Exodus 18;1-27
18 Ndien Jethro oku Midian, ete an̄wan Moses,+ okop kpukpru se Abasi akanamde ọnọ Moses ye ikọt esie Israel, nte Jehovah akadade Israel ọwọrọ ke Egypt.+
2 Ntre Jethro, ete an̄wan Moses, ada Zipporah, n̄wan Moses, ke ama okosio enye unyọn̄,
3 ọkọrọ ye nditọiren esie iba,+ emi kiet ekerede Gershom,+ “koro,” nte enye ọkọdọhọde, “ami ndi esenowo ke esenidụt”;
4 enye eken onyụn̄ ekere Eliezer,+ “koro,” ke nditịn̄ nte enye eketịn̄de, “Abasi ete mi edi andin̄wam mi, koro enye ama anam mi mbọhọ akan̄kan̄ Pharaoh.”+
5 Ntre Jethro, ete an̄wan Moses, ye nditọiren esie ye n̄wan esie ẹdisịm Moses ke wilderness ke ebiet emi enye akanamde nna, ke obot ata Abasi.+
6 Ekem enye ọdọn̄ ẹkedọhọ Moses ẹte: “Ami Jethro,+ ete an̄wan fo, mmedi ke ọtọ fo, ọkọrọ ye n̄wan fo ye nditọiren esie mbiba n̄ko.”
7 Kpa idaha oro Moses ọwọrọ okosobo ye ete an̄wan esie, ọduọ ke isọn̄ onyụn̄ etịm enye inua;+ ndien mmọ ẹbụp kiet eken nte n̄kpọ etiede. Ekem mmọ ẹdụk tent.
8 Ndien Moses asian ete an̄wan esie kpukpru se Jehovah akanamde Pharaoh ye Egypt ke ntak Israel,+ ye kpukpru ukụt oro mmọ ẹkekụtde ke usụn̄,+ edi kpa ye oro Jehovah anyan̄a mmọ.+
9 Ndien Jethro adat esịt aban̄a kpukpru nti n̄kpọ oro Jehovah akanamde ọnọ Israel ke emi enye akanyan̄ade mmọ osio Egypt ke ubọk.+
10 Ekem Jethro ọdọhọ ete: “Itoro enyene Jehovah, emi akanyan̄ade mbufo osio Egypt ke ubọk ye ke ubọk Pharaoh, emi okonyụn̄ anyan̄ade mbon emi osio Egypt ke ubọk.+
11 Ke emi mmọfiọk nte ke Jehovah okpon akan kpukpru mme abasi eken+ oto ke se iketịbede ke ini mmọ ẹkenamde n̄kpọ ke iseri ye Israel.”
12 Ekem Jethro, ete an̄wan Moses, ada edifọp uwa ye mme uwa awa ọnọ Abasi;+ ndien Aaron ye kpukpru mbiowo Israel ẹdidia n̄kpọ ye ete an̄wan Moses, ke iso ata Abasi.+
13 Edikem ke ndan̄nsiere Moses osụhọde etie nte akam esinamde ekpe ikpe mme owo,+ ndien mme owo ẹda ke iso Moses ọtọn̄ọde ke usenubọk tutu esịm mbubreyo.
14 Ndien ete an̄wan Moses okụt kpukpru se enye akanamde ọnọ mme owo. Ntre enye ọdọhọ ete: “Nso orụk n̄kpọ ke afo anam emi ọnọ mme owo? Ntak emi edide afo ikpọn̄ osụk etie ndien kpukpru owo ẹda ke iso fo ọtọn̄ọde ke usenubọk tutu esịm mbubreyo?”
15 Ekem Moses ọdọhọ ete an̄wan esie ete: “Koro mbon emi ẹkade iso ndidi ke ọtọ mi ndibụp Abasi.+
16 Ke adan̄aemi mmọ ẹnyenede ikọ,+ mmọ ẹdi ke ọtọ mi man n̄kpe ikpe ke ufọt mmọ, nnyụn̄ nsian mmọ se idide mme ubiere ata Abasi ye mme ibet esie.”+
17 Ntem ete an̄wan Moses ọdọhọ enye ete: “Nte afo anamde n̄kpọ ifọnke.
18 Afo udûtreke ndikpa mba, afo ye mmọ emi ẹdude ye afo, koro utom emi okponde akan fi.+ Afo ikpọn̄ ukemeke ndinam enye.+
19 Ntem kpan̄ utọn̄ nọ mi.+ Mmọn̄ nnọ fi item, Abasi oyonyụn̄ odu ye afo.+ Da ke ibuot mme owo ke iso ata Abasi,+ nyụn̄ da ikọ mmọ tiene ata Abasi.+
20 Nyụn̄ teme mmọ se mme ewụhọ ye mme ibet ẹdide,+ nyụn̄ sian mmọ usụn̄ emi mmọ ẹkpesan̄ade ye utom emi mmọ ẹkpenamde.+
21 Edi afo mek iren emi ẹnyenede uko ke otu kpukpru owo,+ mbon emi ẹbakde Abasi,+ emi ẹnyụn̄ ẹkemede ndiberi edem+ ẹnyụn̄ ẹsuade idiọk udori;+ nyụn̄ nịm mbon emi ete ẹse mmọ enyịn nte mme etubom mme tọsịn+ ye mme etubom mme ikie ye mme etubom mme aba ye duop ye mme etubom mme duop.+
22 Ndien mmọ ẹnyene ndikpe ikpe mme owo ke ini anade ẹkpe; ndien ama ekem mmọ ẹyeda kpukpru ikọ eke ẹkponide ẹsọk fi,+ edi yak mmọ ẹbiere kpukpru n̄kpri ikọ. Ntre nam utom emi efere fi ke idem, mmọ ẹnyụn̄ ẹtiene fi ẹbiom mbiomo.+
23 Edieke afo anamde n̄kpọ emi, Abasi onyụn̄ etemede fi ntre, do afo eyekeme ndise mban̄a utom emi, akan oro, mbon emi ẹyenyọn̄ ufọk mmọ ke emem.”+
24 Ndien Moses okop uyo ete an̄wan esie onyụn̄ anam kpukpru se enye ọkọdọhọde.+
25 Ndien Moses emek mbon emi ẹnyenede ukeme ke otu ofụri Israel onyụn̄ ọnọ mmọ itie nte mme etubom emi ẹsede mme owo enyịn,+ nte mme etubom mme tọsịn ye mme etubom mme ikie ye mme etubom mme aba ye duop ye mme etubom mme duop.
26 Ndien mmọ ẹkpe ikpe mme owo ke ini anade ẹkpe. Mmọ ẹda ikọ eke ọsọn̄de ẹsọk Moses,+ edi mmọ ẹbiere kpukpru n̄kpri ikọ.
27 Ekem Moses ada ete an̄wan esie akayak,+ ndien enye ọnyọn̄ aka idụt esie.
