Ezekiel 24;1-27
24 Ndien uyo Jehovah ọtọn̄ọ ntak esịm mi ke ọyọhọ isua usụkkiet, ke ọyọhọ ọfiọn̄ duop, ke ọyọhọ usen duop ke ọfiọn̄ oro, ete:
2 “Eyen owo, wet enyịn̄ usen emi, kpa usen mfịn emi, nịm nọ idemfo. Edidem Babylon ememen idem edi ndin̄wana ye Jerusalem kpa ke idem usen mfịn emi.+
3 Ndien top n̄ke ban̄a ufọk nsọn̄ibuot,+ nyụn̄ dọhọ ban̄a mmọ ete,
“‘Ntem ke Jehovah Akakan Ọbọn̄ Andikara ọdọhọ ete: “Tem an̄wan̄a-inua eso utemudia; tem enye, nyụn̄ tọhọ mmọn̄ dọn̄ ke esịt esie.+
4 Tan̄ mbak dọn̄ ke esịt,+ kpukpru nti mbak, ifụhi ye afara; dọn̄ ata nti ọkpọ yọhọ esịt esie.
5 Da ata eti erọn̄,+ ndien n̄ko dọn̄ ifia ke idak esie kanade. Sọbọ mbak esie, tem mme ọkpọ esie n̄ko ke esịt esie.”’”+
6 “Mmọdo ntem ke Jehovah Akakan Ọbọn̄ Andikara ọdọhọ, ‘Mbọm obio oro ọduọkde iyịp,+ kpa an̄wan̄a-inua eso utemudia, emi n̄karafan̄ odude ke esịt, n̄karafan̄ oro mînyụn̄ iwọrọke ke enye! Da enye ke mbak ke mbak wọrọ di;+ owo idisịnke afia iban̄a enye.+
7 Koro iyịp esie emedi edidu ke ufọt esie.+ Enye odori enye ke nsemnsem enyọn̄ akwa itiat. Enye ikan̄wan̄ake enye iduọk ke isọn̄, man ada ntan ofụk enye.+
8 Man ndemede ifụtesịt ndida nsio usiene,+ mmodori iyịp esie ke nsemnsem enyọn̄ akwa itiat, mbak ẹdifụk enye.’+
9 “Mmọdo ntem ke Jehovah Akakan Ọbọn̄ Andikara ọdọhọ ete, ‘Mbọm obio oro ọduọkde iyịp!+ Ami n̄ko nyanam ebok okpon.+
10 Nam ifia awak. Bara ikan̄. Tịm sọbọ obụk. Ndien n̄wan̄a mmọn̄ unam oro sio, nyụn̄ yak mme ọkpọ ẹnen̄ede ẹfiop.
11 Dori enye ukpọk ke mbubek ikan̄ man enye ofiop; ndien okpoho esie enyene ndifiop, ndek esie onyụn̄ enyene nditara ke ufọt esie.+ Yak ikan̄ ata n̄karafan̄ esie.+
12 Afanikọn̄! Enye amanam owo akpa mba, edi akwa n̄karafan̄ esie iwọrọke ke enye.+ Sịn enye ye n̄karafan̄ esie ke ikan̄!’
13 “‘Obukpo ido ama odu ke ndek fo.+ Ntak oro akanam nyet fi asana, edi afo ukûsanake ke ndek fo.+ Afo udusanake aba tutu ami nnam ifụtesịt mi odobo aban̄a fi.+
14 Ami, Jehovah, ndọhọ.+ Enye eyedi,+ ndien ami nyanam n̄kpọ. Ami ndifụmike+ ndinyụn̄ ntuaha mbọm+ ndinyụn̄ ntuaha n̄kpọfiọk.+ Mmọ ẹyebiere ikpe fo nte ekemde ye mme usụn̄ fo ye mme edinam fo,’+ uyo Jehovah Akakan Ọbọn̄ Andikara edi emi.”
15 Ndien uyo Jehovah ọtọn̄ọ ntak esịm mi, ete:
16 “Eyen owo, sese ami mmọn̄ mbọ fi se iyede+ fi ke enyịn, ndisi ndisi,+ ndien afo unyeneke ndimia ikpanesịt, afo unyeneke nditua unyụn̄ unyeneke ndiyak mmọn̄eyet ọwọrọ fi ke enyịn.+
17 Seme ke ndopuyo. Kûnyụn̄ ufụhọ uban̄a mbon oro ẹkpan̄ade.+ Bọbọ mbọbọ ke ibuot fo,+ nyụn̄ sịne ikpaukot ke ukot fo.+ Afo unyeneke ndifụk n̄kaminua+ fo, unyụn̄ unyeneke ndita uyo owo.”+
18 Ndien ami ntịn̄ nnọ mme owo ke usenubọk, ndien ke mbubreyo n̄wan mi akpa. Ntre ami nnam ke usenubọk kpa nte ẹkewụkde mi.
19 Ndien mme owo ẹdọhọ mi ẹte: “Nte afo udusianke nnyịn se mme n̄kpọ emi afo anamde mi ẹnyenede ndinam ye nnyịn?”+
20 Ekem ami ndọhọ mmọ nte: “Uyo Jehovah emesịm mi, ete,
21 ‘Dọhọ ufọk Israel ete: “Ntem ke Jehovah Akakan Ọbọn̄ Andikara ọdọhọ ete, ‘Sese ami mmọn̄ nsabade edisana ebiet mi,+ odudu emi anamde mbufo ẹtan̄ idem,+ n̄kpọ emi eyede+ mbufo ke enyịn ye se ukpọn̄ mbufo atuade mbọm, ndien nditọiren mbufo ye nditọiban mbufo emi mbufo ẹkekpọn̄de—mmọ ẹyeduọn̄ọ ke akan̄kan̄.+
22 Ndien mbufo ẹyenam kpa nte ami nnamde. Mbufo idifụkke n̄kaminua,+ idinyụn̄ itaha uyo owo.+
23 Ndien mbufo ẹyebọbọ mbọbọ ke ibuot, ẹnyụn̄ ẹsịne ikpaukot ke ukot. Mbufo iditịmke idem idinyụn̄ ituaha,+ ndien mbufo ẹyeyemede ke mme ndudue mbufo,+ ẹyenyụn̄ ẹmụm mmụm ẹban̄a kiet eken.+
24 Ndien Ezekiel amakabade edi idiọn̄ọ+ ọnọ mbufo. Mbufo ẹyenam ekekem ye kpukpru se enye anamde. Ke ini emi etịbede,+ mbufo ẹyefiọk n̄ko ẹte ke ami ndi Jehovah Akakan Ọbọn̄ Andikara.’”’”+
25 “Ndien amaedi afo, O eyen owo, nte ididịghe ke usen oro ndibọde mmọ ọkpọsọn̄ ebiet mmọ, ediye n̄kpọ idatesịt mmọ, n̄kpọ oro eyede mmọ ke enyịn+ ye se idọn̄de ukpọn̄ mmọ itọn̄, kpa nditọiren mmọ ye nditọiban+ mmọ, ih,
26 ke usen oro ke owo emi ọbọhọde efehe editiene fi man anam utọn̄ okop?+
27 Ke usen oro afo ayatat inua etịn̄ ikọ ọnọ owo eke ọbọhọde efehe,+ afo eyetịn̄ ikọ udunyụn̄ udịghe aba imụm;+ ndien afo ayakabade edi idiọn̄ọ ọnọ mmọ,+ ndien mmọ ẹyefiọk ẹte ke ami ndi Jehovah.”+
