2 Ndidem 4;1-44
4 Ndien n̄wan owo kiet ke otu nditọ+ mme prọfet eseme ọnọ Elisha, ete: “Ebe mi, kpa asan̄autom fo, ama akpa; ndien afo emetịm ọfiọk ete ke asan̄autom fo ekedi owo emi abakde+ Jehovah, ndien owo emi n̄kamade isọn+ emedi nditan̄ nditọ mi mbiba nda nte ifịn.”
2 Ndien Elisha obụp enye ete: “Nnam nso nnọ fi?+ Sian mi; nso ke enyene ke ufọk?” N̄wan oro ọbọrọ enye ete: “Ofụn an̄wan fo inyeneke n̄kpọ ndomokiet ke ufọk ke mîbọhọke ekpeme aran kiet.”+
3 Ndien enye ọdọhọ ete: “Wọrọ keben̄e kpukpru mbọhọidụn̄ fo ukpọk aban̄. Kûben̄e ibat ibat kpọt.
4 Ekem dụk ufọk beri usụn̄, afo ye nditọ fo, ndien tọhọ aran dọn̄ ke kpukpru aban̄ oro nyụn̄ kpọnọde mbon emi ẹyọhọde bon n̄kan̄ kiet.”
5 Ndien n̄wan oro adaha ọkpọn̄ enye.
Ke ini enye eberide usụn̄ abaha idemesie ye nditọ esie, mmọ ẹtan̄ aban̄ ẹsọk enye, ndien enye ọtọhọ aran ọdọn̄ ke mmọ.+
6 Edikem ke ndondo oro mme aban̄ oro ẹyọhọde enye ọdọhọ eyen esie ete: “Men aban̄ efen sọk mi.”+ Edi enye ọbọrọ enye ete: “Aban̄ efen idụhe aba.” Ntem aran oro etre ndiwọrọ.+
7 Ndien enye odụk editịn̄ ọnọ owo ata Abasi oro, ndien enye ọdọhọ enye ete: “Ka kanyam aran oro da kpe isọn+ fo, afo ye nditọ fo ẹnyụn̄ ẹda se isụhọde ẹdu uwem.”+
8 Edikem ke usen kiet, Elisha asan̄a ebe aka Shunem,+ emi ọwọrọetop an̄wan kiet odụn̄de, ndien n̄wan oro akpak+ enye ete awaha edidia udia. Ndien adan̄a nte enye ebebe do, enye akadia udia.
9 Ekem enye ọdọhọ ebe esie+ ete: “Sese, ke emi, mmọfiọk nte ke owo emi esibede mi kpukpru ini edi edisana owo Abasi.+
10 Mbọk, yak nnyịn idiọn̄ ekpri ubet enyọn̄+ ufọk ke ibibene inyụn̄ inịm n̄kpana do ye okpokoro ye n̄kpọitie ye utuenikan̄+ inọ enye; ndien ama ekem, ini ekededi eke enye awahade mi enye oyodu do.”+
11 Edikem, usen kiet nte ido esie edide, enye edi ediwaha ubet enyọn̄ ufọk oro onyụn̄ osụhọde ana do.
12 Ndien enye ọdọhọ Gehazi+ asan̄autom esie ete: “Kot n̄wan Shunem+ oro edi.” Ndien enye okot enye edi ke iso esie.
13 Ndien enye ọdọhọ Gehazi ete: “Mbọk, dọhọ n̄wan oro ete, ‘Sese afo amanam kpukpru n̄waidem emi ọnọ nnyịn.+ Nso ke afo oyom nnyịn inam inọ fi?+ Nte odu se okpoyomde ẹtịn̄ ye edidem+ m̀mê ye etubom+ ekọn̄ ẹnọ fi?’” Ndien n̄wan oro ọbọrọ ete: “Ami ndụn̄ ke otu orụk mi.”+
14 Ndien Elisha obụp Gehazi ete: “Nso ndien ke ikpanam inọ enye?” Gehazi ọbọrọ enye ete: “N̄wan emi inyeneke eyeneren,+ ebe esie onyụn̄ ọsọn̄.”
15 Ndien enye ọdọhọ ete: “Kot n̄wan oro edi.” Ndien enye okot enye, enye onyụn̄ edi edida ke enyịnusụn̄.
16 Ndien enye ọdọhọ ete: “Ini ntem isua efen afo ayaman eyeneren.”+ Edi n̄wan oro ọdọhọ enye ete: “Mbọk, ọbọn̄ mi, O owo ata Abasi! Kûsu nsu unọ ofụn an̄wan fo.”
17 Ekem n̄wan oro oyomo onyụn̄ aman eyeneren+ ke ukem ini oro isua efen, kpa nte Elisha ọkọdọhọde enye.+
18 Eyen oro onyụn̄ ọkọri, ekem usen kiet enye asan̄a ye mbon ukpen̄e+ ebịne ete esie ke in̄wan̄ nte ido esie edide.
19 Ndien enye ọdọhọ ete esie ete: “Ibuot mi-o, ibuot mi-o!”+ Ekem ete esie ọdọhọ asan̄autom esie ete: “Men enye sọk eka esie.”+
20 Ndien enye emen enye ọsọk eka esie. Ndien eyen emi etie eka esie ke edọn̄ tutu esịm uwemeyo, ekem enye akpa.+
21 Ndien n̄wan oro emen enye ọdọk ekenịm ke n̄kpana+ owo ata Abasi+ oro onyụn̄ eberi usụn̄ abaha enye do ọwọrọ.
22 Ndien enye okot ebe esie, onyụn̄ ọdọhọ ete: “Mbọk dọn̄ asan̄autom kiet asan̄a ye uman ass kiet edi, man mfehe n̄kokụt owo ata Abasi nnyụn̄ mfiak nnyọn̄ ndi.”+
23 Edi ebe esie obụp enye ete: “Ntak emi oyomde ndika n̄kokụt enye mfịn-e? Mfịn idịghe obufa ọfiọn̄+ inyụn̄ idịghe sabbath.” Edi enye ọbọrọ enye ete: “Mfịna idụhe.”
24 Ntre n̄wan oro etịm uman ass+ onyụn̄ ọdọhọ asan̄autom esie ete: “Wat san̄. Kûtuak uda ke ntak mi ibọhọke ami ndọhọ fi.”
25 Ndien enye awat edisịm owo ata Abasi oro ke Obot Carmel. Ndien ke ndondo oro owo ata Abasi oro adade okụt enye, enye ọsọsọp ọdọhọ Gehazi asan̄autom esie+ ete: “Sese! N̄wan Shunem oro ko.
26 Mbọk fehe kosobo ye enye nyụn̄ bụp enye ete, ‘Nte ọfọn ye afo? Nte ọfọn ye uberi? Nte ọfọn ye eyen fo?’” N̄wan oro ọbọrọ ete: “Ọfọn.”
27 Ke ini n̄wan oro edide edisịm owo ata Abasi oro ke obot, n̄wan oro ọduọ inikiet inikiet omụm enye ukot.+ Ndien Gehazi asan̄a ekpere ete inụk enye ifep,+ edi owo ata Abasi+ oro akpan enye ete: “Kpọn̄ enye,+ koro esịt mînemke+ enye; ndien Jehovah emedịp+ mi n̄kpọ emi inyụn̄ iyarakede inọ mi.”
28 Ndien n̄wan oro ọdọhọ ete: “Ndi mma mben̄e ọbọn̄ mi nte ọnọ mi eyeneren? Ndi n̄kọdọhọke fi nte, ‘Kûnam ndori enyịn ke se mîdịghe akpanikọ’?”+
29 Inikiet inikiet enye ọdọhọ Gehazi+ ete: “Bọbọ mbọbọ fo ke isịn+ nyụn̄ kama esan̄+ mi ka. Edieke okụtde owo ekededi ke usụn̄, kûkọm enye;+ edieke owo ekededi onyụn̄ ọkọmde fi, kûyere enye. Ndien kodori eyen oro esan̄ mi ke iso.”+
30 Ndien eka eyen oro ọdọhọ ete: “Ma uwem Jehovah,+ ma ukpọn̄ fo+ n̄ko, ami ndikpọn̄ke fi.”+ Ntre enye adaha asan̄a ye enye aka.
31 Ndien Gehazi ebem mmọ iso aka okodori eyen oro esan̄ ke iso, edi eyen oro isioroke uyo inyụn̄ inyehekede idem.+ Ndien enye afiak okosobo ye enye onyụn̄ ọdọhọ ete: “Eyen oro idemekede.”+
32 Ekem Elisha edisịm ufọk oro, ndien sese, eyen oro ama akpa, ẹma ẹnyụn̄ ẹmen enye ẹkedori ke n̄kpana esie.+
33 Ndien enye ebe odụk eberi usụn̄, sụk mmọ mbiba+ ẹdu do, ndien enye ọbọn̄ akam ọnọ Jehovah.+
34 Ekem enye ọdọk aka akana eyen+ oro ke idem onyụn̄ adian inua esie ke inua eyen oro ye enyịn esie ke enyịn eyen oro ye ekaubọk esie ke ekaubọk eyen oro onyụn̄ okûbọ enye ke idem, ndien idem eyen oro ọtọn̄ọ ndifiop.
35 Ekem enye afiak asan̄a ke ufọk oro, asan̄a ini kiet aka n̄kan̄ emi onyụn̄ asan̄a ini kiet aka n̄kan̄ eken, ekem enye ọdọk okûbọ enye ke idem. Ndien eyen oro asia isia utịm ikatiaba, ekem eyen oro atat enyịn.+
36 Ndien enye okot Gehazi onyụn̄ ọdọhọ ete: “Kot n̄wan Shunem+ oro edi.” Enye okot enye ndien enye odụk edisobo ye enye. Ndien enye ọdọhọ enye ete: “Menede eyen fo.”+
37 Ndien n̄wan oro odụk edi ediduọ enye ke ukot onyụn̄ onụhọ ke isọn̄ ọnọ enye,+ ekem enye emenede eyen esie ọwọrọ.+
38 Ndien Elisha afiak ọnyọn̄ Gilgal,+ akan̄+ onyụn̄ odu ke isọn̄ oro. Ndien nditọ+ mme prọfet ẹtie enye ke iso,+ enye onyụn̄ ọdọhọ asan̄autom esie+ ete: “Dori akwa eso utemudia ke ikan̄ nyụn̄ tem udia nọ nditọ prọfet.”+
39 Ekem owo kiet ọwọrọ aka in̄wan̄ nditet ikọn̄ mallow,+ enye onyụn̄ okụt vine ikọt ndien etet mfri esie ọyọhọ ọfọn̄idem esie, onyụn̄ edi edikpok mmọ ọdọn̄ ke eso udia oro, koro mmọ mîmeheke ye mfri emi.
40 Ekem mmọ ẹkọp enye ẹnọ mme owo ẹdia. Ndien ke ndondo oro mmọ ẹdiade udia emi, mmọ ẹfiori ẹte: “O owo ata Abasi,+ n̄kpa mmọmi ke eso+ emi.” Ntre mmọ ikemeke ndidia enye.
41 Ndien enye ọdọhọ ete: “Mbufo ẹda ndomuyo ẹdi.” Ndien enye esịn enye ke eso oro, onyụn̄ ọdọhọ ete: “Ẹkọp ẹnọ mme owo ẹdia.” Ndien baba idiọkn̄kpọ kiet idụhe ke eso+ oro.
42 Ekem owo kiet oto ke Baal-shalishah+ ada+ uyo emi ẹdade akpa mfri eke adatde ẹnam,+ kpa uyo barley edịp,+ ye obufa wheat ke ekpat uyo esie ọsọk owo ata Abasi. Ndien enye ọdọhọ ete: “Men nọ mme owo ẹta.”+
43 Edi asan̄autom esie ọdọhọ ete: “Ndinam didie mmen emi nnịm owo ikie ke iso?”+ Ndien enye ọdọhọ enye ete: “Nọ mmọ ẹdia, koro Jehovah ọdọhọde ete, ‘Mmọ ẹyedia n̄kpọ ẹnyụn̄ ẹtan̄ nyọhọ-nsụhọ.’”+
44 Ndien enye emen enịm mmọ ke iso, mmọ ẹnyụn̄ ẹdia, ẹnyụn̄ ẹtan̄ nyọhọ-nsụhọ kpa nte Jehovah ọkọdọhọde.+
