Psalm 81;1-16
Ẹnọ adausụn̄ ke Gittith.+ Eke Asaph.
81 O mbufo ẹsio n̄kpo idara ẹnọ Abasi emi edide odudu nnyịn;+Ẹsio n̄kpo edikan ẹnọ Abasi Jacob.+
2 Ẹbre edinem ikwọ+ ẹnyụn̄ ẹmen ekọmọ,+Edinem harp ọkọrọ ye ndido urụk.+
3 Mbufo ẹfri nnụk ke obufa ọfiọn̄;+Ẹfri ke ọyọhọ ọfiọn̄, ẹban̄a usen usọrọ nnyịn.+
4 Koro emi edide ewụhọ ọnọ Israel,+Kpa ibet Abasi Jacob.
5 Enye okowụk emi ọnọ Joseph nte n̄kpọ editi,+Ke ini enye ọkọwọrọde asan̄a ke isọn̄ Egypt.+Ami mma n̄kop usem emi mmen̄kọfiọkke.+
6 “Mma mbiomode enye mbiomo ke afara;+Ubọk esie onyụn̄ asana akpasa ayak.+
7 Afo ama okot ke ini nnanenyịn, ndien ami nnyan̄a fi;+Ntie ke ebiet udịbe obuma nyere fi.+Ami ndomo fi ke mmọn̄ Meribah.+ Selah.
8 O mbufo ikọt mi, ẹkop, ndien ami nyetie ntiense mban̄a mbufo,+Edieke mbufo ẹdikpan̄de utọn̄ ẹnọ mi, O Israel.+
9 Esen abasi ididụhe ke otu mbufo;+Mbufo idinyụn̄ inụhọke inọ esen abasi.+
10 Ami, Jehovah, ndi Abasi mbufo,+Kpa Enye emi akadade mbufo ọwọrọ ke isọn̄ Egypt ọdọk.+Mbufo ẹn̄wan̄ade inua, ndien nyọdọn̄ n̄kpọ nyọhọ.+
11 Edi ikọt mi ikopke uyo mi;+Israel inyụn̄ inyịmeke ndinam n̄kpọ mi.+
12 Ntre ami nyak mmọ ẹsan̄a ke itụn esịt mmọ;+Mmọ ẹsan̄a ke uduak idemmọ.+
13 Ubaha nte ikọt mi ẹkpekopde uyo mi,+Ubaha nte Israel akpasan̄ade ke usụn̄ mi!+
14 N̄kpawara nsụhọde mme asua mmọ nnịm,+Nnyụn̄ n̄kabade ubọk mi n̄n̄wana ye mme asua mmọ.+
15 Amaedi mmọ eke ẹnen̄erede ẹsua Jehovah, mmọ ẹyedi ẹdisụk idem ẹnọ enye ke ndịk,+Ndien ini mmọ eyebịghi ke nsinsi.
16 Ndien ami nyada ata eti wheat mbọk enye,+Nyonyụn̄ nsio aranọkwọk ke akwa itiat nnọ fi oyụhọ.”+