Be ka se isịnede

Be ka se isịnede

“Ama Enem Nnyịn Ndikụt Utọ Ima Oro”

“Ama Enem Nnyịn Ndikụt Utọ Ima Oro”

KE Saturday, April 25, 2015, ata akamba unyekisọn̄ ama etịbe ke Nepal. Idụt emi odu ekpere India, ndien Kathmandu edi ibuot obio Nepal. To Kathmandu sịm ebiet emi unyekisọn̄ oro eketịbede edi n̄kpọ nte itiat 50. Se ibede owo 8,500 ẹma ẹkpa. Akanam unyekisọn̄ iwotke owo awak ntem ke Nepal. Unyekisọn̄ emi ama abiat se ibede ufọk 500,000. Mme Ntiense Jehovah 2,200 ẹdu ke Nepal, ndien ata ediwak mmọ ẹdụn̄ ke ebiet emi unyekisọn̄ oro eketịbede. Edi n̄kpọ mbọm nditịn̄ ke Ntiense kiet ye nditọ esie iba ẹma ẹkpa.

Ntiense kiet emi ekerede Michelle ọkọdọhọ ete: “Unyekisọn̄ oro eketịbe ke ini emi ediwak esop Mme Ntiense Jehovah do ẹkenyenede mbono esop. Edieke ekpeketịbede ke ini ediwak mmọ ẹkedude ke ufọk, ekeme ndidi ẹkpekekpa ẹwak.” Nso ikanam mbon emi ẹkedude ke Ufọkmbono Obio Ubọn̄ ẹkûtiene ẹkpa? Etiene nte ẹbọpde Ufọkmbono Obio Ubọn̄.

“IDAHAEMI NDIEN KE IDIKỤT UFỌN!”

Ẹbọp mme Ufọkmbono Obio Ubọn̄ ke Nepal ke usụn̄ emi unyekisọn̄ mîkemeke ndiwụri. Man Bahadur emi esitienede ọbọp Ufọkmbono Obio Ubọn̄ ọdọhọ ete: “Mme owo ẹsibụp nnyịn m̀mê nso inam isịn utọ itiat idakisọn̄ oro inọ ekpri ufọk oro ibọpde. Idahaemi ndien ke idikụt ufọn!” Ke unyekisọn̄ oro ama eketịbe, ẹma ẹnyịme mme owo ẹka ẹkedu ke Ufọkmbono Obio Ubọn̄. Kpa ye oro isọn̄ okosụk enyekde sụn̄sụn̄, idem ikenyekke Mme Ntiense Jehovah ye mme mbọhọidụn̄ mmọ emi ẹkedude ke Ufọkmbono Obio Ubọn̄.

Mme Ntiense Jehovah ye mbọhọidụn̄ mmọ ẹma ẹka ẹkedu ke mme Ufọkmbono Obio Ubọn̄

Mbiowo ẹma ẹsọsọp ẹtọn̄ọ ndiyom nditọete emi owo mîkekwe. Ntiense kiet emi ekerede Babita ọkọdọhọ ete: “Mbiowo ẹma ẹnen̄ede ẹkere ẹban̄a nditọete ke esop ẹkan nte ẹkerede ẹban̄a idemmọ. Ama enem nnyịn ndikụt utọ ima oro.” Edem usen oro unyekisọn̄ emi eketịbede, nditọete ita oro ẹsịnede ke kọmiti emi ẹsede ẹban̄a utom Mme Ntiense Jehovah ke Nepal ẹma ẹsan̄a ye mme esenyịn circuit ẹse mme esop man ẹse se nditọete ke esop kiet kiet ẹyomde ẹnyụn̄ ẹse nte ẹkpen̄wamde mbiowo mmọ.

Gary Breaux ama oto ibuot itieutom Mme Ntiense Jehovah edise nditọete emi

Usen itiokiet ke unyekisọn̄ oro ama eketịbe, Gary Breaux ye Ruby an̄wan esie ẹma ẹto ibuot itieutom nnyịn ke United States ẹdi Nepal. Reuben emi esịnede ke kọmiti emi ẹsede ẹban̄a utom Mme Ntiense Jehovah ke Nepal ọkọdọhọ ete: “Sia ndutịme okodude ke Kathmandu, isọn̄ okonyụn̄ akade iso enyek sụn̄sụn̄, nnyịn ikọdiọn̄ọke m̀mê Brọda Breaux oyosụk ekeme ndidi do aba. Edi enye ama osụk edi kpa ye ofụri se iketịbede. Nditọete ẹma ẹnen̄ede ẹnem esịt ndikụt enye.”

“IMA INEN̄EDE IDIANA KIET YE NDITỌETE NNYỊN IKAN NTE IKESIDIANADE”

Silas emi anamde utom ke ọfis Mme Ntiense Jehovah ke Nepal ọkọdọhọ ete: “Ndondo oro fon nnyịn akafiakde ọfọn, mme owo ẹma ẹkot okoneyo ye uwemeyo. Nditọete nnyịn ke nsio nsio itie ke ererimbot ẹma ẹkot ẹbụp nte n̄kpọ etiede ye nnyịn. Kpa ye oro ndusụk mmọ ẹkesemde usem oro nnyịn mîfiọkke, ima idiọn̄ọ ke mmọ ẹnen̄ede ẹma nnyịn ẹnyụn̄ ẹyom ndin̄wam nnyịn.”

Mme Ntiense emi ẹdide mme dọkta ẹma ẹto Europe ẹdise mme owo idem

 Nditọete nnyịn ke Nepal ẹma ẹsimen udia ẹdi Ufọkmbono Obio Ubọn̄ ẹdinọ mbon emi ẹdude do. Mmọ ẹma ẹnam emi ke ediwak usen. Ẹma ẹnyụn̄ ẹtọn̄ọ Kọmiti Unọ Un̄wam ke Ini Afanikọn̄, ndien ikebịghike, nditọete nnyịn ke Bangladesh, India, Japan, ye mme idụt en̄wen ẹma ẹtọn̄ọ ndinọ n̄kpọ ẹsọk nnyịn. Ke ufan̄ usen ifan̄, Mme Ntiense emi ẹdide mme dọkta ẹma ẹto Europe ẹdi ẹdidu ke Ufọkmbono Obio Ubọn̄ kiet do. Mmọ ẹma ẹsọsọp ẹtọn̄ọ ndise mme owo idem ẹnyụn̄ ẹnam n̄kpọ man mmọ ẹkûkop ndịk aba.

Ntiense kiet emi ekerede Uttara onyụn̄ etịn̄ se ediwak Ntiense eken ẹkpetịn̄de ete: “Unyekisọn̄ emi ama enyene ndịk onyụn̄ oyomo owo nsia. Edi ke oro ebede, ima inen̄ede idiana kiet ye nditọete nnyịn ikan nte ikesidianade.” Unyekisọn̄ oro ikanamke ikọt Jehovah ẹtre ndima Jehovah ye nditọete mmọ nte ẹkesimade. Utu ke oro, enye akakam ananam ima oro etetịm ọsọn̄ odudu.