Be ka se isịnede

Be ka se isịnede

Se Ndusụk Owo Ẹnịmde

Se Ndusụk Owo Ẹnịmde

Mbon Hindu

ẹdọhọ ke owo esibọ ufen ke ntak idiọkn̄kpọ oro enye akanamde ke emana oko m̀mê idiọkn̄kpọ oro enye anamde ke uwem emi. Mmọ ẹdọhọ ke owo esitre ndibọ ufen ke ini enye esịmde moksha, oro edi, ifiakke imana aba ke ini enye akpade sia ama eketre ndikere n̄kpọ ererimbot.

Mbon Muslim

ẹdọhọ ke mme owo ẹsibọ ufen ke ntak idiọkn̄kpọ mmọ, mîdịghe ẹbọ ufen man ẹdomo mmọ ẹse m̀mê mmọ ẹnyene mbuọtidem. Akamba owo Muslim kiet emi ekerede Dr. Sayyid Syeed ọdọhọ ke ufen esinam iti ke akpana ika iso ikọm Abasi ke kpukpru se enye anamde ọnọ nnyịn inyụn̄ in̄wam mbon oro ẹyomde un̄wam.

Mme Jew

ẹdọhọ ke se owo anamde esinam enye ọbọ ufen. Ndusụk mmọ ẹnịm ke mme owo ẹyeset ke n̄kpa, ndien ke oro ebede, ẹyediọn̄ mbon emi ẹkebọde ufen ke unana ntak. Mme Jew emi ẹdide mbon Kabbalah ẹdọhọ ke owo ama akpa ke enye esifiak amana, ndien ke emi esinọ enye ifet ndisio isop idiọkn̄kpọ esie.

Mbon Buddha

ẹdọhọ ke owo esikpa afiak amana ediwak ini. Mmọ ẹdọhọ ke owo esika iso ọbọ ufen tutu enye etre ndikere nnyụn̄ nnam ndiọi n̄kpọ. Mmọ ẹnim ke edieke owo enyenede ọniọn̄, ekerede nti n̄kpọ, onyụn̄ anamde nti n̄kpọ, ke enye eyesịm nirvana, emi ufen ndomokiet mîdụhe.

 Mbon Confucius

ẹdọhọ ke ndudue ye idiọkn̄kpọ owo esinam owo ọbọ ufen. Mmọ ẹdọhọ ke kpa ye oro ndidu eti uwem ekemede ndinam owo okûnen̄ede ubọ ufen, ke enyene mme spirit emi ẹsọn̄de odudu ẹkan owo, emi ẹsiwakde ndinam mme owo ẹbọ ufen. Ntem, ke idụhe se owo ekemede ndinam mbọhọ ufen emi ẹkebierede ẹnịm ẹnọ enye.

Ndusụk mbon emi ẹkponode abasi obio mmọ

ẹdọhọ ke ifọt esinam mme owo ẹbọ ufen. Mmọ ẹdọhọ ke abia-ibọk ekeme ndinọ owo mfọniso mîdịghe anam owo ibak, ndien ke enyene nsio nsio n̄kpọ emi owo ekemede ndinam nda n̄kpeme idem. Ntre, mmọ ẹsikere ke abia-ibọk ndiwa n̄kpọ nnyụn̄ nnọ owo ibọk ekeme ndinam idem ọsọn̄ owo emi ifọt ọtọde udọn̄ọ.

Mme Christian

ẹdọhọ ke idiọkn̄kpọ akpa ete ye eka nnyịn anam ibọ ufen, nte Bible ọdọhọde ke n̄wed Genesis. Edi ediwak ufọkabasi ẹdian ekikere idemmọ ke mbụk Bible emi. Ke uwụtn̄kpọ, ndusụk mbon Catholic ẹdọhọ ke Abasi ekeme ndida ufen emi owo ọbọde ndiọn̄ ufọkabasi mîdịghe ada ufen oro anyan̄a owo en̄wen.