Genesis 41;1-57
41 Edikem ke isua iba ẹbede Pharaoh adaba ndap,+ ndien sese, enye ada ke mben Akpa Nile.
2 Ndien enye okụt enan̄ itiaba eke ẹyede idem ẹnyụn̄ ẹnyenede isek, nte ẹwọn̄ọde ke Akpa Nile ẹdọk ẹdita mbiet ke mben Nile.+
3 Enan̄ itiaba efen emi ẹdiọide idem ẹnyụn̄ ẹtiede ọkpọ-ọkpọ+ ẹtiene ẹwọn̄ọ ke Akpa Nile ẹdida ẹkpere mme enan̄ oro ẹkedude ke mben Akpa Nile.
4 Ndien mme enan̄ oro ẹdiọide idem ẹnyụn̄ ẹtiede ọkpọ-ọkpọ ẹtọn̄ọ ndita enan̄ itiaba oro ẹyede idem ẹnyụn̄ ẹnyenede isek.+ Ekem Pharaoh edemede.+
5 Ndien enye ọtọn̄ọ ntak ede onyụn̄ afiak adaba ndap. Ndien sese, mbuot wheat itiaba emi ẹkponide ẹnyụn̄ ẹyede idem+ ẹtịbe ke etak kiet.
6 Ndien, sese, mbuot wheat itiaba emi ẹfịmide, emi ufiop ofụm edem usiahautịn+ ọfọpde, ẹtịbe n̄ko.+
7 Ndien mbuot wheat emi ẹfịmide ẹtan̄ mbuot wheat itiaba emi ẹkponide ẹnyụn̄ ẹdọn̄ọde idem ẹmen.+ Ekem Pharaoh edemede ndien sese emi ekedi ndap.
8 Edikem ke usenubọk esịt etịmede enye.+ Ntre enye ọdọn̄ ẹkekot kpukpru mme oku mfọni Egypt+ ye kpukpru mbon ọniọn̄+ esie ẹdi, ndien Pharaoh etịn̄ ndap esie ọnọ mmọ.+ Edi mmọ ndomokiet ikemeke ndisiak ndap oro nnọ Pharaoh.
9 Ekem etubom mme akama-cup editịn̄ ọnọ Pharaoh,+ ete: “Yak ntịn̄ idiọkn̄kpọ mi mfịn emi.+
10 Pharaoh akayat esịt ye mme asan̄autom esie.+ Ntre enye esịn mi ye etubom mme asan̄uyo ke ufọk-n̄kpọkọbi emi odude ke ufọk etubom mbon ukpeme.+
11 Ekem nnyịn mbiba idaba ndap ke okoneyo kiet. Ndap nnyịn kiet kiet onyụn̄ ọwọrọ nsio nsio n̄kpọ.+
12 Akparawa Hebrew+ kiet emi ekedide ofụn etubom mbon ukpeme+ ama odu do ye nnyịn. Ke ini iketịn̄de ndap oro inọ enye,+ enye ama asiak ndap oro ọnọ nnyịn. Enye akasiak ndap nnyịn kiet kiet kpa nte ikadabade.
13 Ndien ndap oro ama osu kpa nte enye akasiakde ọnọ nnyịn. Ndien edidem afiak esịn mi ke itieutom mi,+ edi eyịri etubom mme asan̄uyo.”+
14 Ndien Pharaoh ọdọn̄ ẹkekot Joseph,+ ete mmọ ẹsọsọp ẹsio enye ke ufọk-n̄kpọkọbi idakisọn̄ ẹdi.+ Ntem enye akwat ntan̄ebek+ onyụn̄ okpụhọ ọfọn̄+ esie onyụn̄ aka ke iso Pharaoh.
15 Ekem Pharaoh ọdọhọ Joseph ete: “N̄kadaba ndap, edi idụhe owo eke asiakde enye ọnọ mi. Ndien ẹma ẹtịn̄ ẹnọ mi ẹte ke afo emekeme ndisiak ndap.”+
16 Edi Joseph ọbọrọ Pharaoh ete: “Idịghe ami! Abasi ọyọnọ Pharaoh ibọrọ eke ọfọnde.”+
17 Ndien Pharaoh ọdọhọ Joseph ete: “Ke ndap mi, sese, ami n̄kada ke mben Akpa Nile.
18 Ndien sese enan̄ itiaba eke ẹyede idem ẹnyụn̄ ẹnyenede isek ẹto ke Akpa Nile ẹdọk ẹdita mbiet ke mben Nile.+
19 Enan̄ itiaba efen ẹtiene mmọ ẹdọk ẹdi, ẹdiọi idem ẹnyụn̄ ẹtie ọkpọ-ọkpọ.+ Akanam n̄kwe enan̄ eke ẹdiọide idem nte mmọ emi ke ofụri isọn̄ Egypt.
20 Ndien mme enan̄ oro ẹtiede ọkpọ-ọkpọ do, emi mînyụn̄ iyehe idem ẹta isek-isek enan̄ itiaba oro ẹkebemde iso ẹwọn̄ọ ẹdi.+
21 Ntre mmọ ẹdụk ke idịbi mmọ, edi owo ifiọkke ke mmọ ẹma ẹdụk ke idịbi mmọ, sia mmọ ẹsụk ẹtiede ọkpọ-ọkpọ nte ẹketiede ke akpa.+ Ekem ami ndemede.
22 “Ekem n̄kụt ke ndap ndien sese, mbuot wheat itiaba ẹtịbe ke etak kiet, ẹdọn̄ọ idem ẹnyụn̄ ẹfọn.+
23 Ndien sese, mbuot wheat itiaba eke ẹfịmide mînyụn̄ idọn̄ọke idem, emi ufiop ofụm edem usiahautịn+ ọfọpde, ẹtịbe n̄ko.
24 Ndien mbuot wheat oro ẹfịmide ẹtan̄ mbuot itiaba oro ẹdọn̄ọde idem ẹmen.+ Ndien ntịn̄ nnọ mme oku mfọni,+ edi mmọ ikemeke ndisiak ndap emi nnọ mi.”+
25 Ekem Joseph ọdọhọ Pharaoh ete: “Ndap Pharaoh edi ndap kiet. Se ata Abasi oyomde ndinam ke enye etịn̄ ọnọ Pharaoh.+
26 Enan̄ itiaba oro ẹyede idem ẹdi isua itiaba. Mbuot wheat itiaba oro ẹkponide ẹdi isua itiaba n̄ko. Ndap oro edi ndap kiet.
27 Ndien enan̄ itiaba oro ẹtiede ọkpọ-ọkpọ mînyụn̄ iyehe idem, oro ẹketienede mmọ edem ẹwọn̄ọ ẹdi, ẹdi isua itiaba; mbuot wheat itiaba oro mîdọn̄ọke idem, emi ufiop ofụm edem usiahautịn+ ọfọpde, ẹdidi isua akan̄ itiaba.+
28 N̄kpọ emi ntịn̄de nnọ Pharaoh edi emi: Se ata Abasi oyomde ndinam ke enye anam Pharaoh okụt.+
29 “Sese isua eduek itiaba oyodu ke ofụri isọn̄ Egypt.
30 Edi ke oro ebede isua akan̄ itiaba oyodu, ndien owo iditịghi aba kpukpru eduek oro okodude ke isọn̄ Egypt koro akan̄ ayabiat isọn̄ ama.+
31 Ndien akan̄ oro edidude idiyakke ẹti eduek oro okodude ke isọn̄, koro akan̄ oro ọyọsọn̄ ubọk etieti.
32 Ndien sia Pharaoh akadabade ndap oro utịm ikaba, emi ọwọrọ ke ata Abasi ọsọn̄ọ n̄kpọ emi,+ ndien ata Abasi ọyọsọp anam enye osu.+
33 “Mmọdo yak Pharaoh oyom owo emi enyenede ọniọn̄ ye eti ibuot onyụn̄ enịm enye ndise mban̄a isọn̄ Egypt.+
34 Yak Pharaoh anam n̄kpọ onyụn̄ emek mme esenyịn ndise mban̄a idụt emi,+ ndien yak enye osio ubak kiet ke itie ition ke otu mbun̄wụm isọn̄ Egypt enịm ke ini eduek isua itiaba oro.+
35 Ndien yak mmọ ẹtan̄ kpukpru udia ke mme isua eduek emi ẹdidide ẹbon, yak mmọ ẹnyụn̄ ẹbon wheat ẹsịn Pharaoh ke ubọk nte udia oro ẹnịmde ke mme obio,+ ẹnyụn̄ ẹkpeme enye.
36 Ndien udia oro oyodu ke isọn̄ ke isua akan̄ itiaba oro edidude ke isọn̄ Egypt,+ mbak akan̄ edisobo isọn̄ efep.”+
37 Ndien ikọ oro enem Pharaoh ye kpukpru mme asan̄autom esie.+
38 Ntem Pharaoh ọdọhọ mme asan̄autom esie ete: “Nte ẹkeme ndikụt owo efen emi spirit Abasi odude enye ke idem akan owo emi?”+
39 Ekem Pharaoh ọdọhọ Joseph ete: “Sia Abasi anamde fi ọfiọk kpukpru n̄kpọ emi,+ idụhe owo eke enyenede ọniọn̄ ye eti ibuot nte afo.+
40 Afo eyese aban̄a ufọk mi,+ ndien kpukpru ikọt mi ẹyekop uyo fo ke kpukpru n̄kpọ.+ Sụk ebekpo kpọt ke ndida n̄kpon n̄kan fi.”+
41 Ndien Pharaoh ọdọhọ Joseph ete: “Sese, mmenịm fi nte ese aban̄a ofụri isọn̄ Egypt.”+
42 Ekem Pharaoh osio n̄kpanuen ufịk idiọn̄ọ+ ke ubọk esie esịn Joseph ke ubọk onyụn̄ ọnọ enye ọfọn̄idem eti linen esịne, onyụn̄ ọkọn̄ enye n̄kpọitọn̄ gold ke itọn̄.+
43 Ekem anam enye awat ke udiana chariot ubọn̄ oro enye ekenyenede,+ mme owo ẹnyụn̄ ẹsan̄a enye ke iso ẹfiori ẹte, “Avrékh!” ntem ẹnamde enye edi andise mban̄a ofụri isọn̄ Egypt.
44 Ndien Pharaoh ọdọhọ Joseph ete: “Ami ndi Pharaoh, edi ke afo mûnọhọ odudu owo ndomokiet idimenekede ubọk m̀mê ukot esie ke ofụri isọn̄ Egypt emi.”+
45 Ekem Pharaoh osio Joseph enyịn̄, Zaphenath-paneah, onyụn̄ ọnọ enye Asenath,+ eyen Potiphera, oku On,+ ete ọdọ. Ndien Joseph ọtọn̄ọ ndiwọrọ nsan̄a ke ofụri isọn̄ Egypt.+
46 Joseph ekedi isua edịp ye duop+ ke ini enye akadade ke iso Pharaoh, edidem Egypt.
Ntem Joseph ọwọrọ ọkpọn̄ iso Pharaoh akasan̄a akanade ofụri isọn̄ Egypt.
47 Ndien isọn̄ on̄wụm ata ediwak mbun̄wụm ke ini eduek isua itiaba oro.+
48 Ndien enye obon kpukpru udia oro okodude ke isọn̄ Egypt ke isua itiaba onyụn̄ obon mmọ ke mme obio.+ Enye atan̄ kpukpru udia emi otode in̄wan̄ emi akande obio okụk obon ke esịt obio.+
49 Ndien Joseph obon ata ediwak wheat,+ nte ntan inyan̄, tutu owo ikemeke ndibat aba, koro akawakde etieti.+
50 Edi mbemiso akan̄ edide edisịm, Asenath, eyen Potiphera, oku On, aman nditọiren iba ọnọ Joseph.+
51 Ntem Joseph osio akpan esie enyịn̄, Manasseh,+ koro, ke nditịn̄ nte enye eketịn̄de, “Abasi amanam mi mfre kpukpru mfịna mi ye ofụri ufọk ete mi.”+
52 Ndien enye osio udọ esie enyịn̄, Ephraim,+ koro, ke nditịn̄ nte enye eketịn̄de, “Abasi amanam mi ntọt ke isọn̄ emi n̄kụtde ukụt.”+
53 Ndien isua eduek itiaba emi okodude ke isọn̄ Egypt edisịm utịt,+
54 ekem isua akan̄ itiaba ọtọn̄ọ, kpa nte Joseph ọkọdọhọde.+ Ndien akan̄ odu ke ofụri isọn̄, edi udia odu ke ofụri isọn̄ Egypt.+
55 Ke akpatre, akan̄ omụm ofụri isọn̄ Egypt ndien mme owo ẹtọn̄ọ ndiseme nnọ Pharaoh nyom udia.+ Ekem Pharaoh ọdọhọ kpukpru nditọ Egypt ete: “Ẹka ẹbịne Joseph. Ndien se ededi eke enye ọdọhọde mbufo, mbufo ẹnam oro.”+
56 Ndien akan̄ odu ke ofụri iso isọn̄.+ Ekem Joseph ọtọn̄ọ ndiberede kpukpru ubet ubon wheat, onyụn̄ anyam mmọ ọnọ nditọ Egypt,+ koro akan̄ ọkọsọn̄de ubọk ke isọn̄ Egypt.
57 Ndien mme owo eto ke ofụri iso isọn̄ ẹdi Egypt ndibọ Joseph udia ndep, koro akan̄ ọkọsọn̄de ubọk ke ofụri isọn̄.+
