Be ka se isịnede

Be ka se isịnede

Ndikop uyo ete ye eka fo etie nte ndikpe isọn oro akamade ban̄k. Ẹma ẹkụt ke emesikpe nte ọkọn̄wọn̄ọde, ẹyeka iso ẹnọ fi ebuọt

 MME UYEN

10: Di Owo Akpanikọ

10: Di Owo Akpanikọ

NSO KE EMI ỌWỌRỌ?

Mme owo ẹsinyene mbuọtidem ke idem owo emi edide owo akpanikọ. Mme ete ye eka, mme ufan, ye eteutom ẹsima utọ owo emi sia enye esinịm ibet, anam se enye ọkọn̄wọn̄ọde, onyụn̄ etịn̄ akpanikọ.

NTAK EMI EDIDE AKPAN N̄KPỌ

Ẹsiwak ndinọ owo ifụre ntiene utọ owo emi enye edide. Edieke ẹdiọn̄ọde owo nte owo akpanikọ, ẹsinen̄ede ẹberi edem ye enye.

“Edieke esinamde n̄kpọ nte ọdiọn̄ọ-idem-owo ke ini odude ye ete ye eka fo ye ke ini mûdụhe ye mmọ, mmọ ẹyesiyak fi anam ndusụk n̄kpọ ke idemfo sia ẹdiọn̄ọde ke ayanam se inende.”​—Sarahi.

SE BIBLE ETỊN̄DE: “Ẹka iso ẹwụt se mbufo ẹdide.”​—2 Corinth 13:5.

SE AKPANAMDE

Edieke oyomde ẹda fi nte owo akpanikọ kpukpru ini, nam mme n̄kpọ emi.

Sitịn̄ akpanikọ. Idụhe se isisọpde inam ẹtre ndibuọt idem ye owo nte ndisu nsu. Edi edieke esitịn̄de akpanikọ, akpan akpan ke ini anamde ndudue, mme owo ẹyesinịm se afo etịn̄de.

“Isisọn̄ke nditịn̄ akpanikọ ke ini mfịna mîdụhe. Edi edieke etịn̄de akpanikọ ke ini anamde ndudue, mme owo ẹyenyene mbuọtidem ke idemfo.”​—Caiman.

SE BIBLE ETỊN̄DE: “Nnyịn [iyom] ndinam akpanikọ ke kpukpru n̄kpọ.”​—Mme Hebrew 13:18.

Nam se ọkọdọhọde. Ke ndụn̄ọde kiet oro ẹkenamde ke United States, n̄kpọ nte owo 78 ke otu owo 100 ẹkedọhọ ke kiet ke otu n̄kpọ ita emi ẹsinamde ẹsọp ẹda owo ke utom edi edieke ẹdiọn̄ọde ke owo oro esinam se enye ọdọhọde. Edieke afo ekpepde ndisinam se ọn̄wọn̄ọde idahaemi, ayadia ufọn ke ini iso.

“Ete ye eka mi ẹsikụt ini nnamde n̄kpọ nte ọdiọn̄ọ-idem-owo, esịt esinyụn̄ enem mmọ ke ini nnamde se ẹkedọn̄de mi, ntiehe-tie mbet ẹtịn̄ ẹfiak ẹtịn̄. Ke ini n̄kade iso nnam emi, mmọ ẹsinyịme nnam ndusụk n̄kpọ ke idemmi.”​—Sarah.

SE BIBLE ETỊN̄DE: “Mmenyene mbuọtidem nte ayanam, sia mfiọkde ke afo ayakam anam akan se ndọhọde.”​—Philemon 21.

Nyene ime. Isisọn̄ke ndikụt ke eyenọwọn̄ ke ọkọri, edi esida ini mbemiso ẹkụtde ke enye ọtọn̄ọ ndidiọn̄ọ idem. Ntre, ọfọn enyene ime.

“Idịghe n̄kpọ kiet kpọt ke edinam man ete ye eka fo ye mbon en̄wen ẹkụt ke ọmọtọn̄ọ ndidiọn̄ọ idem. Edi ana aka iso anam nsio nsio n̄kpọ, ndien nte ini akade, mmọ ẹyekụt.”​—Brandon.

SE BIBLE ETỊN̄DE: ‘Ẹmen anyanime ẹsịne.’​—Colossae 3:12.