Psalm 66;1-20
Ẹnọ adausụn̄. Ikwọ.
66 Mbufo kpukpru mbio isọn̄, ẹsio n̄kpo edikan ẹnọ Abasi.+
2 Ẹkwọ edinem ikwọ ẹnọ ubọn̄ enyịn̄ esie.+Ẹnọ enye itoro ye ubọn̄.+
3 Ẹdọhọ Abasi ẹte: “Mme utom fo ẹnyene uten̄e didie ntem!+Ke ntak uwak odudu fo mme asua fo ẹyedi ẹdisụk idem ẹnọ fi ke ndịk.+
4 Kpukpru mbon isọn̄ ẹyenụhọ ẹnọ fi,+Mmọ ẹyenyụn̄ ẹkwọ edinem ikwọ ẹnọ fi, ẹyekwọ edinem ikwọ ẹnọ enyịn̄ fo.”+ Selah.
5 Mbufo ẹdi ẹdise se Abasi anamde.+Edinam esie ye nditọ owo enyene uten̄e.+
6 Enye amanam inyan̄ akabade edisat isọn̄;+Mmọ ẹsan̄a ke ukot ẹbe akpa.+Do ke nnyịn ikọtọn̄ọ ndidara ke enye.+
7 Enye ada odudu esie akara ke nsinsi.+Enyịn esie ke ese mme idụt.+Amaedi mbon nsọn̄ibuot, yak mmọ ẹkûmenede idem.+ Selah.
8 O mbufo ẹtoro Abasi nnyịn,+Ẹnyụn̄ ẹnam ẹkop uyo itoro emi ẹnọde enye.+
9 Enye enịm ukpọn̄ nnyịn uwem,+Inyụn̄ iyakke ikpat nnyịn esehede.+
10 Koro afo omodụn̄ọde nnyịn, O Abasi;+Afo amanam nnyịn isana kpa nte ẹnamde silver asana.+
11 Afo amada nnyịn edisịn ke iyịre ata-ikọt;+Ada ndodobi mbiomo odori nnyịn ke isịn.
12 Afo amanam owo ọdọk nnyịn ibuot ebe;+Nnyịn imodụk ikan̄ ye mmọn̄ iwọrọ,+Ndien afo ada nnyịn edinọ nduọkodudu.+
13 Nyada ofụri edifọp uwa ndi ufọk fo;+Nyosio mme akan̄a mi nnọ fi+
14 Emi n̄kpọkinua mi akakan̄ade+Emi inua mi okonyụn̄ etịn̄de ke ini ndude ke nnanenyịn.+
15 Nyada unam emi enyenede isek n̄wa ofụri edifọp uwa nnọ fi,+Nnyụn̄ nda mme okukịm erọn̄ nnam nsụn̄ikan̄ uwa ọwọrọ ọdọk.Nyawa ayara enan̄ ye mme okpo ebot.+ Selah.
16 Kpukpru mbufo emi ẹbakde Abasi, ẹdi ẹdikop, ndien nyobụk+Se enye anamde ọnọ ukpọn̄ mi.+
17 N̄kada inua mi n̄kot enye,+Nnyụn̄ nda edeme mi ntoro enye.+
18 Edieke n̄kerede ibak ekededi ke esịt mi,Jehovah idikpan̄ke utọn̄ inọ mi.+
19 Ke akpanikọ, Abasi amakpan̄ utọn̄;+Enye ọmọbiọn̄ utọn̄ ke akam oro mbọn̄de.+
20 Itoro enyene Abasi, emi mîtreke ndikop akam mi,Mînyụn̄ isịnke mi ima-mfọnido esie.+
