEMEDE NDIN̄WAM NNYỊN

 

Kpa ye oro idiọk ekikere ekemede ndidụk nnyịn esịt, imekeme ndisio enye mfep ke esịt nnyịn. Didie ke ikeme ndinam emi? Imekeme ndiyom n̄kpọ nnam, itọn̄ọ nneme ye ufan nnyịn, mîdịghe ikere nti n̄kpọ. (Philippi 4:8) Ọfọn ikere n̄ko se iditịbede edieke iduọde idụk idomo. Ndusụk mbon oro ẹduọde ẹdụk idomo ẹsidọn̄ọ, ẹfụhọ, ẹbụn̄ owo esịt, mîdịghe ẹkpọn̄ Abasi. (Deuteronomy 32:29) Ndibọn̄ akam ekeme n̄ko ndinen̄ede n̄n̄wam nnyịn. Jesus Christ ọkọdọhọ ete: “Ẹka iso ndibọn̄ akam, mbak mbufo ẹdidụk idomo.”​—Matthew 26:41.

“Ẹkûyak ẹtụn mbufo usụn̄: Owo ikemeke ndibian̄a Abasi. Koro se ededi eke owo ọtọde, oro ke enye edinyụn̄ ọdọk.” ​—Galatia 6:7.

 Nso ke ikpanam man ikeme ndikan idomo?

SE IDUDE

 

Idomo etie nte afia, ndien owo emi mîkpemeke idem ekeme ndiduọ ndụk enye nte unam ọduọ odụk afia. (James 1:14) Owo emi ọduọde odụk idomo esịn idemesie ke afanikọn̄, akpan akpan owo emi anamde use m̀mê esịnde efịbe sia utọ idiọkn̄kpọ emi esisan̄a ye ediwak afanikọn̄.​—Mme N̄ke 7:​22, 23.

NTE BIBLE EKEMEDE NDIN̄WAM NNYỊN

 

Jesus Christ ọkọdọhọ ete: “Edieke enyịn nnasia fo oro anamde fi atuak ukot ọduọ, wụbede enye top duọk.” (Matthew 5:29) Jesus iketịn̄ke iban̄a ndiwụbede ata ata enyịn nnyịn! Ikọ esie ọkọwọrọ ke edieke nnyịn iyomde ndinam se inemde Jehovah esịt nnyụn̄ ndu uwem ke nsinsi, ke ana iwot mbak idem nnyịn emi oyomde ndinam nnyịn inam idiọkn̄kpọ. (Colossae 3:5) Emi ọwọrọ ke ana inen̄ede in̄wana mbak nnyịn ididuọ idụk idomo. Asan̄autom Abasi kiet ama ọbọn̄ akam ọnọ Abasi ete: “Nam enyịn mi ọwọn̄ọde ọkpọn̄ ndikụt obukpo n̄kpọ.”​—Psalm 119:37.

Imọdiọn̄ọ ke imemke ndimụm idem n̄kama ke ini isobode idomo sia Bible ọdọhọ ke “obụkidem ememem.” (Matthew 26:41) Ntre, idụhe nte nnyịn mîdinamke ndudue. Edi, edieke ituade n̄kpọfiọk inyụn̄ itrede ndinam se idiọkde, Jehovah Abasi emi okobotde nnyịn eyefen nnyịn sia enye “enyene esịtmbọm onyụn̄ ọfọn ido.” (Psalm 103:8) Ndifiọk emi enen̄ede ọdọn̄ nnyịn esịt!

“Edieke ekpedide ndudue ke afo ese, O Jah, O Jehovah, anie ekpekeme ndida?”—Psalm 130:3.