Exodus 23;1-33
23 “Kûsuan nsunsu etop.+ Kûdiana ye idiọkowo udi ntiense emi aduakde ndinam afai.+
2 Kûtiene otuowo unam idiọk;+ kûnyụn̄ utiene mme owo utie ntiense ke ikọ man ẹkwan̄a ikpe.+
3 Kûwụt uma ke ini ekpede ikpe usụhọde owo.+
4 “Edieke okụtde ayara enan̄ m̀mê ass asua fo nte osopde usụn̄, kûtre ndimụm nsọk enye.+
5 Edieke okụtde ass asua fo nte ọduọde ana ye mbiomo ke edem, kûdaha ukpọn̄ enye. Kûtre nditiene enye ntat ass oro.+
6 “Kûkwan̄a ikpe eyen ubuene ke ikọ esie.+
7 “Fehe kpọn̄ ikọ nsu.+ Kûnyụn̄ uwot owo eke mîduehe m̀mê ndiwot edinen owo, koro nditebeke idiọkowo ikpe.+
8 “Kûbọ owo ubọkedem, koro ubọkedem ekịmde mme okụt-usụn̄ enyịn onyụn̄ ekeme ndinam ndinen owo ẹkwan̄a ikọ.+
9 “Kûnyụn̄ ufịk esenowo,+ sia mbufo ẹfiọkde ukpọn̄ esenowo, koro mbufo ẹkedide isenowo ke isọn̄ Egypt.+
10 “Afo enyene ndisuan n̄kpasịp ke isọn̄ fo ke isua itiokiet onyụn̄ atan̄ mbun̄wụm esie.+
11 Edi ke ọyọhọ isua itiaba, kûtọ n̄kpọ ke esịt, edi yak enye akabade edi ekpene ikọt,+ ndien mme ubuene ke otu mbufo ẹyeda n̄kpọ do ẹdia; mme unam ikọt ẹyenyụn̄ ẹdia se mmọ ẹsụhọde.+ Ntem ke afo edinam ye in̄wan̄ vine ye in̄wan̄ olive fo.
12 “Nam utom fo ke usen itiokiet;+ edi ke ọyọhọ usen itiaba afo enyene nditre utom, man ayara enan̄ fo ye ass fo ẹduọk odudu, eyen ofụn an̄wan fo ye esenowo ẹkpenyụn̄ ẹduọk odudu.+
13 “Ẹnyụn̄ ẹkpeme ndinam kpukpru se ndọhọde mbufo;+ ẹkûnyụn̄ ẹkot enyịn̄ mme abasi efen. Owo inyụn̄ inyeneke ndikop enyịn̄ mmọ ke inua fo.+
14 “Nịm usọrọ nọ mi utịm ikata ke isua.+
15 Nịm usọrọ uyo eke leaven mîdụhe.+ Ta uyo eke leaven mîdụhe+ ke usen itiaba, ke edikem ini ke ọfiọn̄ Abib,+ kpa nte n̄kowụkde fi, koro ke ọfiọn̄ emi ke afo ọkọwọrọ ke Egypt. Ndien mmọ inyeneke ndidi ke iso mi ubọk ubọk.+
16 N̄ko, nịm usọrọ idọk akpa mfri emi adatde,+ ke utom emi afo akanamde, kpa se ọkọtọde ke in̄wan̄;+ ye usọrọ editan̄ mbun̄wụm ke utịt isua, ke ini afo atan̄de se akanamde utom ke in̄wan̄.+
17 Yak kpukpru irenowo fo ẹdi ke iso ata Ọbọn̄, Jehovah,+ utịm ikata ke isua.
18 “Kûwa iyịp uwa mi udian ye se leaven odude ke esịt. Ikpọn̄ usọrọ mi inyụn̄ inyeneke ndina tutu esịm usenubọk.+
19 “Da mfọnn̄kan akpa mfri eke adatde ke isọn̄ fo di ke ufọk Jehovah Abasi fo.+
“Kûtem eyen ebot ke mmọn̄eba eka esie.+
20 “Sese mmọn̄ ndọn̄ angel+ ebem fi iso onyụn̄ ekpeme fi ke usụn̄ onyụn̄ ada fi edi ke ebiet emi mben̄ede nnịm.+
21 Kpeme idemfo mbak enye nyụn̄ kop uyo esie. Kûsọn̄ ibuot ye enye, koro enye mîdifenke mbufo ke ubiatibet mbufo;+ koro enyịn̄ mi odude enye ke idem.
22 Edi edieke afo okopde uyo esie onyụn̄ etịmde anam kpukpru se ndidọhọde,+ nyasua mme asua fo nnyụn̄ nnam ikọ ye mmọ eke ẹnamde ikọ ye afo.+
23 Koro angel mi eyebem fi iso onyụn̄ ada fi aka ke ọtọ mme Amorite ye mme Hittite ye mme Perizzite ye mbon Canaan, ye mme Hivite ye mbon Jebus, nyonyụn̄ nsobo mmọ mfep.+
24 Kûnụhọ unọ mme abasi mmọ, kûnyụn̄ unam n̄kpọ mmọ, kûnam baba mbiet n̄kpọ mmọ ekededi,+ edi kûtre ndisobo mmọ kûnyụn̄ utre ndiwụri mme adaha utuakibuot mmọ mfep.+
25 Mbufo ẹnam n̄kpọ Jehovah Abasi mbufo,+ ndien enye ọyọdiọn̄ uyo ye mmọn̄ fo;+ ami nyonyụn̄ mmen udọn̄ọ mfep ke otu mbufo.+
26 N̄wan oro idịbi obụn̄ọde ye ada ididụhe ke idụt fo.+ Nyanam usen fo ọyọhọ.+
27 “Nyonyụn̄ ndọn̄ ndịk mi ebem fi iso,+ ndien nyetịmede kpukpru mmọ eke afo edikade ke ọtọ mmọ, nnyụn̄ nnọ fi obotitọn̄ kpukpru mme asua fo.+
28 Nyonyụn̄ ndọn̄ mfụhọ ebem fi iso,+ ndien enye eyebịn mme Hivite, ye mbon Canaan ye mme Hittite efep ke iso fo.+
29 Ndibịnke mmọ mfep ke iso fo ke isua kiet, mbak isọn̄ oro edikabade ndon, ndiọi unam ikọt ẹdinyụn̄ ẹwak ẹkan fi ubọk.+
30 Ndibịn mmọ nsịtnsịt mfep ke iso fo, tutu afo ọtọt onyụn̄ ada isọn̄ oro enyene.+
31 “Nyonyụn̄ nnịm mme adan̄a fo ọtọn̄ọde ke Ididuot Inyan̄ tutu esịm inyan̄ mbon Philistia, onyụn̄ ọtọn̄ọde ke wilderness tutu esịm Akpa;*+ koro ndidade mme andidụn̄ isọn̄ oro nsịn fi ke ubọk, ndien afo eyebịn mmọ ke iso fo efep.+
32 Kûnam ediomi ye mmọ ye mme abasi mmọ.+
33 Mmọ inyeneke ndidụn̄ ke isọn̄ fo, mbak mmọ ẹdinam fi anam idiọkn̄kpọ edue mi. Edieke afo anamde n̄kpọ mme abasi mmọ, oro eyedi afia ọnọ fi.”+
Mme Ikọ Idakisọn̄
^ Oro edi, “Euphrates.”
