1 Chronicle 17;1-27
17 Edikem ke ndondo oro David odụn̄de ke ufọk esie,+ David ọdọhọ prọfet Nathan+ ete: “Sese, ami ndụn̄ ke ufọk emi ẹdade cedar+ ẹbọp, edi ekebe+ ediomi Jehovah odu ke tent emi ẹdade ọfọn̄ ẹnam.”+
2 Ntem Nathan ọbọrọ David ete: “Nam kpukpru se idude fi ke esịt,+ koro ata Abasi odude ye afo.”+
3 Edikem ke okoneyo oro uyo+ Abasi esịm Nathan, ete:
4 “Ka kọdọhọ David asan̄autom mi ete, ‘Ntem ke Jehovah ọdọhọ ete: “Idịghe afo edibọp ufọk eke ndidụn̄de ọnọ mi.+
5 Koro ami mmendụn̄ke ke ufọk toto ke usen oro n̄kadade Israel ndọk ndi tutu esịm mfịn emi,+ edi nsụk ndụn̄ to ke tent kiet sịm efen, ye to ke tent utuakibuot+ kiet sịm en̄wen.+
6 Ke ofụri ini oro n̄kasan̄ade+ n̄kanade ofụri Israel, nte mma ntịn̄ baba ikọ kiet ye ebiereikpe ndomokiet ke Israel oro n̄kowụkde nte ekpeme ikọt mi, nte, ‘Ntak emi mbufo mîdaha cedar ibọp ufọk inọ mi?’”’+
7 “Ndien, ke emi, dọhọ asan̄autom mi David, ete, ‘Ntem ke Jehovah mme udịm ọdọhọ ete: “Ami n̄kosio fi ke in̄wan̄ mbiet ufene, nnam etre nditiene otuerọn̄+ man akabade edi adausụn̄+ ọnọ ikọt mi Israel.
8 Ndien ami nyodu ye afo ke ebiet ekededi eke afo edisan̄ade,+ nyonyụn̄ nsịbe kpukpru mme asua+ fo mfep ke iso fo, nnyụn̄ nnam enyịn̄+ nnọ fi, eke ebietde enyịn̄ ikpọ owo emi ẹdude ke isọn̄.+
9 Ami nyonyụn̄ mmek itie nnọ ikọt mi Israel nnyụn̄ ntọ mmọ do,+ ndien mmọ ẹyedụn̄ ke ebiet emi mmọ ẹdude, owo idinyụn̄ ifịnake mmọ aba; ndien nditọ ukwan̄ido+ iditọn̄ọke aba ntak inam mmọ ẹkpa mba nte ẹkenamde ke akpa,+
10 kpa nte ẹkenamde toto ke mme usen emi n̄kemekde mme ebiereikpe+ nnịm nte ẹse ẹban̄a ikọt mi Israel. Ami nyonyụn̄ nsụhọde kpukpru mme asua fo nnịm.+ Ndien ndọhọ fi nte, ‘Jehovah ọyọbọp ufọk ọnọ fi n̄ko.’+
11 “‘“Ndien ama ekem ke ini usen ekemde afo ndikpa ntiene mme ete ete fo,+ ami nyanam mfri fo etiene fi edem adaha ada, emi edidide kiet ke otu nditọ fo,+ ndien ami nyanam itie edidem esie ọsọn̄ọ ada.+
12 Enye edibọp ufọk ọnọ mi,+ ndien ami nyanam ebekpo esie ọsọn̄ọ owụhọ ke nsinsi.+
13 Ami nyedi ete esie,+ enye oyonyụn̄ edi eyen mi;+ ndien ami ndiyakke ima-mfọnido mi ọkpọn̄ enye+ nte n̄kanamde ọkpọn̄ enye emi ekebemde fi iso.+
14 Ndien ami nyanam enye odu ke ufọk+ mi ye ke itie edidem+ mi ke nsinsi, ebekpo+ esie oyonyụn̄ ebịghi ke nsinsi.”’”
15 Ndien Nathan emen kpukpru ikọ emi ye kpukpru n̄kukụt emi eketịn̄ ọnọ David.+
16 Ekem Edidem David odụk edisụhọde etie ke iso Jehovah+ onyụn̄ ọdọhọ ete: “O Jehovah Abasi, ami ndi anie,+ ufọk+ mi onyụn̄ edi nso eke afo anamde ofụri n̄kpọ emi ọnọ mi?+
17 Nte n̄kpọ eke emi edide ekpri n̄kpọ ke enyịn fo,+ O Abasi,+ afo emetịn̄ n̄ko aban̄a ufọk asan̄autom fo tutu esịm anyan ini ko ke iso,+ afo omonyụn̄ ese mi nte owo eke odude ke edikon̄ itie,+ O Jehovah Abasi.
18 Nso efen ke David ekpetịn̄ ye afo ke ukpono emi afo okponode asan̄autom fo,+ ke adan̄aemi edide afo emetịm ọdiọn̄ọ asan̄autom fo?+
19 O Jehovah, ke ntak asan̄autom fo ye nte asan̄ade ekekem ye se idude fi ke esịt+ ke afo anam kpukpru ikpọ n̄kpọ emi ke ndinam ẹdiọn̄ọ kpukpru ikpọ edinam fo.+
20 O Jehovah, idụhe eke ebietde fi,+ Abasi efen inyụn̄ idụhe ke mîbọhọke afo+ ke otu kpukpru se nnyịn idade utọn̄ nnyịn ikop.
21 Ndien ewe idụt efen ke isọn̄ ebiet ikọt fo Israel,+ emi ata Abasi akafakde nte ikọt ọnọ idemesie,+ man afo anam enyịn̄ ọnọ idemfo ke ndinam ikpọ+ ye mme enyene-ndịk n̄kpọ, ke ndibịn mme idụt+ mfep ke iso ikọt fo emi afo akafakde osio ke Egypt?
22 Ndien afo amanam ikọt fo Israel ẹdi ikọt+ fo ke nsinsi, ndien afo, O Jehovah, amakabade edi Abasi mmọ.+
23 Ndien, ke emi, O Jehovah, yak ikọ emi afo etịn̄de aban̄a asan̄autom fo ye ufọk esie ada ke nsinsi, nyụn̄ nam kpa nte afo ọdọhọde.
24 Ndien yak enyịn̄+ fo ọsọn̄ọ ada onyụn̄ okpon+ ke nsinsi, mme owo ẹnyụn̄ ẹdọhọ ẹte, ‘Jehovah mme udịm,+ kpa Abasi Israel+ edi Abasi ọnọ Israel,’+ ndien yak ufọk David asan̄autom fo onyụn̄ odu ebịghi ke iso fo.+
25 Koro afo, Abasi mi, amayarade uduak fo ọnọ asan̄autom fo ete ke iyọbọp ufọk inọ enye.+ Ntak edi oro asan̄autom fo adade ifet emi ọbọn̄ akam ke iso fo.
26 Ndien, ke emi, O Jehovah, afo edi ata Abasi,+ omonyụn̄ ọn̄wọn̄ọ ndifọn mfọn emi ye asan̄autom fo.+
27 Ndien, ke emi, mbọk, diọn̄ ufọk asan̄autom fo man enye osụk odu fi ke iso ke nsinsi;+ koro afo, O Jehovah ọmọdiọn̄, ndien edidiọn̄ emi oyodu ke nsinsi.”+
