2 Ndidem 9;1-37
9 Ndien prọfet Elisha okot kiet ke otu nditọ+ mme prọfet onyụn̄ ọdọhọ enye ete: “Bọbọ mbọbọ fo ke isịn+ nyụn̄ da ekpeme+ aran kama ke ubọk, ka Ramoth-gilead.+
2 Ke ini esịmde do, yom Jehu+ eyen Jehoshaphat eyen Nimshi ke ebiet oro; ndien nam enye ọwọrọ ke otu nditọete esie nyụn̄ da enye dụk ata esịt esịt ubet.+
3 Ndien da ekpeme aran oro tọhọ enye ke ibuot+ nyụn̄ dọhọ ete, ‘Ntem ke Jehovah ọdọhọ: “Mmeyet fi aran+ nnịm nte edidem+ Israel.”’ Ekem berede usụn̄ fehe wọrọ, kûbet.”
4 Ndien asan̄autom oro, kpa asan̄autom prọfet oro, adaha aka Ramoth-gilead.
5 Ke ini enye odụkde edi, sese, mme etubom udịmekọn̄ ẹma ẹbono. Ndien enye ọdọhọ ete: “Enyene se nyomde ndisian fi,+ O etubom.” Ntem Jehu obụp ete: “Anie ke otu kpukpru nnyịn emi?” Ndien enye ete: “Afo, O etubom.”
6 Ntre enye adaha ada odụk esịtufọk; ndien enye ọtọhọ enye aran ke ibuot onyụn̄ ọdọhọ ete: “Ntem ke Jehovah Abasi Israel ọdọhọ ete, ‘Mmeyet fi aran nnịm nte edidem+ ikọt Jehovah,+ oro edi, edidem Israel.
7 Afo oyowot mbonufọk Ahab ọbọn̄ fo, ndien nyosio usiene+ iyịp mme asan̄autom mi kpa mme prọfet ye iyịp kpukpru mme asan̄autom Jehovah emi Jezebel+ ọkọduọkde.
8 Ndien ofụri ufọk Ahab ẹyetak; nyonyụn̄ nsịbe kpukpru irenowo+ mfep ke ufọk Ahab+ ọkọrọ ye usụhọde owo ye ikpîkpu owo+ ekededi ke Israel.
9 Ndien nyanam ufọk Ahab ebiet ufọk Jeroboam+ eyen Nebat, onyụn̄ ebiet ufọk Baasha+ eyen Ahijah.
10 Ndien mme ebua ẹyeta Jezebel+ ke in̄wan̄ Jezreel, idụhe owo eke edibụkde enye.’” Ekem enye eberede usụn̄ efehe ọwọrọ.+
11 Edi Jehu ọwọrọ okosobo ye mme asan̄autom ọbọn̄ esie, ndien mmọ ẹbụp enye ẹte: “Nte kpukpru n̄kpọ ẹfọn?+ Ntak emi idat+ emi ekedide ebịne fi?” Edi enye ọbọrọ mmọ ete: “Mbufo ẹmetịm ẹfiọk owo emi ye nte ikọ esie esitiede.”
12 Edi mmọ ẹte: “Ososu! Mbọk, sian nnyịn.” Ekem enye ọdọhọ ete: “Ntem ye ntem ke enye eketịn̄ ọnọ mi, ete, ‘Ntem ke Jehovah ọdọhọ: “Mmeyet fi aran nnịm ke edidem Israel.”’”+
13 Ndien mmọ owo kiet kiet ẹsọsọp ẹda ọfọn̄idem+ mmọ ẹbri ke ukpọk udịghiukot ke idak ikpat esie, ẹnyụn̄ ẹfri nnụk,+ ẹnyụn̄ ẹdọhọ ẹte: “Jehu amakabade edi edidem!”+
14 Ndien Jehu+ eyen Jehoshaphat eyen Nimshi+ odụk odu+ aban̄a Jehoram.
Ndien Jehoram ye ofụri Israel ẹkedu ke Ramoth-gilead+ ẹkpeme ke ntak Hazael+ edidem Syria.
15 Ekem Edidem Jehoram+ ọnyọn̄ aka Jezreel+ man ẹkekọk unan oro mbon Syria ẹkenọde enye ke ini enye akan̄wanade ye Hazael edidem Syria.+
Ndien Jehu ọdọhọ ete: “Edieke ukpọn̄ mbufo enyịmede,+ ẹkûyak baba owo kiet efehe ọwọrọ ke obio emi aka ọkọnọ ntọt ke Jezreel.”
16 Ndien Jehu awat adaha aka Jezreel; koro Jehoram akanade do, Ahaziah+ edidem Judah ama onyụn̄ osụhọde aka ndikụt Jehoram.
17 Ndien owo ukpeme+ odoro ke tọwa+ ke Jezreel+ okụt Jehu nte asan̄ade ye akwa udịmowo edi, ndien inikiet inikiet, enye ọdọhọ ete: “Mmokụt akwa udịmowo.” Ntem Jehoram ọdọhọ ete: “Dọn̄ owoekọn̄ emi awatde enan̄-mbakara aka okosobo ye mmọ, ndien yak owo oro obụp ete, ‘Nte edi ke emem?’”+
18 Ntem awat enan̄-mbakara aka okosobo ye enye onyụn̄ ọdọhọ ete: “Ntem ke edidem ọdọhọ, ‘Nte edi ke emem?’” Edi Jehu ọbọrọ ete: “Nso idi mbubehe fo ye ‘emem’?+ Wọn̄ọde dụk edem mi!”
Ndien owo ukpeme+ oro ọtọt ete: “Isụn̄utom oro aka ekesịm mmọ, edi ifiakke inyọn̄ idi.”
19 Ntre enye osio ọyọhọ awat enan̄-mbakara iba ọdọn̄, ndien ke ini enye edide edisịm mmọ, enye ọdọhọ ete: “Ntem ke edidem ọdọhọ ete, ‘Nte edi ke emem?’” Edi Jehu ọbọrọ ete: “Nso idi mbubehe fo ye ‘emem’?”+ Wọn̄ọde dụk edem mi!”
20 Ndien owo ukpeme oro ọtọt ete: “Enye aka ekesịm mmọ, edi ifiakke inyọn̄ idi; uwat oro onyụn̄ ebiet uwat Jehu+ eyeyen Nimshi,+ koro enye esiwatde idat idat.”+
21 Ntem Jehoram ọdọhọ ete: “Tịm chariot!”+ Ndien mmọ ẹtịm chariot ekọn̄ esie, ndien Jehoram edidem Israel ye Ahaziah+ edidem Judah ẹwat ẹwọrọ, owo kiet kiet ke chariot esie. Nte mmọ ẹkade ndikosobo ye Jehu, mmọ ẹkụt enye ke in̄wan̄ Naboth+ owo Jezreel.
22 Edikem ke ndondo oro Jehoram okụtde Jehu, enye ọsọsọp obụp ete: “Jehu, nte edi ke emem?” Edi enye ọbọrọ enye ete: “N̄kpasan̄a didie ndi ke emem+ ke adan̄a ofụri use emi uka, Jezebel,+ anamde ye ediwak ubreidiọn̄+ esie?”
23 Inikiet inikiet Jehoram ọwọn̄ọde chariot esie ete ifehe onyụn̄ ọdọhọ Ahaziah ete: “Ahaziah, n̄kari+ ke edi!”
24 Ndien Jehu osio utịgha+ atịgha Jehoram abaedem tutu idan̄ oro ọwọrọ enye ke esịt, ndien enye ọduọ esịne ke chariot ekọn̄+ esie.
25 Ndien enye ọdọhọ Bidkar udiana+ esie ete: “Menede enye; top enye sịn ke in̄wan̄ Naboth owo Jezreel;+ ti ete: Ami ye afo ikesiwat ntre ke udịm itiene Ahab ete esie, ndien Jehovah ama ọnọ etop ubiereikpe+ emi aban̄a enye ete:
26 ‘“Ke akpanikọ, mma n̄kụt iyịp+ Naboth ye iyịp nditọ+ esie n̄kpọn̄,” uyo Jehovah edi emi, “ndien nditreke ndisio fi usiene+ ke in̄wan̄ emi,” uyo Jehovah edi emi.’ Ntre menede enye; top enye sịn ke in̄wan̄ oro kpa nte Jehovah ọkọdọhọde.”+
27 Ndien Ahaziah+ edidem Judah ada okụt onyụn̄ efehe odụk usụn̄ ufọk in̄wan̄esa.+ (Ekem Jehu ebịne enye onyụn̄ ọdọhọ ete: “Ẹwot enye n̄ko! Mbufo ẹwot enye! Ntre mmọ ẹtọ enye ke enyọn̄ chariot esie ke usụn̄ emi ọdọkde aka Gur, emi odude ekpere Ibleam.+ Ndien enye aka iso efehe tutu ekesịm Megiddo+ onyụn̄ akpa do.+
28 Ekem mme asan̄autom esie ẹmen enye ke chariot ẹka Jerusalem, ẹnyụn̄ ẹkebụk enye ke udi esie ye mme ete ete esie ke Obio David.+
29 Ndien ke ọyọhọ isua duopekiet oro Jehoram+ eyen Ahab akarade ke Ahaziah+ akakabade edi edidem Judah.)
30 Ekem Jehu edisịm Jezreel,+ Jezebel+ onyụn̄ okop n̄kpọ emi. Ndien n̄wan emi esịn obubịt n̄kpọ mmaidem ke enyịn esie onyụn̄ ọdiọn̄ idet ibuot esie ediye ediye+ ndien osio iso anyan ke window ete ise isọn̄.+
31 Ndien Jehu oto inuaotop odụk. N̄wan emi obụp ete: “Ndi n̄kpọ ọfọn ye Zimri+ emi okowotde ọbọn̄ esie?”
32 Ntem enye emenede iso esie ese window onyụn̄ obụp ete: “Anie ada ye ami? Anie?”+ Inikiet inikiet, mme adaidaha okụre+ iba m̀mê ita ẹtop iso ẹse enye.
33 Ntre enye ọdọhọ ete: “Ẹsio enye ẹduọk ke isọn̄!”+ Ndien mmọ ẹsio enye ẹduọk ke isọn̄, ndusụk iyịp esie ẹnyụn̄ ẹtiam ke ibibene ye ke mme enan̄-mbakara; ndien enye edịghi+ n̄wan emi ebe.
34 Ekem enye odụk edidia udia onyụn̄ ọn̄wọn̄ n̄kpọ, ndien ọdọhọ ete: “Mbọk, mbufo ẹse ẹban̄a owo emi ẹma ẹkesụn̄i+ mi ẹnyụn̄ ẹmen enye ẹkebụk, koro enye edi eyen edidem.”+
35 Ke ini mmọ ẹkade ẹte ikobụk enye, mmọ ikwe n̄kpọ ndomokiet ibọhọke n̄kpọkpọrọ ye ikpat ye ekaubọk esie.+
36 Ke ini mmọ ẹnyọn̄de ẹdisian enye, enye ọdọhọ ete: “Emi edi ikọ oro Jehovah eketịn̄de ebe ke+ asan̄autom esie Elijah owo Tishbeh, ete, ‘Mme ebua ẹyeta obụk Jezebel ke in̄wan̄ Jezreel.+
37 Ndien okpo Jezebel ayakabade edi ifụm+ ke isọn̄ ke in̄wan̄ Jezreel, mbak mmọ ẹdidọhọ ẹte: “Jezebel edi emi.”’”+
