Be ka se isịnede

Be ka se isịnede

 SE AKPANAMDE MAN OKOP INEMESỊT

Yụhọ ye Se Enyenede Nyụn̄ Nọ Owo N̄kpọ

Yụhọ ye Se Enyenede Nyụn̄ Nọ Owo N̄kpọ

NDI EMESIKOP ẸDỌHỌDE KE NDINYENE EDIWAK OKỤK M̀MÊ INYENE ESINAM OWO OKOP INEMESỊT? Ata ediwak mbon emi ẹkerede ke okụk m̀mê inyene esinam owo okop inemesịt ẹsisịn ibuot ẹsịn itọn̄ ẹnam utom man ẹnyene ediwak okụk. Edi, ndi okụk ye inyene ẹkeme ndinam owo okop ata inemesịt? Yak ise ise.

N̄wed emi ẹkotde Journal of Happiness Studies ọdọhọ ke owo ama enyenyene udia, ọfọn̄, ye ebiet emi enye odụn̄de, ke okụk ekededi emi enye enyenede adian do idinamke enye enen̄ede okop inemesịt. Edi idịghe okụk esinam owo okûkop inemesịt. N̄wed emi ẹkotde Monitor on Psychology ọdọhọ ke ndisịn ibuot nsịn itọn̄ nyom okụk esinam owo okûkop inemesịt. Se n̄wed emi etịn̄de aka nditie nte se ẹma ẹkewewet ke Bible n̄kpọ nte isua tọsịn iba emi ekebede, ẹte: “Ima okụk edi orụn̄ kpukpru orụk idiọkn̄kpọ, ndien ke edinyanade mbịne ima emi, ndusụk owo . . . ẹda ediwak ubiak ẹnọmọ idemmọ.” (1 Timothy 6:​9, 10) Nso idi ndusụk ubiak emi?

EDITỊMEDE ESỊT YE NDITABA IDAP N̄KPEME INYENE. “Idap owo emi asan̄ade utom enenem, inamke n̄kpọ m̀mê enye adia esisịt m̀mê adia ediwak; edi uwak n̄kpọ emi owo inyene enyenede iyakke enye ede idap.”​​—Ecclesiastes 5:12.

MFỤHỌ ORO ẸKOPDE SIA N̄KPỌ MÎTIEHE NTE ẸKEKEREDE. Se isinamde emi etịbe edi ke okụk isiyụhọke owo. Bible ọdọhọ ete: “Owo emi amade silver idiyụhọke ye silver, okụk inyụn̄ iyụhọke owo emi amade inyene. Emi n̄ko edi ikpîkpu.” (Ecclesiastes 5:10) N̄ko, owo emi enen̄erede oyom inyene ekeme ndida ini emi enye okpodude ye mme ufan ye mbonubon esie m̀mê ini emi enye akpadade anam n̄kpọ Abasi, an̄wana okụk.

UBIAK ORO ẸKOPDE KE INI OKỤK M̀MÊ MBUBEHE ATAHAREDE. “Kûkpa utom ndikọ inyene. Tre ndise idemfo ke asian. Nte afo omotop enyịn ese enye, ke ini enye mîdịghe n̄kpọ ndomokiet? Koro enye iditreke nditịbe mba nte ntrukpom ndien efe ọdọk enyọn̄.”​​—Mme N̄ke 23:​4, 5.

 NDUSỤK N̄KPỌ ORO ẸSINAMDE OWO OKOP INEMESỊT

NDIYỤHỌ YE SE OWO ENYENEDE. “Nnyịn ikadaha baba n̄kpọ kiet idụk ererimbot, idinyụn̄ ikemeke ndida baba n̄kpọ kiet n̄wọrọ. Ntre, ke inyenede se idiade ye se isịnede ye itie udakibuot, nnyịn iyoyụhọ ye mme n̄kpọ emi.” (1 Timothy 6:​7, 8) Mbon emi ẹsiyụhọde ye se mmọ ẹnyenede isitiehe iseme idem iban̄a se mmọ mînyeneke, isinyụn̄ isịnke enyịn ke n̄kpọ owo. N̄ko, sia mmọ mîsinyanakede ibịne n̄kpọ emi ubọk mmọ mîsịmeke, mmọ isitịmekede esịt.

NDISINỌ OWO N̄KPỌ. “Inemesịt odu ke ndinọnọ akan ke ndibọbọ.” (Utom 20:35) Mbon oro ẹsinọde owo n̄kpọ ẹsikop inemesịt sia esinenem mmọ ndinam esịt enem mbon en̄wen, idem ọkpọkọm mmọ ẹbiat ekpri ini ye owo m̀mê ẹnam ekpri n̄kpọ ẹnọ owo. Emi esinam ẹkpono ẹnyụn̄ ẹma mmọ. Mmọ ẹsinyene nti ufan, ndien mme ufan emi ẹsifọn ido n̄ko ye mmọ. Idụhe se ifọnde ntem sia owo isidaha okụk idep ima, ukpono, ye nti ufan!​​—Luke 6:38.

NDIMA MME OWO N̄KAN INYENE. “Ikọn̄ eke ẹdiade ke ebiet emi ima odude ọfọn akan isek isek enan̄ eke ẹtade ye usua ke esịt.” (Mme N̄ke 15:17) Nso ke itien̄wed emi ekpep nnyịn? Ndinyene nti ufan ọfọn akan ndinyene inyene. Ndien nte ẹwụtde ke ibuotikọ en̄wen ke magazine emi, ndima mme owo esinam owo enen̄ede okop inemesịt.

Sabina, emi odude ke South America, ama okụt ke ọfọn ndinam item Bible. Ebe esie ama ọkpọn̄ enye, ntre ikememke inọ enye ndise mban̄a idemesie ye nditọ esie iba. Sabina ekesinam utom iba, ntre enye ekesidemede n̄kanika inan̄ usenubọk. Kpa ye oro n̄kpọ ọkọsọn̄de ye Sabina, enye ama ebiere ndikpep Bible. Nso iketịbe?

Bible ọdọhọ ke “mme utom ọniọn̄ ẹwụt ke ọniọn̄ enen.” (Matthew 11:19) Edieke ekerede aban̄a ufọn oro edidiade, oyokụt ke ọfọn ndiyụhọ ye se enyenede, ndisinọ owo n̄kpọ, ndinyụn̄ mma mme owo n̄kan inyene.