Be ka se isịnede

Be ka se isịnede

Ke Ini Nditọwọn̄ Ẹfụhọde N̄kpa Owo Mmọ

Ke Ini Nditọwọn̄ Ẹfụhọde N̄kpa Owo Mmọ

Ndi ke ofụhọ n̄kpa owo fo? Edieke edide ntre, nso ikeme ndin̄wam fi? Yak ise nte Bible akan̄wamde uyen ita emi owo mmọ akakpade.

DAMI

Dami

Ke nsonso oro, eketie nte ekpri ibuot ọkọn̄ ete mi. Edi ke ini ubiak oro ekenen̄erede ọsọn̄ ubọk, eka mi ama okot moto ufọkibọk. Nsụk nteti nte mbon ufọkibọk ẹkemende ete mi ẹwọrọ. N̄kọdiọn̄ọke ke akpatre ini emi ndikụtde enye edi oro. Udọn̄ọ mfre ama owot enye usen ita ke oro ebede. N̄kedi isua itiokiet kpọt ini oro.

Ke ediwak isua, mma nsikere ke ami n̄ketiene nnam ete mi akpa. Mmesiwak nditi nte mbon ufọkibọk ẹkedide ẹdimen ete mi ẹwọrọ nnyụn̄ n̄kere ke akpakana nnam n̄kpọ utu ke ndidada nse. Ekesidi mma n̄kụt n̄kani owo emi idem mîsọn̄ke, mbụp idemmi nte: ‘N̄kọ mme owo ẹdọn̄ọ ẹsan̄a emi, nso ikanam ete mi akpa?’ Nte ini akade, eka mi ama anam emem mi utom nditịn̄ nte etiede mi ke idem. Ndien sia idide Mme Ntiense Jehovah, nditọete ke esop nnyịn ẹma ẹnen̄ede ẹn̄wam nnyịn.

Ndusụk owo ẹkere ke owo esifụhọ ndondo oro owo esie akpade, ekem etre ndifụhọ. Edi ikedịghe ntre ye ami. N̄kofụhọke ndondo oro ete mi akpade, edi n̄kọtọn̄ọ ndifụhọ ke ini n̄kesịmde n̄kpọ nte isua 14.

Ọfọn nditọwọn̄ emi ete m̀mê eka mmọ akpade ẹtịn̄ nte etiede mmọ ke idem ẹnọ owo. Ndibabak ntịn̄ nnọ owo ayan̄wam mmọ ẹkeme ndiyọ.

Ke ini nti n̄kpọ ẹtịbede ke uwem mi, esibiak mi nte ete mi mîdụhe ye ami itiene mi idara. Se Ediyarade 21:4 etịn̄de esinen̄ede ọdọn̄ mi esịt. Itien̄wed oro ọdọhọ ke ibịghike Abasi ‘ọyọkwọhọde kpukpru mmọn̄eyet ke enyịn nnyịn efep, ke n̄kpa ididụhe aba, mfụhọ m̀mê ntuan̄a m̀mê ubiak idinyụn̄ idụhe aba.’

DERRICK

Derrick

Ke nteti nte n̄kesitienede ete mi n̄kọkọ iyak nnyụn̄ ndọk obot. Ama esinem mi tutu. Ete mi ama esinen̄ede ama ndidọk obot.

Mmeti ke ete mi ama enyene udọn̄ọ esịt, ndien mma n̄ka ufọkibọk n̄kese enye ke ini n̄kedide eyenọwọn̄. Edi n̄kọdiọn̄ọke ke udọn̄ọ emi ayada enye ibuot. Enye akakpa ke ini ndide isua usụkkiet kpọt.

Mma ntua nte nyom ndikpakpa. N̄koyomke nditịn̄ ikọ ye owo ndomokiet, ikonyụn̄ idọn̄ke mi ndinam n̄kpọ ndomokiet. Akanam itiehe mi ntre ke idem. Mma ntiene ndụk n̄ka n̄kparawa ke ufọkabasi nnyịn. Ntre ndusụk n̄kparawa oro ikodude ntre ke n̄ka oro ẹma ẹsidi ẹdise mi ke nsonso oro, edi ekem ẹtre ndidi. Ndusụk mbon ufọkabasi nnyịn ẹma ẹsidọhọ mi ke ini emi Abasi ekenịmde ọnọ  ete mi ndikpa edi oro, ndusụk ẹdọhọ ke Abasi okot enye, mbon eken ẹdọhọ ke enye odu ke heaven. Se mmọ ẹketịn̄de oro ikọdọn̄ke mi esịt, n̄konyụn̄ mfiọkke m̀mê se Bible etịn̄de edi oro.

Nte ini akade, eka mi ama ọtọn̄ọ ndikpep Bible ye Mme Ntiense Jehovah, ekem ami ye eyeneka mi ima itiene ikpep. Ima ikpep se isitịbede ke ini owo akpade ye nte ke Abasi ọn̄wọn̄ọ ndinam mme akpan̄kpa ẹset. (John 5:28, 29) Edi itie N̄wed Abasi oro ekenen̄erede ọdọn̄ mi esịt edi Isaiah 41:10, emi Jehovah ọdọhọde ete: “Kûkop ndịk, koro ami ndude ye afo. Kûwụk enyịn use, koro ami ndide Abasi fo. Ami nyọsọn̄ọ fi idem. Ami nditreke ndin̄wam fi.” Ndifiọk ke Jehovah do ye ami ama enen̄ede ọdọn̄ mi esịt ke ini n̄kofụhọde. Ndien se isụk idọn̄de mi esịt edi oro.

JEANNIE

Jeannie

Ke ini n̄kedide isua itiaba, kansa ama owot eka mi. Eketie mi nte n̄kpọ ndap. Ke nteti se iketịbede usen oro. Eka mi akakpa ke ufọk ndien ete ye eka esie ẹma ẹtiene ẹdu ke ini enye akpade. Owo ndomokiet ikosioho n̄kpo. Mmeti ke ikata nsenunen mbubreyo usen oro. Ibuot ama oyon̄ mi. Eketie nte okịm okụre.

N̄kekere ke ana mmụm idem n̄kama man n̄keme ndin̄wam ekpri eyeneka mi. Ntre n̄kanam nte ke se itịbede oro inen̄ekede ifịna mi. Tutu esịm emi, esidi n̄kpọ ama etịbe, ami nyakke mme owo ẹdiọn̄ọ ke se itịbede oro enen̄ede afịna mi, edi mmọdiọn̄ọ ke ndinam ntre ifọnke ye ami.

Ke nteti nte nditọete ke esop ẹken̄wamde nnyịn. Kpa ye oro mîkebịghike ikọtọn̄ọ ndidụk mbono esop Mme Ntiense Jehovah, nditọete ẹma ẹsidi ẹdise nnyịn nte n̄kpọ eke ẹdọhọde ke ebịghi ikọtọn̄ọ ndidụk mbono esop mmọ. Ntịghi nte ete mi eketemde udia ọnọ nnyịn mbubreyo ndomokiet ke ofụri isua kiet sia mme owo ẹma ẹsida udia ẹsọk nnyịn.

Itien̄wed kiet oro esiwakde ndidụk mi esịt edi Psalm 25:16, 17. Andiwet Psalm emi ama ekpe Abasi ubọk ete: “Wọn̄ọde iso se mi, nyụn̄ tua mi mbọm; koro ami ndide ikpọn̄ nnyụn̄ ndude ke ukụt. Mfụhọ esịt mi omokpon; mbọk sio mi ke nnanenyịn emi esịmde mi.” Ndifiọk ke Abasi do ye ami ama enen̄ede ọdọn̄ mi esịt ke ini n̄kofụhọde. Se n̄kpepde ke Bible iyakke mfụhọ emen mi emen, onyụn̄ anam ntie n̄kere nti n̄kpọ, utọ nte un̄wọn̄ọ Abasi ndinam mme akpan̄kpa ẹset. Mmenịm ke nyafiak n̄kụt eka mi ke Paradise ke ini idem edisọn̄de enye.2 Peter 3:13.

Ndi ayama ndifiọk n̄kpọ en̄wen emi Bible etịn̄de, emi ọdọn̄de mbon oro ẹfụhọde esịt? Mbọk ka www.jw.org/efi kosio ediye ekpri n̄wed emi ẹkotde “Ke Ini Owo Oro Afo Amade Akpade.” Se ke ebiet emi okụtde: SE ẸDỌN̄DE > MME N̄WED YE NDIYE N̄KPRI N̄WED.