Amos 5;1-27
5 “O ufọk Israel, ẹkop ikọ emi ami ntịn̄de mban̄a mbufo nte ikwọ mfụhọ:+
2 “Eyenan̄wan emi mîfiọkke erenowo,+ kpa Israel, ọmọduọ;+Enye ikemeke aba ndidaha nda.+
Ẹmekpọn̄ enye ke isọn̄ esie;Idụhe owo eke emenerede enye ke enyọn̄.+
3 “Koro ntem ke Jehovah Akakan Ọbọn̄ Andikara ọdọhọ ete, ‘Obio emi akadade owo tọsịn kiet ọwọrọ edisụhọ owo ikie; ndien enye emi akadade owo ikie ọwọrọ edisụhọ owo duop, ọnọ ufọk Israel.’+
4 “Koro ntem ke Jehovah ọdọhọ ufọk Israel ete, ‘Mbufo ẹyom mi,+ ẹnyụn̄ ẹdu uwem.+
5 Ẹkûyom Bethel,+ ẹkûka Gilgal,+ ẹkûnyụn̄ ẹbe ẹka Beer-sheba;+ koro Gilgal iditreke ndika ntan̄mfep;+ onyụn̄ edi Bethel, enye ayakabade edi ebiet idiọk odudu.+
6 O ufọk Joseph,+ ẹyom Jehovah ẹnyụn̄ ẹdu uwem,+ mbak enye edibụbede nte ikan̄,+ edinyụn̄ ata ndien baba owo kiet eke enịmede enye idụhe ke Bethel,+
7 O mbufo emi ẹnamde unenikpe akabade etidot,+ ye mbufo emi ẹmende edinen ido ẹduọk ke isọn̄.+
8 Andinam otu ntantaọfiọn̄ Kimah+ ye otu ntantaọfiọn̄+ Kesil,+ Enye emi anamde ọkpọsọn̄ ekịm+ akabade edi usenubọk, Enye emi anamde uwemeyo ekịm nte okoneyo,+ Enye emi okotde mmọn̄ inyan̄ edi, man akpan̄wan̄a ọduọk ke iso isọn̄+—Jehovah edi enyịn̄ esie;+
9 enye emi anamde nsobo abuat ọkpọsọn̄ owo, man ẹkpesobo ebiet ukpeme.
10 “‘Mmọ ẹsua owo emi ọnọde nsuannọ ke inuaotop,+ ẹnyụn̄ ẹsịn owo eke etịn̄de se ifọnde ima ke ndek.+
11 Mmọdo, ke ntak emi mbufo ẹbọde usụhọde owo utịp in̄wan̄, ẹnyụn̄ ẹbọde enye utomo ke wheat;+ mbufo ẹmeda itiat oro ẹsọide-sọi ẹbọp ufọk,+ edi mbufo ididụn̄ke ke mmọ; ẹmenyụn̄ ẹtọ in̄wan̄ vine oro n̄kpọ ọfọnde, edi mbufo idin̄wọn̄ke wine eke otode mmọ ke esịt.+
12 Koro mmọfiọk adan̄a nte mbufo ẹsọn̄de ibuot ediwak ini,+ ye nte idiọkn̄kpọ mbufo ẹkponide,+ O mbufo emi ẹsuade edinen owo,+ mbufo emi ẹbọde okụk udịpinua,+ mbufo emi ẹbịnde mme ubuene+ ẹfep ke inuaotop.+
13 Mmọdo, owo eke enyenede ikike oyodop uyo ini oro, koro edidi ini afanikọn̄.+
14 “‘Ẹyom se ifọnde ẹkûyom se idiọkde,+ man mbufo ẹdu uwem;+ man Jehovah Abasi mme udịm okpodu ye mbufo, kpa nte mbufo ẹkedọhọde.+
15 Ẹsua se idiọkde ẹnyụn̄ ẹma se ifọnde,+ ẹnyụn̄ ẹnam unenikpe odu ke inuaotop.+ M̀mê oyoto do Jehovah Abasi mme udịm ọfọn+ nsụhọ Joseph mfọn.’+
16 “Mmọdo ntem ke Jehovah Abasi mme udịm, Jehovah, ọdọhọ ete, ‘Ntuan̄a oyodu ke kpukpru an̄wa obio,+ mme owo ẹyenyụn̄ ẹdọhọ ke kpukpru efak ẹte: “Ah! Ah!” Mmọ ẹyenyụn̄ ẹkot ọtọin̄wan̄ ẹte ẹdi eseme,+ ẹnyụn̄ ẹkot mbon oro ẹfiọkde ndiseme eseme ẹte ẹdi ntuan̄a.’+
17 ‘Ndien ntuan̄a oyodu ke kpukpru in̄wan̄ vine;+ koro nyasan̄a ke ufọt fo mbe,’+ Jehovah ọdọhọ.
18 “‘Mbọm mbon oro ẹyomde usen Jehovah!+ Nso, ndien, ke usen Jehovah ediwọrọ ọnọ mbufo?+ Enye edidi ekịm, un̄wana idinyụn̄ idụhe,+
19 kpa nte ke ini owo efehede ke ntak ekpe, ndien bear esịm enye; ye nte ke ini enye odụkde ufọk akadian ubọk ke ibibene, ndien urụkikọt odom enye.+
20 Nte usen Jehovah ididịghe ekịm, utu ke un̄wana; nte enye idinyụn̄ idịghe ọkpọsọn̄ ekịm, utu ke uyama?+
21 Mmasua mmonyụn̄ nsịn mme usọrọ mbufo,+ utebe ndisana esop mbufo idinyụn̄ inemke mi.+
22 Edi ọkpọkọm mbufo ẹwa ofụri edifọp uwa ẹnọ mi,+ mme uwa enọ mbufo idinemke mi esịt,+ ndinyụn̄ nsehe uwa ebuana edisehe unam mbufo.+
23 Men uyom ikwọ fo kpọn̄ mi; kûnyụn̄ uyak n̄kop inem ikwọ ndido urụk fo.+
24 Nyụn̄ yak unenikpe ọfiọrọ nte mmọn̄,+ ye edinen ido nte idịm oro mîsatke.+
25 O ufọk Israel, ndi mme uwa ye mme uwa enọ ke mbufo ẹkeda ẹsọk mi ke wilderness ke isua aba?+
26 Ndien mbufo ẹyebiom Sakkuth edidem mbufo+ ye Kaiwan, ndisọi mbiet mbufo, kpa ntantaọfiọn̄ abasi mbufo, emi mbufo ẹkenamde ẹnọ idem mbufo.+
27 Ndien nyanam mbufo ẹka ntan̄mfep oyom usụn̄ ọkpọn̄ Damascus,’+ enye emi enyịn̄ esie edide Jehovah Abasi mme udịm ọdọhọ.”+
