Genesis 43;1-34
43 Ndien akan̄ ọsọn̄ ubọk ke idụt oro.+
2 Edikem ke mmọ ẹma ẹkedia wheat oro mmọ ẹkedepde ke Egypt ẹma,+ ete mmọ ọdọhọ mmọ ete: “Ẹfiak ẹka, ẹkedep ekpri udia ẹsọk nnyịn.”+
3 Ekem Judah ọdọhọ enye ete:+ “Owo oro ama ọsọn̄ọ ọdọhọ nnyịn ete, ‘Ẹkûdedei ẹkụt mi iso aba ibọhọke mbufo ẹda eyenete mbufo ẹdi.’+
4 Edieke afo ayakde eyenete nnyịn asan̄a ye nnyịn,+ iyosụhọde ika ikedep udia isọk fi.
5 Edi edieke mûyakke enye edi, nnyịn idikaha koro owo oro ọkọdọhọde nnyịn ete, ‘Mbufo ẹkûdedei ẹyom ndikụt mi iso ibọhọke mbufo ẹda eyenete mbufo ẹdi.’”+
6 Ndien Israel ofiori ete:+ “Ntak emi mbufo ẹkenamde mi utọ idiọkn̄kpọ emi ke ndidọhọ owo oro ke mmimọ imenyene eyenete efen?”
7 Ndien mmọ ẹbọrọ ẹte: “Owo oro okobụp n̄kpọ aban̄a nnyịn ye iman nnyịn, ete, ‘Ndi ete mbufo ke osụk ododu ke uwem?+ Nte ẹmenyene eyenete efen?’ ndien nnyịn itịn̄ akpanikọ inọ enye.+ Nnyịn ikpasan̄a didie ifiọk ke enye ọyọdọhọ ete, ‘Ẹda eyenete mbufo ẹsụhọde ẹdi’?”+
8 Ekem Judah ọdọhọ Israel, ete esie, ete: “Yak eyen emi asan̄a ye ami aka+ man ikpodu uwem mbak nnyịn ye afo ye n̄kpri nditọ nnyịn+ idikpan̄a.+
9 Nyetie ubiọn̄ nnọ enye.+ Bọ mi isop edieke n̄kpọ anamde enye.+ Edieke mmemfiakke nda enye nsọk fi nnyụn̄ ndiyak enye nnọ fi, do nyanam idiọkn̄kpọ ndue fi ke nsinsi.
10 Ekpedi nnyịn ikadaha ibiat ini, adan̄aemi nnyịn ikpaka ifiak inyọn̄ idi utịm ikaba.”+
11 Ntre Israel, kpa ete mmọ, ọdọhọ mmọ ete: “Edieke edide ntre,+ ẹnam ntem: Ẹda ata nti mbun̄wụm isọn̄ emi ẹdọn̄ ke ekpat mbufo ẹkenọ enye:+ esisịt balsam+ ye esisịt aranọkwọk+ ye labdanum ye ikpọketo emi enyenede itai+ ye pistachio ye almond.+
12 N̄ko, ẹkama okụk awak utịm ikaba; ẹnyụn̄ ẹda okụk oro ẹkesịnde ke ekpat mbufo.+ Ekeme ndidi ẹkenam ndudue.+
13 Ndien ẹda eyenete mbufo ẹka ẹkekụt owo oro.
14 Ata Ọkpọsọn̄ Abasi akpakam anam owo oro atua mbufo mbọm,+ man enye akpayak eyenete mbufo eken ye Benjamin ọnọ mbufo. Edi edieke ntabade nditọ mi, yak ntaba!”+
15 Ndien mmọ ẹda enọ emi ẹnyụn̄ ẹda okụk awak utịm ikaba, ẹnyụn̄ ẹda Benjamin. Ekem mmọ ẹdaha ẹsụhọde ẹka Egypt ndikada ke iso Joseph.+
16 Ke ini Joseph adade okụt Benjamin ye mmọ, enye ọdọhọ owo emi esede aban̄a ufọk esie ete: “Da mmọ dụk ufọk nyụn̄ wot unam tem udia+ koro mmọ ẹdidia udia ye ami uwemeyo emi.”
17 Owo oro ọsọsọp anam kpa nte Joseph ọkọdọhọde.+ Ntre enye ada mmọ aka ufọk Joseph.
18 Ndien ndịk anam mmọ koro ẹdade mmọ ẹka ufọk Joseph,+ ndien mmọ ẹdọhọ ẹte: “Ẹda nnyịn ẹdi mi ke ntak okụk oro ikadade ke ekpat nnyịn inyọn̄ ke akpa ini man mmọ ẹn̄wana ye nnyịn ẹnyụn̄ ẹkan nnyịn ubọk ẹnyụn̄ ẹnam nnyịn idi ifịn ẹnyụn̄ ẹda mme ass nnyịn!”+
19 Ntem mmọ ẹka ẹbịne owo oro esede aban̄a ufọk Joseph ẹnyụn̄ ẹkeda ke enyịnusụn̄ ufọk ẹtịn̄ ikọ ye enye,
20 ẹdọhọ ẹte: “Mbọk, ọbọn̄ mi! Ke akpanikọ nnyịn ima idedi mi ididep udia.+
21 Edi ke ini nnyịn isịmde itie emi nnyịn ikanade+ inyụn̄ itatde ekpat, nnyịn ima ikụt okụk nnyịn ke ekpat nnyịn, onyụn̄ ekem nte ẹkedomode. Ntre nnyịn ikpama ndiyak okụk oro nnọ.+
22 Nnyịn imakama ediwak okụk efen idi ndidep udia. Nnyịn ifiọkke m̀mê anie ekesịn okụk emi ke ekpat nnyịn.”+
23 Ekem enye ọdọhọ ete: “Mfịna idụhe. Ẹkûfehe ndịk.+ Abasi mbufo ye Abasi ete mbufo ekesịn okụk emi ke ekpat mbufo.+ Okụk mbufo ekebem iso esịm mi.” Ekem enye osio Simeon ọnọ mmọ.+
24 Ndien owo oro ada mmọ odụk ufọk Joseph onyụn̄ ọnọ mmọn̄ ẹda ẹyet mmọ ukot,+ onyụn̄ ọnọ mme ass mmọ udia.+
25 Ndien mmọ ẹnịm enọ+ oro ẹben̄e Joseph ke ini enye edinyọn̄de edi ke uwemeyo, koro mmọ ẹma ẹkop ke mmimọ ididia udia do.+
26 Ke ini Joseph odụkde ufọk, mmọ ẹda enọ oro mmọ ẹkekamade ẹsọk enye ẹnyụn̄ ẹduọ ke isọn̄ ẹnọ enye.+
27 Ndien enye obụp mmọ nte n̄kpọ etiede, ete:+ “N̄kpọ etie didie ye akani eren ete mbufo oro mbufo ẹketịn̄de ẹban̄a? Nte enye ke osụk ododu ke uwem?”+
28 Ndien mmọ ẹbọrọ ẹte: “N̄kpọ idiọkke ye ofụn fo, ete nnyịn. Enye ke osụk ododu ke uwem.” Ndien mmọ ẹnụhọ ẹnyụn̄ ẹduọ ke isọn̄ ẹnọ enye.+
29 Ke ini enye emenerede enyịn okụt Benjamin, eyeneka esie,+ enye ọdọhọ ete: “Ndi ekperedem eyenete mbufo oro ẹkedọhọde edi emi?”+ Ndien enye ọdọhọ ete: “Abasi akpakam ọfọn fi mfọn,+ eyen mi.”
30 Ndien Joseph anam n̄kpọ usọp usọp koro itọn̄ eyeneka esie ọdọn̄de enye,+ ntre enye oyom itie nditua, onyụn̄ odụk esịt ubet akatua eyet.+
31 Ekem enye eyet iso esie onyụn̄ ọwọrọ edi, omụm idem akama onyụn̄ ọdọhọ ete:+ “Ẹda udia ẹdi.”+
32 Ndien mmọ ẹnịm udia ẹnọ enye san̄asan̄a, ẹnyụn̄ ẹnịm ẹnọ mmọ san̄asan̄a ẹnyụn̄ ẹnịm san̄asan̄a ẹnọ nditọ Egypt oro ẹsidiade udia ye enye; koro nditọ Egypt ikekemeke ndidia udia ye mme Hebrew, koro emi ekedide mbubiam n̄kpọ ọnọ nditọ Egypt.+
33 Ndien mmọ ẹtie ke iso esie nte isua emana mmọ edide, akpan ke itie akpan+ ye ekperedem ke itie esie; mmọ ẹnyụn̄ ẹse kiet eken ke n̄kpaidem.
34 Ndien enye ọdọhọ ẹda udia emi odude enye ke iso ẹsọk mmọ, edi enye anam udeme udia Benjamin awak utịm ikotion akan udeme kpukpru mbon eken.+ Ntre mmọ ẹdia n̄kpọ ẹnyụn̄ ẹn̄wọn̄ n̄kpọ ẹyụhọ.+
