SE NDUSỤK OWO ẸDỌHỌDE

Mbon Rome ẹkekọn̄ Jesus ke cross emi ẹdade eto iba ẹnam.

SE BIBLE ỌDỌHỌDE

Ẹma “ẹkọn̄ [Jesus] ke eto ẹwot.” (Utom 10:39, Edisana ŋwed Abasi Ibom) Ikọ Greek oro mme andiwet Bible ẹkedade ẹtịn̄ ẹban̄a n̄kpọ emi ẹkewotde Jesus edi stau·rosʹ ye xyʹlon, ndien ikọ mbiba emi ẹwọrọ eto kiet, idịghe eto iba. N̄wed oro ẹkotde Crucifixion in Antiquity ọdọhọ ke ikọ Greek oro stau·rosʹ ọwọrọ “anyan eto” iwọrọke “cross.” Ikọ oro xyʹlon, emi odude ke Utom 5:30, edi ‘anyan eto emi mbon Rome ẹkesikọn̄de mbon oro mmọ ẹyomde ndiwot.’ *

Ibet oro Abasi ọkọnọde nditọ Israel ke eset ekeme ndinam nnyịn ifiọk nte ẹkewotde Jesus. Ibet oro ọkọdọhọ ete: “Edieke owo anamde idiọkn̄kpọ emi odotde n̄kpa, ndien ẹwot enye, afo onyụn̄ eyịri enye ke eto, . . . se ẹyịride ke eto edi n̄kpọ isụn̄i ọnọ Abasi.” (Deuteronomy 21:22, 23) Ke ini apostle Paul eketịn̄de aban̄a ibet oro, enye ọkọdọhọ ke Jesus ama akabade edi “n̄kpọ isụn̄i ke ibuot nnyịn, koro ẹwet ntem ẹte: ‘Owo eke ẹyịride ke eto [xyʹlon] edi n̄kpọ isụn̄i.’” (Galatia 3:13) Ikọ Paul ọwọrọ ke ẹkewot Jesus ke eto kiet, idịghe ke cross.

“Mmọ ẹkọn̄ enye ke eto ẹwot.”—Utom 10:39, Edisana ŋwed Abasi Ibom.

SE BIBLE ỌDỌHỌDE

Idụhe itie ndomokiet ke Bible emi ẹdọhọde ke akpa mme Christian ẹma ẹsikama cross ẹkpono Abasi. Edi mbon Rome eyo oro ẹkesikama cross nte idiọn̄ọ mme abasi mmọ. Ke isua 300 ama ekebe tọn̄ọ Jesus akakpa, akwa edidem Rome emi ekekerede Constantine ama anam cross akabade edi idiọn̄ọ mbonekọn̄ esie. Nte ini akade, mme aka ufọkabasi ẹma ẹtọn̄ọ nditiene n̄kama cross.

Sia mme okpono ndem ẹkesikamde cross ẹkpono mme abasi mmọ, ndi ọkpọkọfọn mme mbet Jesus ẹtiene ẹkama cross ẹkpono ata Abasi? Mme mbet Jesus ẹma ẹdiọn̄ọ ke toto ke eset ke Abasi ikenyịmeke ikọt esie ẹkama “mbiet ekededi” ẹtuak ibuot ẹnọ imọ. Mmọ ẹma ẹnyụn̄ ẹdiọn̄ọ ke ana mme Christian “ẹfehe ẹkpọn̄ ukpono ndem.” (Deuteronomy 4:15-19; 1 Corinth 10:14) “Abasi edi Spirit,” owo ndomokiet ikemeke ndikụt enye. Ntre, akpa mme Christian ikakamake idiọn̄ọ m̀mê mbiet ndomokiet ituak ibuot inọ Abasi. Utu ke oro, mmọ ẹketuak ibuot ẹnọ Abasi “ke spirit ye ke akpanikọ,” oro edi, ẹyak edisana spirit ada mmọ usụn̄ ẹnyụn̄ ẹnam se N̄wed Abasi ọdọhọde.—John 4:24.

‘Ata mme andituak ibuot ẹdituak ibuot inọ Ete ke spirit ye ke akpanikọ.’—John 4:23.

SE MME OWO ẸDỌHỌDE

‘Enen̄ede ọfọn onyụn̄ odot ndikpono n̄kpọ emi ẹkedade ẹnyan̄a nnyịn. . . . Owo emi okponode mbiet okpono enye emi mbiet oro adade aban̄a.’ —New Catholic Encyclopedia.

SE BIBLE ỌDỌHỌDE

Mme Christian ẹnen̄ede ẹma Jesus sia mmọ ẹdiọn̄ọ ke n̄kpa esie anam ẹfen idiọkn̄kpọ mmimọ, anam mmimọ ikpere Abasi, onyụn̄ anam mmimọ inyene idotenyịn ndidu uwem ke nsinsi. (John 3:16; Mme Hebrew 10:19-22) Edi Bible idọhọke mmọ ẹnam mbiet Jesus ẹkama man ẹwụt ke imama se enye akanamde ọnọ mmimọ m̀mê ndinyụn̄ ntetịn̄ kpọt ke imenịm Jesus ke akpanikọ. N̄wed Abasi ọdọhọ ete: “Mbuọtidem eke mîsan̄ake ye utom akpa.” (James 2:17) Ana mme Christian ẹnanam n̄kpọ ẹwụt ke imọbuọt idem ye Jesus. Nso ke mmọ ẹkpenam?

Bible ọdọhọ ete: “Ima Christ onụk nnyịn, koro ibiere ntem ite, owo kiet akakpa aban̄a kpukpru owo . . . man mbon oro ẹdude uwem ẹkûdu aba ẹnọ idemmọ, edi ẹdu ẹnọ enye emi akakpade ọnọ mmọ onyụn̄ esetde.” (2 Corinth 5:14, 15) Ana mme Christian ẹdu uwem nte Jesus okodude man ẹwụt ke imama se enye akanamde ọnọ mmimọ. Ndikpebe Jesus edi akakan usụn̄ oro mme Christian ẹkemede ndiwụt ke imokpono enye, idịghe ndinam mbiet esie n̄kama.

“Uduak Ete mi edi emi, ete kpukpru owo eke ẹkụtde Eyen ẹnyụn̄ ẹbuọtde idem ye enye ẹnyene nsinsi uwem.”—John 6:40.