Be ka se isịnede

Be ka se isịnede

Nso utọ uwụtn̄kpọ ke afo enịm ọnọ eyen fo?

 ETE YE EKA

8: Ẹnịm Eti Uwụtn̄kpọ

8: Ẹnịm Eti Uwụtn̄kpọ

NSO KE EMI ỌWỌRỌ?

Mme ete ye eka emi ẹnịmde eti uwụtn̄kpọ ẹsinam se mmọ ẹdọhọde. Ke uwụtn̄kpọ, ukemeke ndikere ke eyen fo eyesitịn̄ akpanikọ edieke ọdọhọde enye ọdọhọ owo emi edide ediyom fi ke imọ idụhe ke ufọk ke ini edide afo mmọdo.

“Mme owo ẹsiwak ndidọhọ, ‘Nam se ndọhọde, kûnam se nnamde.’ Ifọnke ẹtịn̄ utọ ikọ oro ye nditọwọn̄ sia mmọ ẹtie nte kusa. Esidi ẹma ẹmen kusa ẹsịn ke mmọn̄, enye omụm mmọn̄, ẹmen ẹsịn ke aran, enye omụm aran. Kpasụk ntre, nditọwọn̄ ẹsikpebe se ededi oro mmọ ẹkụtde. Mmọ ẹyenyụn̄ ẹsio ẹtịn̄ edieke nnyịn mînamke se itịn̄de.”​—David.

SE BIBLE ETỊN̄DE: “Afo emi ọkwọrọde ete, ‘Kûyịp inọ,’ nte afo emeyịp inọ?”​—Rome 2:21.

NTAK EMI EDIDE AKPAN N̄KPỌ

Nditọwọn̄ ẹsikpebe ete ye eka mmọ ẹkan nte ẹkpebede mbon en̄wen, esịnede mme ufan mmọ. Emi ọwọrọ ke ete ye eka ẹkeme ndinen̄ede n̄n̄wam nditọ mmọ ẹdu eti uwem ẹnyụn̄ ẹnam nti n̄kpọ edieke mmọ ẹnịmde eti uwụtn̄kpọ ẹnọ mmọ.

“Imekeme nditịn̄ ikọ kiet ediwak ini inyụn̄ ikere ke nditọ nnyịn ikopke, edi ini kiet emi nnyịn mînamke se isitịn̄de, mmọ ẹsidọhọ nnyịn. Nditọwọn̄ ẹsikụt se inamde idem ke ini ikerede ke mmọ ikwe.”​—Nicole.

SE BIBLE ETỊN̄DE: “Ọniọn̄ eke otode enyọn̄ . . . isan̄ake ye mbubịk.”​—James 3:17.

SE AKPANAMDE

Kere se esinamde. Nso utọ fim ke afo esise? Esinam n̄kpọ didie ye ebe m̀mê n̄wan fo? Esinyụn̄ anam didie ye nditọ fo? Mmanie ẹdi mme ufan fo? Ndi emesikere aban̄a mbon en̄wen? Ke nditịn̄ ibio ibio, ndi emesinam se ọdọhọde nditọ fo ẹnam?

“Ami ye ebe mi isidọhọke nditọ nnyịn ẹnam n̄kpọ emi nnyịn ke idem nnyịn mîkemeke ndinam.”​—Christine.

Kpe ubọk ke ini anamde ndudue. Nditọ fo ẹdiọn̄ọ ke afo ufọnke uma. Edieke ekpede owo emi afo eduede ubọk, eyekpep nditọ fo ndisisụhọde idem nnyụn̄ nnyịme ndudue mmọ.

“Ọfọn isinam nditọ nnyịn ẹkop ini ikpede owo ubọk ẹnyụn̄ ẹkụt ke imenyịme ndudue nnyịn. Edieke nnyịn mînamke emi, mmọ idikpepke ndisinyịme ndudue mmọ.”​—Robin.

“Nditọ nnyịn ẹsinen̄ede ẹkpebe nnyịn mme ete ye eka mmọ, ntre ana inen̄ede ikpeme se inamde sia se mmọ ẹkụtde kpukpru ini edi oro. Uwụtn̄kpọ nnyịn etie nte n̄wed emi mmọ ẹkotde kpukpru ini.”​—Wendell.