1 Ndidem 17;1-24
17 Ndien Elijah+ owo Tishbeh emi otode ke otu mme andidụn̄ Gilead+ ọdọhọ Ahab ete: “Ma uwem+ Jehovah Abasi Israel emi ndade+ ke iso esie,* mbara m̀mê edịm+ ididepke ke mme isua emi, ibọhọke ami ndọhọ edep!”+
2 Ndien uyo+ Jehovah esịm enye, ete:
3 “Daha ke ọtọ emi, wọn̄ọde ka n̄kan̄ edem usiahautịn nyụn̄ kedịbe+ ke itịghede mmọn̄ Cherith ke edem usiahautịn Jordan.
4 Ndien afo ọyọn̄wọn̄+ mmọn̄ itịghede oro, nyonyụn̄ ndọn̄ mme raven+ ẹda udia ẹsọk fi do.”+
5 Ke ndondo oro enye adaha akanam kpa nte Jehovah eketemede+ enye, onyụn̄ aka okodụn̄ ke itịghede mmọn̄ Cherith oro odude ke edem usiahautịn Jordan.
6 Ndien mme raven ẹsida uyo ye unam ẹsọk enye ke usenubọk ye mbubreyo, enye onyụn̄ ọn̄wọn̄ mmọn̄ itịghede oro.+
7 Edikem mmọn̄ itịghede oro asat+ ke ndusụk usen ẹma ẹkebe, koro edịm mîkedepke ke isọn̄.
8 Ndien uyo Jehovah edisịm enye, ete:+
9 “Daha ke enyọn̄, ka Zarephath+ emi enyenede Sidon, nyụn̄ kodụn̄ do. Sese! nyọdọhọ n̄wan kiet do, emi edide ebeakpa, esinọ fi udia.”
10 Ntem enye adaha ke enyọn̄ aka Zarephath onyụn̄ ebe odụk inuaotop obio oro; ndien, sese! n̄wan emi edide ebeakpa ke atan̄ ifia do. Mmọdo enye okot n̄wan emi onyụn̄ ọdọhọ ete: “Mbọk, nọ mi esisịt mmọn̄ ke iko n̄n̄wọn̄.”+
11 Ke ini enye adahade aka ndida mmọn̄ ndi, enye ada okot enye onyụn̄ ọdọhọ ete: “Mbọk, da esisịt uyo+ ke ubọk sọk mi.”
12 Ntem n̄wan emi ọdọhọ ete: “Ma uwem+ Jehovah Abasi fo, nnyeneke ekara uyo+ ke mîbọhọke esisịt+ ndomuyo ke akamba aban̄ ye esisịt aran+ ke ekpri aban̄; ndien, sese, ntan̄ ekpri ifia emi man n̄ka n̄kanam se ndidiade ye eyen mi, ndien ima idia oro ima nnyịn ikpan̄a.”+
13 Ndien Elijah ọdọhọ enye ete: “Kûkop ndịk.+ Dụk ufọk, kanam kpa nte afo ọdọhọde. Kam bem iso da se idude nam ekpri ekara uyo da sọk mi,+ ndien ekem afo anam se afo ye eyen fo ẹdidiade.
14 Koro ntem ke Jehovah Abasi Israel ọdọhọ, ‘Ndomuyo idikụreke ke akamba aban̄, aran idinyụn̄ isatke ke ekpri aban̄ tutu esịm usen emi Jehovah anamde edịm edep ke iso isọn̄.’”+
15 Mmọdo enye aka akanam kpa nte Elijah eketemede enye; ndien n̄wan oro aka iso adia udia ye enye ye ubon esie ke ediwak usen.+
16 Ndien ndomuyo ikụreke ke akamba aban̄, aran inyụn̄ isatke+ ke ekpri aban̄, kpa nte Jehovah akadade Elijah etịn̄.
17 Edikem ke mme n̄kpọ emi ẹma ẹkebe eyen n̄wan emi, oro edi, mma enyeneufọk emi, ọduọ udọn̄ọ ata idiọk idiọk tutu ibifịk okụre enye ke idem.+
18 Ntem n̄wan emi ọdọhọ Elijah ete: “Ami nsan̄a nso ye afo,+ O owo ata Abasi? Afo emedi ndinam mi nti+ ndudue mi ndinyụn̄ n̄wot eyen mi.”
19 Edi enye ọdọhọ n̄wan oro ete: “Nọ mi eyen fo.” Ndien enye odorode eyen oro ke ikpanesịt esie emen ọdọk aka ubet enyọn̄+ ufọk emi enye odụn̄de, akayak enịm ke n̄kpana+ esie.
20 Ndien enye eseme okot Jehovah ete: “O Jehovah Abasi mi,+ ndi ebeakpa emi ami ndụn̄de ke ufọk esie nte esenowo ke afo onyụn̄ ada idiọk etiene enye ke ndiwot eyen esie?”
21 Ndien enye anyanade odoro eyen+ oro ke idem utịm ikata onyụn̄ eseme okot Jehovah ete: “O Jehovah Abasi mi, mbọk, nam uwem*+ eyen emi afiak odụk enye idem.”
22 Ekem Jehovah okop uyo Elijah,+ uwem* eyen oro onyụn̄ afiak edidụk enye idem, ndien enye odu uwem.+
23 Elijah emen eyen oro ke ubet enyọn̄ ufọk osụhọde edidụk ufọk onyụn̄ ọkpọn̄ ọnọ eka esie; ndien Elijah ọdọhọ ete: “Sese, eyen fo omodu uwem.”+
24 Ntem n̄wan oro ọdọhọ Elijah ete: “Ke akpanikọ, mmọfiọk ke emi nte ke afo edi owo Abasi+ ye nte ke ikọ Jehovah emi odude fi ke inua edi akpanikọ.”+
