Be ka se isịnede

Be ka se isịnede

 NTE MMỌ ẸKEKANDE MFỊNA EMI

Mbụk Ricardo ye Andres

Mbụk Ricardo ye Andres

Ndikpep Bible ekeme ndinam owo okpụhọde odu eti uwem. Yak ineme iban̄a owo iba emi Bible akanamde ẹkpụhọde: Ricardo ye Andres.

RICARDO: Ke ini n̄kedide isua 15 kpọt, mma ndụk n̄ka nditọ-inọ. Mmọ ẹma ẹbiat mi ẹka anyan. Ama ọdọn̄ mi ndika n̄kpọkọbi isua duop. Owo ekeme ndikere ke etie nte ibuot ikọfọnke mi. Edi mme owo ke edem nnyịn ẹma ẹsikpono ẹnyụn̄ ẹbak mbon emi ẹkekade n̄kpọkọbi. N̄koyom ẹbak mi ntre n̄ko.

Mma nnam kpukpru se nditọ-inọ ẹsinamde, utọ nte ndida n̄kpọsọn̄ ibọk, ndidu oburobụt uwem, ye ndinam afai. Okoneyo usen kiet, ima ikụt nditọ-inọ en̄wen ke efak inyụn̄ itọn̄ọ nditop kiet eken ke ikan̄. N̄kekere ke ẹmọn̄ ẹwot mi, edi mma mfehe mbọhọ. Ekem, mma nsụhọde ntie n̄kere utọ uwem emi ndude ye se nyomde ndinam. Mma mbiere ke mmọn̄ n̄kpụhọde. Edi n̄kọfiọkke nte nditọn̄ọde.

Ediwak iman nnyịn ẹma ẹnyene ediwak mfịna. Mmọ ikokopke inemesịt. Edi eyeneka eka mi ye ubon esie ẹma ẹnen̄ede ẹkop inemesịt. Mma ndiọn̄ọ ke mmọ ẹdi nti owo, ke ẹnyụn̄ ẹdu uwem nte Bible ọdọhọde. Enyene ini emi mmọ ẹkekpepde mi ke Abasi ekere Jehovah. Ntre, ke mma n̄kọbọhọ n̄kpa usen oro ikan̄wanade ye n̄ka nditọ-inọ en̄wen, mma mbọn̄ akam n̄kot Jehovah ke enyịn̄ nte an̄wam mi. Idem ama akpa mi ndikụt Ntiense Jehovah ọkọn̄de usụn̄ ufọk mi edem usen oro. Enye ama ọtọn̄ọ ndikpep mi Bible.

Edi ikememke ye ami. N̄kani ufan mi ẹma ẹsikot mi ke fon ẹte ndi iwọrọ, edi n̄kenyịmeke. Mma mbiere ndika iso n̄kpep Bible. Uwem mi ama enen̄ede okpụhọde, esịt onyụn̄ enem mi.

Mmeti nte n̄kọdọhọde Abasi ke nyom ndika n̄kpọkọbi isua duop man ẹbak mi nte ẹsibakde nditọ-inọ. Edi ke mma n̄kekpep Bible, mma mben̄e Abasi an̄wam mi n̄kwọrọ ikọ ofụri ini ke isua duop ke nsụhọde n̄kaha man n̄n̄wam mbon en̄wen nte ẹken̄wamde mi. Abasi ọbọrọ akam mi sia mmọkwọrọ ikọ ofụri ini idahaemi ke isua 17.

Ediwak mbon oro ẹkedide ufan mi ẹdu ke ufọk-n̄kpọkọbi ke ediwak isua. Ndusụk mmọ ẹkpan̄a. Esịt enem mi nte n̄kenyenede iman emi ẹdide Mme Ntiense Jehovah. Mmọ ẹma ẹnyịme ndidu uwem nte Bible ọdọhọde utu ke ndidu nte mbon ererimbot. Mmokpono mmọ n̄kan nte n̄kesikponode mbon n̄ka nnyịn. Mmenen̄ede n̄kọm Abasi ke enye ndikpep mi ndidu eti uwem.

 ANDRES: N̄kamana ke obio emi mme owo mînyeneke n̄kpọ, do ke n̄konyụn̄ n̄kpon. Mbon obio nnyịn ẹma ẹsida n̄kpọsọn̄ ibọk, ẹyịp inọ, ẹwot owo, ẹnyụn̄ ẹsan̄a akpara. Ete mi ekedi n̄wọn̄-kpa, cocaine ama onyụn̄ adia enye idem. Enye ye eka mi ẹkesin̄wana kpukpru ini ẹnyụn̄ ẹtọk kiet eken.

Mma ntọn̄ọ ndisin̄wọn̄ ọkpọsọn̄ mmịn nnyụn̄ nda n̄kpọsọn̄ ibọk ke ini n̄kedide ekpri. N̄kesidodụn̄ ke efak man nyịp n̄kpọ nnyụn̄ nnyam se nyịpde. Nte ini akakade, ete mi ama oyom ndikot mi ndian idem, edi enye akanam emi ke idiọk usụn̄. Enye ama ekpep mi ndidịbe nda n̄kpọsọn̄ ibọk ye mme n̄kpọmbet ndụk idụt nnyịn ndinyam. Mma nsọsọp nnyene ediwak okụk. Usen kiet mme bodisi ẹma ẹdi ufọk mi ẹdimụm mi. Ẹma ẹbiere n̄kpọkọbi isua ition ẹnọ mi sia ẹkedọhọ ke mma nyom ndiwot owo.

Usenubọk usen kiet, ẹma ẹkot mbon n̄kpọkọbi ẹte ẹdikop ukwọrọikọ Mme Ntiense Jehovah. Mma ntiene n̄ka. Se n̄kokopde ama enem mi tutu nnyịme ndikpep Bible ye mmọ. Mmọ ikasiakke mmọn̄ ke Ikọ Abasi, edi ẹma ẹtịn̄ nnennen se Abasi amade ye se enye asuade.

Mma ndikụt ke ndikemeke ndikpụhọde ke odudu idemmi sia mbon n̄kpọkọbi eken oro mîkamaha nte n̄kpepde Bible ẹma ẹtọn̄ọ ndidịghe mi uwem. Ntre mma mbọn̄ akam mben̄e Jehovah an̄wam mi, Jehovah ama onyụn̄ an̄wam mi. Mma n̄kam n̄keme ndikwọrọ ikọ nnọ mbon n̄kpọkọbi oro.

Ke ini ẹkedọhọde ke isua n̄kpọkọbi mi okụre, esịt ama ọduọ mi sia n̄koyomke ndinyọn̄. Usen oro n̄kọnyọn̄de, ediwak mbon n̄kpọkọbi oro ẹma ẹfụn̄ ubọk ẹnọ mi. Ndusụk mmọ ẹma ẹkọm mi ẹnyụn̄ ẹdọhọ: “Ekpri pastọ, san̄a sụn̄-o.”

Mmesikere nte uwem mi ekpetiede ekpedi n̄kekpepke Bible. Esịt enen̄ede enem mi ndifiọk ke Abasi ama mi, ke enye ikonyụn̄ ikereke ke ndikpụhọkede. *

^ ikp. 15 Uwụtn̄kpọ mbon en̄wen oro Bible okokpụhọrede uwem mmọ odu ke jw.org/efi. Ka SE BIBLE EKPEPDE > IFỤRE YE INEMESỊT.