Exodus 19;1-25
19 Ke ọyọhọ ọfiọn̄ ita ke nditọ Israel ẹma ẹkewọn̄ọ ke isọn̄ Egypt,+ kpa ke usen oro, mmọ ẹdisịm wilderness Sinai.+
2 Ndien mmọ ẹdaha ke Rephidim+ ẹnyụn̄ ẹdisịm wilderness Sinai ẹnyụn̄ ẹnam nna ke wilderness oro;+ ndien Israel ẹnam nna do ke iso obot.+
3 Ndien Moses ọdọk etiene ata Abasi, Jehovah onyụn̄ etie ke obot oro+ okot enye onyụn̄ ọdọhọ ete: “Ntem ke afo edidọhọ ufọk Jacob ye nditọ Israel ete,
4 ‘Mbufo ẹmekụt se n̄kanamde nditọ Egypt,+ man mmen mbufo ke mba ntrukpom nnyụn̄ nda mbufo nnọ idemmi.+
5 Ndien edieke mbufo ẹditịmde ẹkop+ uyo mi, ẹdinyụn̄ ẹnịmde ediomi mi,+ mbufo ẹyekabade ẹdi akpan inyene mi ke otu kpukpru mme owo,+ koro ofụri isọn̄ enyenede mi.+
6 Ndien mbufo ẹyekabade ẹdi obio ubọn̄ mme oku ye edisana idụt ẹnọ mi.’+ Mme ikọ emi ke afo editịn̄ ọnọ nditọ Israel.”
7 Ntre Moses edi edikot mbiowo+ ke otu mbon emi onyụn̄ emen kpukpru ikọ oro Jehovah okowụkde enye etịn̄ ọnọ mmọ.+
8 Ekem kpukpru owo ẹbọrọ uyo kiet ẹte: “Nnyịn imenyịme ndinam kpukpru se Jehovah ọdọhọde.”+ Kpa idaha oro, Moses emen uyo mmọ eketịn̄ ọnọ Jehovah.+
9 Ndien Jehovah ọdọhọ Moses ete: “Sese! Ami mmọn̄ nsan̄a ke obubịt enyọn̄ ntiene fi,+ man mme owo ẹkop ke ini ntịn̄de ikọ ye afo,+ man mmọ n̄ko ẹnyụn̄ ẹbuọt idem ye afo ke nsinsi.”+ Ndien Moses emen uyo mmọ eketịn̄ ọnọ Jehovah.
10 Ndien Jehovah ọdọhọ Moses ete: “Ka tiene mbon emi, nyụn̄ nam mmọ ẹsana mfịn ye n̄kpọn̄, mmọ ẹnyụn̄ ẹnyene ndiyet ọfọn̄ mmọ.+
11 Ndien mmọ ẹnyene ndiben̄e idem nnọ ọyọhọ usen ita, koro ke ọyọhọ usen ita Jehovah oyosụhọde edi ke iso kpukpru owo ke Obot Sinai.+
12 Afo nyụn̄ nịm adan̄a kanade mmọ kụk, nyụn̄ dọhọ mmọ ete, ‘Ẹkpeme idem, ẹkûdọk obot oro, ẹkûnyụn̄ ẹtụk mben obot oro. Ẹkûtre ndiwot owo ekededi eke otụkde obot oro.+
13 Ubọk owo ndomokiet okûtụk enye, koro owo iditreke-tre nditọn̄ọ enye ke itiat m̀mê ndikịm enye n̄wot. Edide enye edi unam m̀mê owo, enye inyeneke ndidu uwem.’+ Ke ini ẹfride nnụk+ okukịm erọn̄, ke mmọ ẹdikeme ndidọk ndi obot emi.”
14 Ndien Moses osụhọde ke obot oro etiene mbon emi, onyụn̄ ọtọn̄ọ ndinam mmọ ẹsana; ndien mmọ ẹyet ọfọn̄ mmọ.+
15 Ndien enye ọdọhọ mmọ ete: “Ẹben̄e idem+ ẹnọ ọyọhọ usen ita oro. Ẹkûsan̄a ẹkpere n̄wan.”+
16 Ekem ke ọyọhọ usen ita ke eyo esierede, obuma ye emịnen̄mịnen̄ ẹtọn̄ọ ndisiaha,+ obubịt enyọn̄+ onyụn̄ ofụk obot oro, uyom nnụk+ onyụn̄ ọsọn̄ etieti, esịn kpukpru owo emi ẹdude ke itienna ẹnyek idem.+
17 Ndien Moses ada mmọ ọwọrọ ke itienna man ẹkesobo ye ata Abasi, ndien mmọ ẹda ke ukot obot oro.+
18 Ndien nsụn̄ikan̄ ọwọrọ ofụk ofụri Obot Sinai,+ koro Jehovah akasan̄ade ke ikan̄+ osụhọde edi ke enye; nsụn̄ikan̄ oro ọdọdiọn̄ ọdọk nte nsụn̄ikan̄ itie ufọp kọrikọri,+ ndien ofụri obot oro enyek etieti.+
19 Ke ini uyom nnụk ọdiọn̄de-diọn̄ ọsọn̄, Moses ọtọn̄ọ nditịn̄ ikọ, ata Abasi onyụn̄ ọbọrọ enye ke uyo.+
20 Ntre Jehovah osụhọde edi enyọn̄ Obot Sinai. Jehovah onyụn̄ okot Moses ọdọk edi enyọn̄ obot, ndien Moses ọdọk aka.+
21 Ndien Jehovah ọdọhọ Moses ete: “Sụhọde ka, kodụri mmọ utọn̄ ete mmọ ẹkûdomo ndisan̄a n̄kpere Jehovah nyom ndikụt enye mbak ediwak mmọ ẹdikpan̄a.+
22 Ndien yak mme oku n̄ko emi ẹsisan̄ade ẹkpere Jehovah kpukpru ini ẹnam idemmọ asana,+ mbak Jehovah edida iyatesịt esie etiene mmọ.”+
23 Ndien Moses ọdọhọ Jehovah ete: “Mbon emi ikemeke ndidọk ndi Obot Sinai, sia afo ama ododụri nnyịn utọn̄, ete, ‘Nịm adan̄a kanade obot oro nyụn̄ nam enye edi edisana.’”+
24 Edi Jehovah ọdọhọ enye ete: “Sụhọde ka, nyụn̄ kasan̄a ye Aaron dọk di; edi yak mme oku ye mmọ emi ẹkûdomo ndidọk ntiene Jehovah, mbak enye edida iyatesịt esie etiene mmọ.”+
25 Ndien Moses osụhọde etiene mbon oro onyụn̄ akasian mmọ.+
