Be ka se isịnede

Be ka se isịnede

Ndidi Ufan Abasi

Ndidi Ufan Abasi

Nte ima iketetịn̄ ke akpa ibuotikọ magazine emi, ediwak owo ẹnịm ke Bible edi N̄wed Abasi. Mmọ ẹkụt ke ndikot Bible nnyụn̄ ndu uwem nte Abasi ọdọhọde anam mmọ ẹdi ufan Abasi ẹnyụn̄ ẹdiọn̄ọ se ẹdade uwem mmọ ẹnam.

Bible ọdọhọ ke mbon emi ẹnyenede spirit Abasi isidaha ikọ Abasi ibre mbre, ẹsinyụn̄ ẹdu uwem nte Abasi ọdọhọde. Edi ‘mbon emi mînyeneke spirit Abasi’ ẹsinam se esịt mmọ ọdọhọde ẹnyụn̄ ẹnam se ededi oro ọdọn̄de mmọ.—Jude 18, 19; Ephesus 5:⁠1.

IDOTENYỊN

SE BIBLE ETỊN̄DE: “Nte idem emem fi ke usen nnanenyịn? Odudu fo oyosụhọde.”—Mme N̄ke 24:10.

NSO KE EMI ỌWỌRỌ? Edieke idem ememde nnyịn, nnyịn idikemeke ndiyọ mme mfịna uwem emi. Edi iyenyene uko ika iso iyọ edieke inyenede idotenyịn. Edieke ifiọkde ke mfịna nnyịn edi ke ibio ini, oro ọyọdọn̄ nnyịn esịt. Ndusụk ini, eti n̄kpọ akam ekeme ndiwọrọ ke mfịna oro ikosobode.

SE AKPANAMDE: Kere ban̄a nti n̄kpọ emi ẹditịbede ke ini iso. Utu ke ndikere mban̄a se ikemede nditịbe m̀mê ndibet yak kpukpru n̄kpọ ọfọn ama, nam se ekemede. Imọfiọk ke n̄kpọ emi mûkodorike enyịn ekeme nditịbe. (Ecclesiastes 9:11) Edi ediwak ini, n̄kpọ isidiọkke nte nnyịn ikekerede. Ntak edi oro Bible ọdọhọde ete: “Suan n̄kpasịp fo ke usenubọk ndien kûyak ubọk fo ọduọk odudu tutu esịm mbubreyo; koro afo mûfiọkke ebiet oro emi edikụtde unen, edide mi m̀mê ko, m̀mê mmọ mbiba ẹdifọn ukem ukem.”—Ecclesiastes 11:6.

IBỌRỌ MBỤME EMI AFỊNADE ATA EDIWAK OWO

SE BIBLE ETỊN̄DE: “Ikọ fo edi akpanikọ.” —Psalm 119:160.

 NSO KE EMI ỌWỌRỌ? Bible ọbọrọ mbụme emi mme owo ke ofụri ererimbot ẹsiwakde ndibụp. Ke uwụtn̄kpọ, enye ọbọrọ utọ mbụme nte

  • Ntak emi Abasi okobotde nnyịn?

  • Ntak emi ibọde ufen ntem?

  • Nso isitịbe owo ama akpa?

  • Nso iditịbe ke ini iso?

Uwem enem ata ediwak owo ke ofụri ererimbot ke ntak emi mmọ ẹkụtde nte Bible ọbọrọde mme mbụme emi ye ediwak mbụme eken.

SE AKPANAMDE: Yom usụn̄ fiọk se Bible ekpepde. Emekeme ndidọhọ Ntiense Jehovah an̄wam fi ọfiọk se Bible ekpepde. Ka ikpehe Intanet nnyịn, jw.org, mîdịghe dụk mbono esop nnyịn. Nnyịn isibọhọ owo okụk, owo ekededi onyụn̄ ekeme ndidụk.

MME N̄KPỌ EN̄WEN EMI BIBLE ETỊN̄DE

Se vidio oro Ntak Emi Ekpekpepde Bible? ke jw.org. Vidio emi odu ke se ibede usem 880

DIỌN̄Ọ KE OMOYOM ABASI KE UWEM FO.

“Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.”—MATTHEW 5:3.

KPEP N̄KPỌ BAN̄A JEHOVAH ABASI.

‘Ẹyom Abasi ẹnyụn̄ ẹkụt enye sia enye iyomke usụn̄ ikpọn̄ nnyịn owo kiet kiet.’—UTOM 17:27.

KOT BIBLE NYỤN̄ TIE KERE SE OKOTDE.

“Ibet Jehovah adat enye esịt, enye onyụn̄ okot ibet esie ke nsụhọde-uyo uwemeyo ye okoneyo. . . . Enye oyonyụn̄ okụt unen ke kpukpru se enye anamde.”—PSALM 1:2, 3.