Psalm 71;1-24
71 O Jehovah, ami nda fi ke ebiet ubọhọ mi.+O kûyak bụt anam mi.+
2 Nyan̄a mi ke edinen ido fo nyụn̄ nam mi mbọhọ.+Kpan̄ utọn̄ nọ mi nyụn̄ nyan̄a mi.+
3 Kabade di ọkpọsọn̄ ebiet itiat nọ mi ndidụk kpukpru ini.+Wụk ete ẹnyan̄a mi,+Koro afo edide akwa itiat mi ye ọkpọsọn̄ ebiet mi.+
4 O Abasi mi, nyan̄a mi sio ke ubọk idiọkowo,+Ke ubọk owo emi anamde se mînenke onyụn̄ efịkde ufịk.+
5 Koro afo edide idotenyịn mi,+ O Jehovah Akakan Ọbọn̄ Andikara, ami mbuọt idem mi ye afo toto ke uyen.+
6 Ami mbere ke afo toto ke idịbi;+Afo edi Enye emi akadian̄arede mi osio ke idịbi eka mi.+Ami nyotoro fi kpukpru ini.+
7 Mmakabade ntie nte utịben̄kpọ nnọ ediwak owo;+Afo edi ọkpọsọn̄ ebiet ubọhọ mi.+
8 Inua mi ọyọhọ ye itoro fo,+Ye uyai fo kpukpru usen.+
9 Kûtop mi uduọk ke ini usọn̄;+Ke ini odudu mi okụrede, kûkpọn̄ mi.+
10 Koro mme asua mi ẹmetịn̄ ẹban̄a mi,+Ndien mmọ eke ẹyomde ukpọn̄ mi ẹmedụk odu,+
11 Ẹdọhọ ẹte: “Abasi ọmọkpọn̄ enye.+Ẹbịne enye ẹmụm, koro andinyan̄a mîdụhe.”+
12 O Abasi, kûda nsannsan ukpọn̄ mi.+O Abasi mi, wara din̄wam mi.+
13 Bụt akpakam anam mmọ eke ẹbiọn̄ọde ukpọn̄ mi, mmọ ẹkpekam ẹsịm utịt mmọ.+Mmọ eke ẹyomde afanikọn̄ esịm mi ẹkpekam ẹda bụt ye esuene ẹfụk idemmọ.+
14 Edi amaedi ami, nyebet kpukpru ini,+Nyonyụn̄ nnam itoro fo awak.
15 Inua mi oyobụk edinen ido fo,+Ye edinyan̄a fo kpukpru usen,+Koro ami mmemfiọkke ibat mmọ.+
16 Ami nyedi ye akwa odudu,+ O Jehovah Akakan Ọbọn̄ Andikara;+Ami nyasiak edinen ido fo, okwo ikpọn̄.+
17 O Abasi, afo emekpep mi toto ke uyen mi,+Ndien tutu esịm emi ami ke mbụk mme utịbe utom fo.+
18 Tutu nsịm usọn̄ ye iwat, O Abasi, kûkpọn̄ mi,+Tutu mbụk mban̄a ubọk fo nnọ emana ini iso,+Nnyụn̄ mbụk odudu fo nnọ kpukpru mbon oro ẹdidide.+
19 Edinen ido fo, O Abasi, okon̄ esịm enyọn̄;+Amaedi ikpọ n̄kpọ emi afo anamde,+O Abasi, anie ebiet fi?+
20 Koro afo amanam mi n̄kụt ediwak afanikọn̄ ye nnanenyịn,+Afo akpakam afiak edemede mi;+Afo akpakam osio mi ke udem.+
21 Afo akpakam anam uku mi ọdọdiọn̄ okpon,+Onyụn̄ akan mi okụk onyụn̄ ọdọn̄ mi esịt.+
22 Ami n̄ko nyotoro fi ke ndido urụk,+Mban̄a akpanikọ fo, O Abasi mi.+Nyọkwọ edinem ikwọ nnọ fi ke harp, O Edisana Abasi Israel.+
23 N̄kpọkinua mi oyosio n̄kpo idara ke ini ọdọn̄de mi ndikwọ edinem ikwọ nnọ fi,+Ye ukpọn̄ mi emi afo afakde.+
24 Edeme mi n̄ko eyetịn̄ ke nsụhọde-uyo aban̄a edinen ido fo kpukpru usen,+Koro mmọ eke ẹyomde afanikọn̄ esịm mi ẹmedia bụt, mmọ ẹmedia esuene.+
