Exodus 17;1-16
17 Ndien ofụri esop nditọ Israel ẹdaha ke wilderness Sin+ ke adiana ke adiana, nte Jehovah okowụkde mmọ,+ ẹnyụn̄ ẹkenam nna ke Rephidim.+ Edi mmọn̄ idụhe se mmọ ẹn̄wọn̄de.
2 Ndien mmọ ẹtọn̄ọ nditọhọ ye Moses ẹte:+ “Nọ nnyịn mmọn̄ in̄wọn̄.” Edi Moses ọdọhọ mmọ ete: “Ntak emi mbufo ẹtọhọde ye ami? Ntak emi mbufo ẹdomode Jehovah?”+
3 Ndien itọn̄ asat mmọ, mmọ ẹnyụn̄ ẹdọdiọn̄ ẹsụk Moses uyo ẹte: “Ntak emi afo okosion̄ode nnyịn ke Egypt ọdọk edi ndiwot nnyịn ye nditọ nnyịn ye mme ufene nnyịn ke nsatitọn̄?”+
4 Ekem Moses eseme ọnọ Jehovah ete: “Ndinam nso ye mbon emi? Ayak esisịt mmọ ẹyetọn̄ọ mi ke itiat!”+
5 Ndien Jehovah ọdọhọ Moses ete: “San̄a ke iso mmọ be+ nyụn̄ da ndusụk mbiowo Israel ye esan̄ fo emi afo akadade eyịbi Akpa Nile.+ Kama enye ke ubọk fo san̄a ka.
6 Sese! Ami nyebem fi iso n̄kada do ke itiat ke Horeb. Ndien afo enyene ndimia itiat oro, ndien mmọn̄ ọyọwọrọ, man mmọ ẹn̄wọn̄.”+ Ndien Moses anam ntre ke iso mbiowo Israel.
7 Ntre enye okot ebiet oro Massah+ ye Meribah,+ ke ntak utọk emi nditọ Israel ẹketọhọde ye ke ntak emi mmọ ẹkedomode+ Jehovah, ẹdọhọ ẹte: “Nte Jehovah odu ke ufọt nnyịn m̀mê idụhe?”+
8 Ndien mbon Amalek+ ẹdi ẹdin̄wana ekọn̄ ye Israel ke Rephidim.+
9 Ndien Moses ọdọhọ Joshua ete:+ “Mek owo ke otu nnyịn da wọrọ,+ kan̄wana ye mbon Amalek. N̄kpọn̄ ami nyaka n̄kada ke enyọn̄ obot, ye esan̄ ata Abasi ke ubọk mi.”+
10 Ndien Joshua anam kpa nte Moses ọkọdọhọde enye,+ ete an̄wana ye mbon Amalek; ndien Moses ye Aaron ye Hur+ ẹdọk ke enyọn̄ obot oro.
11 Ndien edikem ke ini Moses emenerede ubọk esie ke enyọn̄, nditọ Israel ẹkan;+ edi ke ini enye osụhọrede ubọk esie, mbon Amalek ẹkan.
12 Ke ini ubọk akaide Moses, mmọ ẹda itiat ẹdinịm ẹnọ enye, ndien enye osụhọde etetie; Aaron ye Hur ẹnyụn̄ ẹmụm enye ubọk ẹkama, owo kiet ke n̄kan̄ emi, owo kiet ke n̄kan̄ eken, ndien ubọk esie ọsọn̄ọ ada tutu utịn osụhọde.
13 Ntem ke Joshua akan Amalek ye ikọt esie ke iso akan̄kan̄.+
14 Ekem Jehovah ọdọhọ Moses ete: “Wet n̄kpọ emi ke n̄wed+ nte n̄kpọ editi nyụn̄ tịn̄ enye sịn Joshua ke utọn̄ ete, ‘Ami nyọsọhi se ẹdade ẹti Amalek mfep ofụri ofụri ke idak ikpaenyọn̄.’”+
15 Ndien Moses anam itieuwa onyụn̄ okot enye Jehovah-nissi,
16 ọdọhọde ete: “Koro ubọk an̄wanade ye ebekpo+ Jah,+ Jehovah ayan̄wana ekọn̄ ye Amalek ke ofụri emana.”+
