Be ka se isịnede

Be ka se isịnede

 UKPEPN̄KPỌ 1

Kpep Eyen Fo Ndisimụm Idem N̄kama

Kpep Eyen Fo Ndisimụm Idem N̄kama

NSO KE NDIMỤM IDEM N̄KAMA ỌWỌRỌ?

Owo emi omụmde idem akama

  • isinamke kpukpru n̄kpọ emi ọdọn̄de enye

  • isisọpke iyatesịt

  • esinam utom emi ẹnọde enye ọkpọkọm enye imaha utom oro

  • esikere aban̄a mbon en̄wen akan nte ekerede aban̄a idemesie

NTAK EMI ỌFỌNDE EKPEP EYEN FO NDISIMỤM IDEM N̄KAMA?

Edieke eyenọwọn̄ esimụmde idem akama ke n̄kpọ, enye ididuọhọ idụk idomo ọkpọkọm etie nte ekpenem enye ndinam n̄kpọ oro. Edi nditọwọn̄ emi mîsimụmke idem ikama ẹsiwak . . .

  • nditie ikọ ikọ

  • nditie mfụhọ mfụhọ

  • ndin̄wọn̄ sika, ndida n̄kpọsọn̄ ibọk, m̀mê ndikpa mmịn

  • ndidia udia emi mînọhọ owo n̄kpọ ke idem

Ndụn̄ọde kiet oro ẹkenamde owụt ke ediwak mbon emi ẹkesimụmde idem ẹkama ke ini mmọ ẹkedide nditọwọn̄ isisọpke idọn̄ọ, isibiatke okụk ntịme ntịme, isinyụn̄ ibiatke ibet. Ndụn̄ọde oro akanam Prọfesọ Angela Duckworth, emi odude ke ufọkn̄wed ntaifiọk ke Pennsylvania, ọdọhọ ke ndimụm idem n̄kama enyene ediwak ufọn.

NTE EKPEKPEPDE EYEN FO NDISIMỤM IDEM N̄KAMA

Kûnyịme kpukpru n̄kpọ.

SE BIBLE ETỊN̄DE: “Yak ikọ mbufo Ih edi Ih, Ihih mbufo edi Ihih.”—Matthew 5:37.

Eyenọwọn̄ ekeme nditọn̄ọ ntịme man ese m̀mê ete ye eka imọ ẹyenyịme imọ inam se mmọ ẹkedọhọde ikûnam. Edieke ete m̀mê eka ọduọde odụk afia emi, eyen oro ọyọfiọk ke imekeme ndinam ete m̀mê eka imọ enyịme se enye mîkenyịmeke akpa.

Edi edieke ete m̀mê eka ọdọhọde eyen esie okûnam n̄kpọ onyụn̄ ọsọn̄ọ ada ke se enye etịn̄de oro, eyen oro ọyọfiọk ke uwem itiehe nte imọ ikerede—ke nnyịn ikemeke ndinyene kpukpru se iyomde. Dr. David Walsh ọdọhọ ke ifọnke ndinam nditọ nnyịn ẹkere ke mmọ ẹkeme ndinyene se ededi oro mmọ ẹyomde. Enye ọkọdọhọ ke nditọ oro ẹnọde mmọ kpukpru se mmọ ẹyomde isikopke inemesịt nte nditọ oro ẹkpepde ndisimụm idem n̄kama. *

 Edieke mûnọhọ eyen fo kpukpru se enye oyomde idahaemi, enye eyekpep ndisimụm idem n̄kama ke ini enye okponde owo. Ke uwụtn̄kpọ, enye eyekeme ndimụm idem n̄kama ke ini ẹdọhọde enye ada n̄kpọsọn̄ ibọk, anam use, m̀mê anam n̄kpọ en̄wen emi ekemede ndifịna enye ye mbon en̄wen.

N̄wam eyen fo ọfiọk utịp n̄kpọ ekededi oro enye anamde, edide eti m̀mê idiọk.

SE BIBLE ETỊN̄DE: “Se ededi eke owo ọtọde, oro ke enye edinyụn̄ ọdọk.”—Galatia 6:7.

Oyom eyen fo ọfiọk ke se ededi emi owo anamde enyene utịp, ndien ke owo ọyọbọ utịp edieke enye mîsimụmke idem ikama ke n̄kpọ. Ke uwụtn̄kpọ, edieke eyen fo esiduọde obom ke ini ẹnamde se iyatde enye, mme owo ẹkeme nditre ndidian idem ye enye. Edi edieke enye ekpepde ndimụm idem n̄kama idem ke ini esịt ayatde enye—mîdịghe edieke enye enyenede ime ebet utu ke ndisịbe owo ikọ ke inua—mme owo ẹyema enye. N̄wam eyen fo ọfiọk ke ndimụm idem n̄kama enyene ediwak ufọn.

Kpep eyen fo ọfiọk se idide akpan n̄kpọ.

SE BIBLE ETỊN̄DE: ‘Fiọk se idide akpan n̄kpọ ikan.’ —Philippi 1:10.

Ndimụm idem n̄kama ikụreke ke nditre ndinam n̄kpọ emi mîfọnke, enye esịne n̄ko ndinam se anade owo anam ọkpọkọm inemke owo ndinam n̄kpọ oro. Ọfọn ekpep eyen fo se enye akpadade nte akpan n̄kpọ onyụn̄ an̄wam enye ọsọn̄ọ ada anam n̄kpọ oro. Nam eyen fo ebem iso anam se idide akpan n̄kpọ. Ke uwụtn̄kpọ, enye ekpenyene ndinam n̄kpọ ufọkn̄wed esie kan̄a mbemiso akade mbre.

Nịm eti uwụtn̄kpọ nọ enye.

SE BIBLE ETỊN̄DE: “N̄kenịm uwụtn̄kpọ nnọ mbufo, nte, kpa nte n̄kanamde ye mbufo, mbufo ẹkpenam kpa ntre.”—John 13:15.

Eyen fo oyokụt nte anamde n̄kpọ ke ini esịt ayatde fi. Nam enye okụt ke ọfọn ndisimụm idem n̄kama. Ke uwụtn̄kpọ, edieke eyen fo anamde se mîfọnke, ndi emesinen̄ede ayat esịt mîdịghe ndi emesimụm idem akama?

^ ikp. 20 Ẹda ẹto n̄wed oro No: Why Kids—of All Ages—Need to Hear It and Ways Parents Can Say It.