Be ka se isịnede

SE IDIN̄WAMDE UBON | NDỌ

Ndise Ndise Idan̄ Ekeme Ndibiat Ndọ Fo

Ndise Ndise Idan̄ Ekeme Ndibiat Ndọ Fo

 N̄wan esie ama edidiọn̄ọ se enye esidibede anam. Enye ama ekpe ubọk, onyụn̄ ọdọhọ n̄wan esie ke imọ idinamke aba. Ekem afiak anam, n̄wan esie onyụn̄ afiak omụm enye, enye osụk ada ke n̄kpeubọk, n̄kpọ oro osụk aka iso ntre.

 Ndi utọ n̄kpọ oro ọwọrọ fi? Ekpedi ntre, ana ọdiọn̄ọ ke ndisise ndise idan̄ ekeme ndifịna n̄wan m̀mê ebe fo, ana onyụn̄ ọdiọn̄ọ se akpanamde man etre utọ n̄kpọ oro. a

Ke ibuotikọ emi

 Se akpanade ọdiọn̄ọ

 Ndise ndise idan̄ ekeme ndibiat ndọ. Esinam an̄wan asua ebe, ebe onyụn̄ asua n̄wan esie. Esinyụn̄ anam owo ẹkere ke ebe m̀mê n̄wan imọ inamke akpanikọ aba. b

 Mme n̄kpọ oro ẹtienede mi ekeme nditịbe nnọ n̄wan emi ebe esie esisede ndise idan̄:

  •   Ekere ke ebe imọ abian̄a imọ. N̄wan emi ekerede Sarah ọdọhọ ete, “Editie nte ebe mi esịn efịbe ke ubọk ke ubọk.”

  •   Ekere ke imọ ikemke ebe imọ. N̄wan kiet ọdọhọ ke ebe imọ ndisikọbọ nse ndise idan̄ ama anam imọ ikere ke imọ “iyehe aba, bụt esinyụn̄ anam imọ.”

  •   Idaha enye nte owo akpanikọ aba. N̄wan kiet emi ekerede Helen ọdọhọ ete, “N̄kesiyoyom ndidiọn̄ọ kpukpru se ebe mi anamde.”

  •   Editịmede esịt. N̄wan kiet emi ekerede Catherine ọdọhọ ete, “Nditie n̄kpa ekikere ke se ebe mi akanamde ikayakke ndiọn̄ọ se n̄kpanamde.”

 Kere ise: Bible ọdọhọ ebe ama n̄wan esie. (Ephesus 5:25) Ndi enye anam oro, edieke enye ayakde ekededi ke otu n̄kpọ ibatde do etịbe ọnọ n̄wan esie?

 Se akpanamde

 Imemke utom nditre ndisise ndise idan̄. N̄wan kiet emi ekerede Stacey ọdọhọ ete, “Ebe mi ama etre ndin̄wọn̄ sika, ikọn̄ekpo ye ọkpọsọn̄ mmịn, edi ama ọsọn̄ enye nditre ndise ndise idan̄.”

 Ekpedi ukem n̄kpọ oro ọwọrọ fi, se idibatde emi ayan̄wam fi etre ndisise ndise idan̄.

  •   Diọn̄ọ se inamde ndise ndise idan̄ ọdiọk. Ndise ndise idan̄ esinam owo aka akanam n̄kpọ emi enye ekerede ke ayanam imọ ikop inemesịt. Oro ọwọrọ ke enye ekere aban̄a idemesie kpọt. Emi isiyakke ima odu ke ubon, onyụn̄ esinam owo ekere ke ebe m̀mê n̄wan imọ inamke akpanikọ aba, ndien ndọ oro idinyụn̄ inemke. Utọ n̄kpọ emi onyụn̄ owụt ke owo oro ikponoke Jehovah Abasi emi ọkọtọn̄ọde ndọ.

     Se Bible etịn̄de: “Yak ẹkpono ndọ.”​—Mme Hebrew 13:4.

  •   Nyịme ke emedue. Kûdọhọ, ‘N̄kpesisehe ndise idan̄, ekpedi n̄wan mi ama enen̄ede owụt ke imama mi.’ Kûduọhọ n̄wan fo, sia oro ekeme ndinam esifiak ese ndise idan̄, edieke enye anamde se mûmaha.

     Se Bible etịn̄de: “Idomo esịm owo kiet kiet ke ini udọn̄ idemesie odụride onyụn̄ atapde enye.”​—James 1:14.

  •   Sitịn̄ ofụri se ifịnade fi nọ ebe m̀mê n̄wan fo. Ebe kiet emi ekerede Kevin ọdọhọ ete: “Nsineme nneme kpukpru usen ye n̄wan mi. Mmesibụp enye m̀mê odu se nsisede emi afịnade enye? Emi anam n̄wan mi okụt ke ndịpke enye n̄kpọ ndomokiet.”

     Se Bible etịn̄de: ‘Nnyịn iyom ndinam akpanikọ ke kpukpru n̄kpọ.’​—Mme Hebrew 13:18.

  •   Kpeme se anamde kpukpru ini. Ekeme ndifiak ndọn̄ fi ndisise ndise idan̄, idem ke ama eketre ke ediwak isua. Kevin emi iketịn̄de iban̄a ọdọhọ ete: “Mma ntre ndisise ndise idan̄ ke ofụri isua duop nnyụn̄ n̄kere ke mfịna enye oro ofụt ebe. Edi udọn̄ oro ke okosụk esesịne mi ke idem, ebet usen ndisio iso nnyan.”

     Se Bible etịn̄de: “Yak owo eke ekerede ete imọ imọsọn̄ọ ida ekpeme mbak enye ediduọ.”​—1 Corinth 10:12.

  •   Edieke ọdọn̄de fi ndinam se mîfọnke, mụm idem kama. Kpa ye oro mûdukemeke nditre idiọkn̄kpọ ndidọn̄ fi, edi emekeme ndibiere m̀mê ayanam m̀mê udûnamke. Udọn̄ oro eyetre, edieke esidomode ndikere n̄kpọ en̄wen.

     Se Bible etịn̄de: “Man owo mbufo kiet kiet ọkpọfiọk nte akpakarade ndido esie ke edisana ido ye ukpono, idịghe ke idiọk udọn̄ idan̄.”​—1 Thessalonica 4:4, 5.

  •   Kûnam n̄kpọ emi edinamde fi afiak ọtọn̄ọ ese ndise idan̄. N̄wed kiet emi ẹkotde Willpower’s Not Enough, ọdọhọ ete, “Ndinam n̄kpọ emi edinamde akanam se mîfọnke etie nte ndisịn ikan̄, ekpesịn ekpri petrol do, ikan̄ oro oyobụbede asak.”

     Se Bible etịn̄de: “Kûyak orụk idiọkn̄kpọ ekededi akara mi.”​—Psalm 119:133.

  •   Kûduọk idotenyịn. Ekeme ndida ediwak ini, idem ediwak isua ndinam yak ebe m̀mê n̄wan fo afiak ada fi nte owo akpanikọ. Edi ediwak ebe ye n̄wan ẹdọhọ ke emi ekeme nditịbe.

     Se Bible etịn̄de: “Ima enyenyene anyanime.”​—1 Corinth 13:4.

a Kpa ye oro ibuotikọ emi etịn̄de aban̄a mme ebe, se ẹnemede emi ebehe iban oro ẹsisede ndise idan̄ n̄ko.

b Ndusụk mme ebe ye n̄wan ẹdọhọ ke ndisitie kiet nse ndise idan̄ ekeme ndinam mmọ ẹnen̄ede ẹma idemmọ. Edi se mmọ ẹtịn̄de emi ikemke ye se Bible ekpepde.​—Mme N̄ke 5:15-20; 1 Corinth 13:4, 5; Galatia 5:22, 23.