Be ka se isịnede

Be ka se isịnede

Ndifen nnọ owo ayanam utọk etre, kpa nte ndiduọk mmọn̄ ke ikan̄ esinamde ikan̄ enịme

 EBE YE N̄WAN

4: Ẹfen Ẹnọ Kiet Eken

4: Ẹfen Ẹnọ Kiet Eken

NSO KE EMI ỌWỌRỌ?

Ndifen nnọ owo ọwọrọ ndifre mban̄a idiọk oro owo akanamde fi, usịnke enye ke esịt. Ndifen nnọ owo iwọrọke ke se enye akanamde idiọkke m̀mê ndinam nte ke enye ikanamke fi n̄kpọ ndomokiet.

SE BIBLE ETỊN̄DE: “Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye owo.”​—Colossae 3:13.

“Edieke amade owo, udutakke ke ndise ndudue esie. Utu ke oro, edise utọ owo emi enye odomode ndidi.”​—Aaron.

NTAK EMI EDIDE AKPAN N̄KPỌ

Nditre ndifen nnọ ebe m̀mê n̄wan fo ekeme ndinam okûkop inemesịt, anam ọdọn̄ọ, onyụn̄ akam ekeme ndibiat ndọ mbufo.

“Enyene ini emi ebe mi akanamde se inen̄erede ibiak mi. Enye ama ekpe mi ubọk, edi okosụk ọsọsọn̄ mi ndifen nnọ enye. Mma ndifen nnọ enye ke akpatre. Edi ama afịna mi nte mmen̄kọsọpke mfen nnọ enye sia esịt ikenemke nnyịn mbiba ofụri ini oro.”​—Julia.

SE AKPANAMDE

FIAK SE NTE ESINAMDE N̄KPỌ

Ini en̄wen emi ebe m̀mê n̄wan fo etịn̄de m̀mê anamde se ibiakde fi, bụp idemfo ete:

  • ‘Ndi mmesiyak n̄kpọ ọsọp ayat mi?’

  • ‘Ndi se enye akanamde oro okpon tutu edi se nyomde enye ekpe mi ubọk, mîdịghe ndi mmekeme ndifre mban̄a se iketịbede?’

NEME N̄KPỌ EMI YE EBE M̀MÊ N̄WAN FO

  • Esibịghi didie mbemiso nnyịn ifen inọ kiet eken?

  • Nso ke ikpanam man isisọp ifen inọ kiet eken?

NAM EMI ISE

  • Edieke ebe m̀mê n̄wan fo eduede fi, kûkere ke enye okokoi anam man abiak fi.

  • Ke ini ebe m̀mê n̄wan fo eduede fi, ti ke idụhe eke mîsinamke ndudue.​—James 3:2.

“Esimem utom ndifen nnọ kiet eken ke ini ikerede ke nnyịn mbiba idue. Edi esisọn̄ ke ini etiede nte ke owo kiet edue. Nsụhọdeidem esinam owo enyịme ke ini ẹkpede enye ubọk onyụn̄ efen ọnọ owo.”​—Kimberly.

SE BIBLE ETỊN̄DE: “Wara nam emem ye owo.”​—Matthew 5:25.

Nditre ndifen nnọ ebe m̀mê n̄wan fo ekeme ndinam okûkop inemesịt, anam ọdọn̄ọ, onyụn̄ akam ekeme ndibiat ndọ mbufo