Be ka se isịnede

Be ka se isịnede

Okụk

Okụk

Ediwak owo inen̄ekede inyene mfịna okụk aba sia mmọ ẹnamde item Bible.

KỌK IBUOT MBEMISO ANAMDE N̄KPỌ

SE BIBLE ETỊN̄DE: “N̄kọkibuot owo nsịnifịk itreke ndinyene ufọn, edi kpukpru owo eke ẹnamde n̄kpọ ke ibụmede iditreke ndidu ke unana.”—Mme N̄ke 21:5.

NSO KE EMI ỌWỌRỌ? Ndikọk ibuot mbemiso anamde n̄kpọ esinyene ufọn etieti. Ntem, tịm kere nte edibiatde okụk. Ti ke udukemeke ndidep kpukpru se oyomde. Ntre, diọn̄ọ nte abiatde okụk.

SE AKPANAMDE:

  • Biere nte edisibiatde okụk. Wet kpukpru se oyomde ndida okụk nnam ke ikpehe ke ikpehe, utọ nte udia, ọfọn̄, ye okụk ufọk. Ekem, wet okụk emi edibiatde inam mme n̄kpọ emi. Edieke abiatde okụk akaha ke ikpehe kiet, sio okụk emi ekenịmde ọnọ ikpehe en̄wen. Ke uwụtn̄kpọ, edieke okụk oro adade edep aranuwat awakde akan nte ekekerede, emekeme ndisio okụk emi ekenịmde ọnọ n̄kpọ emi mînen̄ekede idi akpan n̄kpọ, utọ nte udia-uwem.

  • Kûma ndibọ ebuọt. Edieke ekemede, kûbọ ebuọt. Utu ke oro, fam okụk nịm da dep se oyomde. Edieke anade ọbọ ebuọt, kụt ete ke omosio isọn oro mbemiso ọbọde en̄wen. Edieke edide amakama owo isọn, biere nte edisiode isọn oro nsịtnsịt tutu osio ama.

    Edieke owo esimade ndibọ ebuọt, enye ekeme ndisibiat okụk nte amama. Ntre, tịm kere kan̄a mbemiso akade ebuọt.

KÛNYENE MME EDU EMI EDISỊNDE FI KE MFỊNA

SE BIBLE ETỊN̄DE: “Ifu ifụn̄ke isọn̄ ke ini etuep; enye eyeben̄e n̄kpọ ke ini ukpen̄e, edi n̄kpọ ndomokiet ididụhe.”—Mme N̄ke 20:4.

 NSO KE EMI ỌWỌRỌ? Ndifu ifu esitiene anam owo ebuene. Ntre, sịn idem nam utom, kûnyụn̄ ubiat okụk ntịme ntịme man enyene se adade an̄wam idem ke ini iso.

SE AKPANAMDE:

  • Sịn idem nam utom. Edieke esịnde idem anam utom onyụn̄ enyenede ido, eteutom fo ayama fi, owo idinyụn̄ isọpke isio fi ke utom.

  • Di owo akpanikọ. Kûyịp n̄kpọ ke itieutom. Edieke eyịpde n̄kpọ, mbon en̄wen ẹyekop ndien oro ekeme ndinam owo imaha ndida fi ke utom.

  • Kûdiọk itọn̄. Edieke owo amade okụk, oro ekeme ndinam enye ọdọn̄ọ onyụn̄ anam mme ufan esie ẹkpọn̄ enye. Ti ke okụk idịghe kpukpru n̄kpọ.

MME N̄KPỌ EN̄WEN EMI BIBLE ETỊN̄DE

Kot Bible ke Intanet. Bible odu ke jw.org ke ediwak usem

KÛBIAT INI YE OKỤK UNAM N̄KPỌ EMI MÎNYENEKE UFỌN.

“Akpammịn ye ama-udia ẹyekabade ubuene, idap oyonyụn̄ esịne owo ntaha ọfọn̄.”—MME N̄KE 23:21.

KÛTỊMEDE ESỊT UBAN̄A OKỤK.

“Ẹtre nditịmede esịt mban̄a uwem mbufo ẹte ididia nso m̀mê idin̄wọn̄ nso, m̀mê ẹban̄a ikpọkidem mbufo ẹte idisịne nso.”—MATTHEW 6:25.

KÛSỊN ENYỊN KE N̄KPỌ OWO.

“Owo isịnenyịn obụmede ebịne mme ọsọn̄urua n̄kpọ, edi enye ifiọkke ite ke unana eyesịm imọ.”—MME N̄KE 28:22.