Philippi 3;1-21
3 Ke akpatre, nditọete mi, ẹka iso ẹdara ke Ọbọn̄.+ Ndifiak n̄wet mme n̄kpọ oro mma n̄kewewet nnọ mbufo idịghe mfịna inọ mi, edi edi ke ufọn mbufo.
2 Ẹkpeme idem ye mme ebua,+ ẹkpeme idem ye mbon ibak, ẹkpeme idem ye mbon oro ẹsịbede obụkidem.+
3 Koro nnyịn idi mbon oro inade ata mbobi,+ emi inamde edisana utom ebe ke spirit+ Abasi inyụn̄ ibụrede mbụre nnyịn ke Christ Jesus+ ndien nnyịn iberike edem ke obụkidem,+
4 okposụkedi ami nnyenede ntak ndiberi edem ke obụkidem n̄kan owo efen ekededi.
Edieke owo ekededi ekerede ke imọ imenyene ntak ndiberi edem ke obụkidem, ami n̄kam nnyene n̄kan:+
5 ẹkenịm mi mbobi ke ọyọhọ usen itiaita,+ nto ubon Israel ke esien Benjamin,+ ndi eyen Hebrew, ete ye eka mi ẹnyụn̄ ẹdi mbon Hebrew;+ kaban̄a ibet, ndi Pharisee;+
6 kaban̄a ifịk, mma n̄kọbọ esop;+ kaban̄a edinen ido eke asan̄ade ye ibet, nnyeneke nduduọhọ.
7 Kpa ye oro se ikpedide udori inọ mi, mbat mmọ ke ntakurua ke ntak Christ.+
8 Ke akpanikọ, ami mbat kpukpru n̄kpọ ke ntakurua ke ntak akakan ifiọk Christ Jesus Ọbọn̄ mi.+ Ke ntak esie mmenyịme kpukpru n̄kpọ ẹtak nnyụn̄ mbat mmọ ke mbio,+ man n̄kpenyene Christ
9 man ẹkpenyụn̄ ẹkụt ke ndu ke enye, nnyeneke edinen ido idem mi, emi otode ibet,+ edi nnyene enye emi otode edibuọt idem+ ke Christ, kpa edinen ido oro otode Abasi ke ntak mbuọtidem,+
10 man n̄kpọfiọk enye ye odudu ediset ke n̄kpa esie,+ nnyụn̄ ntiene mbuana ke ndutụhọ esie,+ nnyịmede ndikpa n̄kpa eke ebietde n̄kpa esie,+
11 man nse m̀mê ke usụn̄ ekededi nyesịne ke akpa ediset+ ke n̄kpa.
12 Idịghe nte ke mmọbọbọ enye m̀mê nte ke ẹnanam mi mfọn mma,+ edi mbebịne+ man nse m̀mê ami n̄ko mmekeme ndimụm+ se Christ Jesus okomụmde+ mi enịm ete nnyene.
13 Nditọete, mbatke kan̄a nte mmomomụm enye n̄kama; edi n̄kpọ kiet edi: Mfefre mme n̄kpọ oro ẹdude ke edem+ nnyụn̄ nnyanade mbịne mme n̄kpọ oro ẹdude ke iso,+
14 mbebịne utịtmbuba+ oro man mbọ utịp+ ikot eke heaven+ oro Abasi okokotde mi ebe ke Christ Jesus.
15 Ẹyak nnyịn, ndien, adan̄a ediwak nnyịn emi ima ikọkọri isịm ọyọhọ idaha,+ inyene edu ukere n̄kpọ emi;+ ndien edieke mbufo ẹnyenede ekikere oro okpụhọrede ke usụn̄ ekededi, Abasi ayayarade edu emi ọnọ mbufo.
16 Ke idaha ekededi, ke udomo oro nnyịn ima ikanam n̄kọri, ẹyak nnyịn ika iso itịm isan̄a+ kpa ke ido emi.
17 Ẹdiana kiet ẹkabade ẹdi mme andikpebe+ mi, nditọete, ẹnyụn̄ ẹtịn̄ enyịn ẹse mmọ oro ẹsan̄ade nte ekemde ye uwụtn̄kpọ oro nnyịn ikọnọde mbufo.+
18 Koro ediwak owo ẹdu emi n̄kesitịn̄de mban̄a ediwak ini, edi idahaemi nditịn̄ mban̄a mmọ ye mmọn̄eyet, kpa mmọ emi ẹsan̄ade nte mme asua eto ndutụhọ Christ,+
19 ndien utịt mmọ edi nsobo,+ idịbi mmọ onyụn̄ edi abasi mmọ,+ ndien mmọ ẹdat esịt ke n̄kpọ emi akpakam anamde-nam mmọ bụt,+ mmọ ẹnyụn̄ ẹsịn ekikere mmọ ke n̄kpọ isọn̄.+
20 Amaedi nnyịn, itie eyenisọn̄+ nnyịn odu ke heaven,+ nnyịn inyụn̄ itie ye ọkpọsọn̄ udọn̄ ibet+ andinyan̄a emi editode do edi, kpa Ọbọn̄ Jesus Christ,+
21 emi edifiakde obot idem nnyịn emi odude ke usụhọde itie+ man ebiet ubọn̄ ubọn̄ idem+ esie nte ekemde ye se odudu esie anamde,+ emi osụkde kpukpru n̄kpọ esịn ke idak+ esie.
