Exodus 21;1-36
21 “Ndien mme ubiereikpe emi ke afo edinịm mmọ ke iso:+
2 “Edieke afo edepde ofụn+ emi edide eyen Hebrew, enye edidi ofụn ke isua itiokiet, edi ke ọyọhọ isua itiaba enye ọyọwọrọ ufụn, idikpehe baba n̄kpọ kiet.+
3 Edieke enye odụkde ufụn ke idemesie ikpọn̄, enye ọyọwọrọ ikpọn̄. Edieke enye enyenede n̄wan, n̄wan esie enyene ndisan̄a ye enye n̄wọrọ.
4 Edieke eteufọk esie ọnọde enye n̄wan ọdọ, ndien n̄wan emi aman nditọiren m̀mê nditọiban ọnọ enye, n̄wan ye nditọ an̄wan emi ẹdinyene eteufọk esie,+ edi enye ikpọn̄ ediwọrọ.+
5 Edi edieke ofụn eyịrede ọdọhọ ete, ‘Mmama eteufọk mi ye n̄wan mi ye nditọiren mi; nyomke ndiwọrọ ufụn,’+
6 eteufọk esie enyene ndida enye nsan̄a n̄kpere ata Abasi nnyụn̄ nda enye nsan̄a n̄kpere enyịnusụn̄ m̀mê obubọk enyịnusụn̄; eteufọk esie onyụn̄ enyene ndida utịbin̄kpọ ntịbi enye utọn̄, ndien enye edidi ofụn esie ke nsinsi.+
7 “Ndien edieke owo anyamde eyen esie an̄wan nte ofụn,+ enye idiwọrọke ufụn nte emi ifịn iren ẹwọrọde.
8 Edieke eteufọk esie mîmaha enye, mînyụn̄ idaha enye nte n̄wanesa+ edi ayakde ẹfak enye, enye inyeneke unen ndinyam enye nnọ mbon esenidụt sia enye ekebrede eyenan̄wan emi n̄kari.
9 Ndien edieke enye adade eyenan̄wan emi ọnọ eyen esie eren, enye enyene ndinam ye eyenan̄wan emi nte ekemde ye unen nditọiban.+
10 Edieke enye ọdọde n̄wan efen adian, yak enye okûtre ndinọ enye n̄kemn̄kem udia ye edisịnen̄kpọ+ ye udeme ndọ* esie.+
11 Edieke enye mîdinọhọ enye n̄kpọ mbita emi, enye enyene ndiwọrọ nnyọn̄ ke mfọn, ikpehe okụk.
12 “Ẹkûtre ndiwot owo eke amiade owo owot.+
13 Edi edieke owo mîdịbeke-dịbe ibet owo, ndien ata Abasi ayak etịbe ntre ke ubọk esie,+ nyenịm ebiet eke enye ekemede ndifehe n̄ka+ nnọ fi.
14 Ndien edieke owo ayatde esịt ye ekemmọ owo onyụn̄ adade n̄kari owot enye,+ afo enyene ndisio enye n̄kowot idem ekpedi enye odu ke itieuwa mi.+
15 Ẹkûtre ndiwot owo eke amiade ete esie m̀mê eka esie.+
16 “Ẹkûtre ndiwot+ owo eke omụmde owo ke ukat+ onyụn̄ anyamde enye+ mîdịghe ẹkụtde enye ke ubọk.
17 “Ẹkûtre ndiwot owo eke osụn̄ide ete esie m̀mê eka esie.+
18 “Ndien edieke mme owo ẹtọhọde utọk ndien kiet ọtọ enye eken ke itiat mîdịghe amia enye ke udọk ndien enye ikpaha edi ọdọn̄ọ ana ke n̄kpana;
19 edieke enye adahade ke enyọn̄ ọwọrọ an̄wa onyụn̄ akamade eto asan̄a, owo emi akamiade enye ọyọbọhọ ufen; enye edinọ n̄kpọ kpọt ke usiene ini emi owo oro mîkanamke utom tutu idem ọsọn̄ enye ofụri ofụri.
20 “Ndien edieke owo adade eto amia+ ofụn eren esie m̀mê ofụn an̄wan esie ndien ofụn oro akpa enye ke ubọk, ẹkûtre ndisio usiene+ ibuot esie.
21 Edi edieke ofụn oro osụk odude uwem esịm usen kiet m̀mê iba, owo idisioho usiene ibuot esie, koro enye edide inyene eteufọk esie.
22 “Ndien edieke mme owo ẹn̄wanade en̄wan ndien mmọ ẹketuak n̄wan idịbi, ndien nditọ+ ẹwọn̄ọ enye ke idịbi edi emi isụn̄ọke ke n̄kpa, ẹkûtre ndibọ owo oro isop nte ebe an̄wan oro ebierede ọnọ enye; ndien enye edinọ emi ebe ke mme ebiereikpe.+
23 Edi edieke emi osụn̄ọde ke n̄kpa, afo enyene ndinọ ukpọn̄ ke ukpọn̄,+
24 enyịn ke enyịn, edet ke edet, ubọk ke ubọk, ukot ke ukot,+
25 mbọn ke mbọn, unan ke unan, ita ke ita.+
26 “Ndien edieke owo amiade ofụn eren esie m̀mê ofụn an̄wan esie enyịn kiet esịri, enye enyene ndisio enye unyọn̄ nte owo oro ọwọrọde ufụn ke usiene enyịn+ esie oro.
27 Ndien edieke enye amiade ofụn eren esie m̀mê ofụn an̄wan esie edet osio, enye enyene ndisio enye unyọn̄ nte owo oro ọwọrọde ufụn ke usiene edet esie.
28 “Ndien edieke ayara enan̄ atuakde eren m̀mê n̄wan owot, ẹkûtre nditọn̄ọ ayara enan̄ oro ke itiat+ n̄wot, ẹkûta obụk esie; ndien andinyene enan̄ oro ọyọbọhọ ufen.
29 Edi edieke edide enan̄ oro ama esituak owo ndien ẹtịn̄ ẹnọ andinyene edi enye ikpemeke enan̄ oro, ndien enan̄ oro owot eren m̀mê n̄wan, ẹnyene nditọn̄ọ enan̄ oro ke itiat n̄wot nnyụn̄ n̄wot andinyene n̄ko.
30 Edieke ẹbierede n̄kpọ ẹnọ enye nte ufak, enye enyene ndinọ ekọmurua ufak ke ibuot ukpọn̄ esie nte ekemde ye ofụri se ẹbierede ẹnọ enye.+
31 Edide enan̄ oro akatuak eyeneren m̀mê akatuak eyenan̄wan owot, ẹnyene ndinam ye enye nte ekemde ye mme ubiereikpe emi.+
32 Edieke enan̄ emi akatuakde ofụn eren m̀mê ofụn an̄wan owot, enye enyene ndinọ eteufọk ofụn oro shekel edịp ye duop,+ ẹnyụn̄ ẹnyene nditọn̄ọ enan̄ oro ke itiat n̄wot.
33 “Ndien edieke owo okụbọrede obube enịm in̄wan̄, m̀mê etịbide obube edi mîfụkke enye, ndien ayara enan̄ m̀mê ass ọduọ odụk,+
34 andinyene obube oro enyene ndinọ usiene.+ Enye ọyọnọ andinyene unam oro ekọmurua esie, ndien okpo unam oro ayakabade edi esie.
35 Ndien edieke enan̄ owo atuakde enan̄ owo efen owot, mmọ ẹnyene ndinyam odu-uwem enan̄ oro ẹnyụn̄ ẹbahade okụk esie; mmọ n̄ko ẹnyene ndibahade okpo enan̄ oro.+
36 Mîdịghe edieke ẹfiọkde ke enan̄ oro ama esituak unam efen edi andinyene ikpemeke enye,+ ẹkûtre ndibọ enye usiene+ enan̄ ke enan̄, ndien okpo enan̄ oro ayakabade edi esie.
Mme Ikọ Idakisọn̄
^ Oro edi, ebuana idan̄.
