Utom 7;1-60
7 Edi akwa oku obụp ete: “Nte mme n̄kpọ emi ẹdi ntre?”
2 Enye ọdọhọ ete: “Nditọete ye mme ete, ẹkpan̄ utọn̄. Abasi emi enyenede ubọn̄+ ama owụt ete ete nnyịn, Abraham, idem ke adan̄aemi enye okodude ke Mesopotamia, mbemiso enye akakade okodụn̄ ke Haran,+
3 onyụn̄ ọdọhọ enye ete, ‘Wọrọ kpọn̄ isọn̄ fo ye iman fo nyụn̄ di ke isọn̄ oro ndiwụtde fi.’+
4 Ekem enye ọwọrọ ke isọn̄ mbon Chaldea edidụn̄ ke Haran. Ndien ke ete esie ama akakpa+ do, Abasi anam enye okpụhọ ebietidụn̄ esie edi ke isọn̄ emi mbufo ẹdụn̄de ke esịt ke emi.+
5 Edi Abasi ikọnọhọ enye udeme ke esịt, ndomo ikpat kiet;+ edi ọn̄wọn̄ọ ndida nnọ enye nte inyene,+ ye mfri+ esie emi editienede enye ke edem, ke adan̄aemi enye mîkenyeneke kan̄a eyen.+
6 Akan oro, Abasi ama etịn̄ aban̄a emi, ete ke mfri esie eyedi esenowo+ ke esen idụt,+ mmọ oro ẹyenyụn̄ ẹsịn mmọ ke ufụn ẹnyụn̄ ẹfịk mmọ ke isua ikie inan̄.+
7 Abasi onyụn̄ ọdọhọ ete: ‘Ndien nyekpe ikpe+ ye idụt oro mmọ ẹdidụkde ufụn ẹnọ, ndien ke mme n̄kpọ emi ẹma ẹkebe mmọ ẹyewọrọ ẹdinam edisana utom ẹnọ mi ke ebiet emi.’+
8 “Enye n̄ko ama ọnọ enye ediomi mbobi;+ ntem ndien ke enye okobon Isaac+ onyụn̄ enịm enye mbobi ke ọyọhọ usen itiaita,+ Isaac obon Jacob, Jacob onyụn̄ obon mme ete ubon duopeba.+
9 Ndien mme ete ubon ẹfịbe Joseph ufụp+ ẹnyụn̄ ẹnyam enye ẹnọ aka Egypt.+ Edi Abasi odu ye enye,+
10 onyụn̄ anyan̄a enye osio ke kpukpru ukụt esie onyụn̄ owụt enye mfọn onyụn̄ ọnọ enye ọniọn̄ ke iso Pharaoh edidem Egypt. Ndien enye emek enye ete akara Egypt ye ofụri ufọk esie.+
11 Edi akan̄ odụk ofụri Egypt ye Canaan, kpa akwa ukụt; ndien mme ete ete nnyịn ikwe udia.+
12 Edi Jacob okop ete udia odu ke Egypt+ ndien enye osio mme ete ete nnyịn ọdọn̄ ẹka ke akpa ini.+
13 Ndien ke ọyọhọ utịm ikaba Joseph ayarade idem ọnọ nditọete esie;+ ndien Pharaoh ọdiọn̄ọ aban̄a ekpụk Joseph.+
14 Ntre Joseph ọdọn̄ ẹkeda Jacob ete esie ye kpukpru iman esie ẹwọrọ ke ebiet oro,+ ndien ibat mmọ edi ukpọn̄ ata ye efịt.+
15 Jacob osụhọde aka Egypt.+ Ndien enye akpa;+ kpa ntre n̄ko ye mme ete ete nnyịn,+
16 ndien ẹmen mmọ ẹnyọn̄ Shechem+ ẹnyụn̄ ẹdibụk ke udi+ oro Abraham akadade okụk silver edep oto nditọ Hamor ke Shechem.+
17 “Nte ini akasan̄ade ekpere un̄wọn̄ọ oro Abasi eketịn̄de in̄wan̄-in̄wan̄ ọnọ Abraham ndisu, mbio oro ẹtọt ẹnyụn̄ ẹwak ke Egypt,+
18 tutu esịm ini emi edidem efen, emi mîkọfiọkke Joseph,+ adahade ada ke Egypt.
19 Owo emi anam n̄kpọ n̄kari n̄kari ye orụk nnyịn+ onyụn̄ ada ukwan̄ usụn̄ enyịk mme ete nnyịn ẹdaha ẹkpọn̄ nseknditọ mmọ, man nditọ oro ẹkûdu uwem.+
20 Ini oro ke Moses akamana,+ enye onyụn̄ eye+ ata etieti idem ke enyịn Abasi. Ndien ẹbọk enye ke ọfiọn̄ ita ke ufọk ete esie.
21 Edi ke ini ẹsiode enye ẹnyan ẹnọ n̄kpọndịk, eyenan̄wan Pharaoh ama emen enye akama nte eyen esiemmọ.+
22 Ntem ẹkpep Moses ofụri ọniọn̄+ nditọ Egypt. Ke akpanikọ, enye ama okop odudu ke ikọ+ ye ke edinam esie.
23 “Edi ke ini enye ekperede ndisịm isua aba, ọdọn̄ enye ndika n̄kese nditọete esie, kpa nditọ Israel.+
24 Ndien ke ini enye adade okụt nte ẹnamde n̄kpọ idiọk idiọk ye owo mmọ kiet, enye anyan̄a enye onyụn̄ osio usiene ọnọ owo oro ẹkemiade ebe ke enye nditọ eyen Egypt oro n̄wot.+
25 Enye ekekere ete ke nditọete imọ ẹyefiọk ke Abasi akada ubọk imọ ọnọ mmọ edinyan̄a,+ edi mmọ ikọfiọkke.
26 Ndien ke ndan̄nsiere, enye ọbiọn̄ọde mmọ ke iso nte mmọ ẹn̄wanade en̄wan, onyụn̄ odomo ndinam mmọ ẹtọn̄ọ ntak ẹtie ke emem,+ ọdọhọde ete, ‘Mbufo ẹdi nditọete. Ntak emi ẹnamde n̄kpọ idiọk idiọk ye kiet eken?’+
27 Edi enye emi akanamde n̄kpọ idiọk idiọk ye mbọhọidụn̄ esie eberi enye osio, ete, ‘Anie ekemek fi ete edi andikara ye ebiereikpe nnyịn?+
28 Ndi onyụn̄ oyom ndiwot mi kpa nte okowotde eyen Egypt n̄kpọn̄?’+
29 Ke okopde ikọ emi, Moses efehe, aka okodụn̄ nte esenowo ke isọn̄ Midian,+ onyụn̄ obon nditọiren iba+ do.
30 “Ndien ke ama ekesịm isua aba, angel owụt enye idem ke wilderness Obot Sinai ke edemeikan̄ emi asakde ke eto n̄kukịm.+
31 Edi ke ini Moses okụtde emi idem akpa enye ke se enye okụtde.+ Edi nte enye asan̄ade ekpere ete iketịm ise, uyo Jehovah esịm enye, ete,
32 ‘Ami ndi Abasi mme ete ete fo, Abasi Abraham ye eke Isaac ye eke Jacob.’+ Idem enyek Moses, enye inyụn̄ iyomke aba ndiketịm nse.
33 Jehovah ọdọhọ enye ete, ‘Sion̄o ikpaukot ke ukot fo fep, koro ebiet oro afo adade edi edisana isọn̄.+
34 Mmokụt ukụt ikọt mi emi ẹdude ke Egypt,+ mmonyụn̄ n̄kop mmụm+ mmọ ndien mmosụhọde ndi man ndinyan̄a mmọ.+ Ndien ke emi di, nyọdọn̄ fi aka Egypt.’+
35 Moses emi mmọ ẹkesịnde, ẹte, ‘Anie ekemek fi ete edi andikara ye ebiereikpe?’+ kpa owo emi ke Abasi akada ubọk angel oro ọkọbiọn̄ọrede enye ke iso ke eto n̄kukịm ọdọn̄+ aka nte andikara ye andinyan̄a.
36 Owo emi akada mmọ ọwọrọ+ ke ama akanam mme utịben̄kpọ ye mme idiọn̄ọ ke Egypt+ ye ke Ididuot Inyan̄+ ye ke wilderness ke isua aba.+
37 “Emi edi Moses oro ọkọdọhọde nditọ Israel ete, ‘Abasi ayanam prọfet eke edibietde mi adaha ada ọnọ mbufo ke otu nditọete mbufo.’+
38 Enye edi owo+ emi ekedide edidu ke otu esop+ ke wilderness ye angel+ oro eketịn̄de ikọ ọnọ enye ke Obot Sinai ye mme ete ete nnyịn, enye ama onyụn̄ ọbọ ndisana ikọ+ eke ẹnyenede uwem ọsọk mbufo.
39 Mme ete ete nnyịn ẹma ẹsịn ndikop uyo esie, edi mmọ ẹkpọnọde enye ẹnịm+ ẹnyụn̄ ẹfiak ẹnyọn̄ọ Egypt ke esịt mmọ,+
40 ẹdọhọde Aaron ẹte, ‘Nam mme abasi nọ nnyịn ẹbem nnyịn iso. Koro amaedi Moses emi akadade nnyịn ọwọrọ ke isọn̄ Egypt, nnyịn ifiọkke se itịbede inọ enye.’+
41 Ntre ke mmọ ẹnam eyen enan̄ ke mme usen+ oro ẹnyụn̄ ẹda uwa ẹsọk ndem oro ẹnyụn̄ ẹkop inemesịt ke mme utom ubọk mmọ.+
42 Ntre Abasi ọwọn̄ọde ọkpọn̄ mmọ onyụn̄ ayak+ mmọ ẹnam n̄kpọ ẹnọ mme udịm enyọn̄, kpa nte ẹwetde ke n̄wed mme prọfet ẹte,+ ‘Nte ami ke mbufo ẹkewa mme unam ye mme uwa ẹnọ ke isua aba ke wilderness, O ufọk Israel?+
43 Edi tent Moloch+ ye ntantaọfiọn̄+ abasi Rephan ke mbufo ẹkebiom, mme mbiet emi mbufo ẹkenamde ndituak ibuot nnọ mmọ. Mmọdo nyebịn+ mbufo nsion̄o oyom usụn̄ ọkpọn̄ Babylon.’
44 “Mme ete ete nnyịn ẹkenyene tent ntiense ke wilderness, kpa nte enye ọkọnọde uyo ke ini etịn̄de ikọ ye Moses ete anam enye ekekem ye mbiet n̄kpọ emi enye okokụtde.+
45 Ndien mme ete ete nnyịn emi ẹkebọde enye ẹda ẹnyene ẹma ẹda enye n̄ko ye Joshua+ ẹdụk ẹdi isọn̄ emi mme idụt ẹkenyenede,+ emi Abasi ekebịnde osio ke iso mme ete ete nnyịn.+ Enye okodu mi tutu esịm eyo David.
46 Enye ama okụt mfọn+ ke iso Abasi onyụn̄ eben̄e ete ẹnọ imọ ifet ndinam ebietidụn̄+ nnọ Abasi Jacob.
47 Nte ededi, Solomon ọkọbọp ufọk ọnọ enye.+
48 Edi, Ata Edikon̄ idụn̄ke ke mme ufọk eke ẹdade ubọk ẹbọp;+ kpa nte prọfet oro ọdọhọde ete,
49 ‘Heaven edi ebekpo+ mi, isọn̄ onyụn̄ edi udoriukot+ mi. Nso orụk ufọk ke mbufo ẹdibọp ẹnọ mi? Jehovah ọdọhọ. Mîdịghe m̀mọ̀n̄ ke ẹdinịm ke ebiet nduọkodudu+ mi?
50 Nte idịghe ubọk mi akanam kpukpru n̄kpọ emi?’+
51 “Mbon itụn emi mînaha mbobi ke esịt+ ye utọn̄, mbufo ẹbọbiọn̄ọ edisana spirit kpukpru ini; nte mme ete ete mbufo ẹkenamde, kpa ntre ke mbufo ẹnam.+
52 Ewe prọfet ke mme ete ete mbufo mîkọkọbọke?+ Ih, mmọ ẹma ẹwot+ mbon oro ẹkebemde iso ẹnọ ntọt ẹban̄a edidi Enye emi edide edinen,+ emi mbufo ke emi ẹdide mme andida enye nnọ ye mme andiwot enye,+
53 mbufo emi ẹkebọde Ibet emi ẹkedade mme angel+ ẹnọ, edi mînịmke.”
54 Ndien ke ẹkopde mme n̄kpọ emi, esịt enen̄ede ayat+ mmọ, mmọ ẹnyụn̄ ẹta edet+ ẹse enye.
55 Edi enye, ọyọhọ ye edisana spirit, owụk enyịn ese enyọn̄ onyụn̄ ada okụt ubọn̄ Abasi ye Jesus nte adade ke ubọk nnasia+ Abasi,
56 enye onyụn̄ ọdọhọ ete: “Sese! Mmokụt enyọn̄ nte ebererede+ ye Eyen owo+ nte adade ke ubọk nnasia Abasi.”+
57 Edi mmọ ẹfiori ke ọkpọsọn̄ uyo ẹnyụn̄ ẹda ubọk ẹsịri utọn̄+ ẹnyụn̄ ẹbụmede ẹfehe ye esịt kiet ẹkefụk enye.
58 Ndien ke ẹma ẹkebịn enye ẹsio ke obio,+ mmọ ẹtọn̄ọ enye ke itiat.+ Ndien mme ntiense+ ẹnịm ewụra mmọ ke ukot akparawa kiet emi ekerede Saul.+
59 Ndien mmọ ẹka iso nditọn̄ọ Stephen ke itiat nte enye esemede onyụn̄ ọdọhọde ete: “Ọbọn̄ Jesus, bọ spirit mi.”+
60 Ekem, enye ọtọn̄ọ edọn̄, ofiori ke ọkpọsọn̄ uyo ete: “Jehovah, kûda idiọkn̄kpọ emi udori mmọ.”+ Ndien ke ama eketịn̄ emi enye ede ke n̄kpa.
