Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

N̄KPARAWA OWO ẸBỤP

Nso ke N̄kpanam Edieke Nnyenede Udọn̄ọ?—Ikpehe 2

Nso ke N̄kpanam Edieke Nnyenede Udọn̄ọ?—Ikpehe 2

Udọn̄ọ edi ke utọ ke utọ.

  • Ndusụk edi ama okụkụt owo afo ọdiọn̄ọ ke ọdọdọn̄ọ, edi ndusụk, owo mîtịn̄ke inọ fi ududiọn̄ọke.

  • Ndusụk edi ama abiak owo, ekem ayak, edi ndusụk ododụn̄ owo ke idem onyụn̄ ofiomo owo kpukpru usen.

  • Ndusụk ẹkeme ndikọk mîdịghe ẹyọ, edi ndusụk edi eyo esiere, ọdiọk aka—onyụn̄ ekeme ndida owo ibuot ke akpatre.

Idụhe enye emi mme uyen mîdọn̄ọke ke otu se isụk ibatde emi. Ke ibuotikọ emi, uyen inan̄ emi ẹnyenede utọ mfịna emi ẹyetịn̄ nte etiede mmọ ke idem. Se mmọ ẹditịn̄de ekeme ndin̄wam fi edieke enyenede udọn̄ọ.

 GUÉNAELLE

Esibiak mi etieti nte mmen̄kemeke ndinam se n̄kpamade ndinam. Esidọn̄ mi ndinam ediwak n̄kpọ, edi nnam n̄kpọ ntiene nte idem mi etiede ke usen ke usen.

Ndọn̄ọ udọn̄ọ emi esitịmerede esịp ye mfre mi. Esidi mfre mi ekere n̄kpọ aka n̄kan̄ emi, idem mi anam n̄kpọ aka n̄kan̄ oko. Ndusụk ini, nsio nsio n̄kpọ ke idem mi, ọtọn̄ọde ke ibuot esịm ikpat, ekeme ndinyek ntem mîdighe akpa. Utọ n̄kpọ nte ndisan̄a isan̄, nditịn̄ ikọ, ndikot n̄wed, ndiwet n̄kpọ, m̀mê ndifiọk se ikọ owo ọwọrọde ọsọsọn̄ mi. Ama ọsọn̄ akaha ye ami, mbiowo ke esop nnyịn ẹsidi ẹdibọn̄ akam ẹnọ mi. Ẹma ẹbọn̄ ẹma, inikiet inikiet esịt ayana mi sụn̄.

Ke kpukpru se iwọrọde mi emi, Jehovah Abasi esisọn̄ọ mi idem. Nyomke udọn̄ọ akpan mi ndinam n̄kpọ Abasi nte n̄kpanamde. Mmesikpep mbon en̄wen ke Bible ọdọhọ ke ibịghike Jehovah Abasi ayanam isọn̄ emi edi Paradise, ndien ke mme owo idibọhọ ufen aba.Ediyarade 21:1-4.

Kere ise: Didie ke ikpan̄wam mbon en̄wen nte Guénaelle akan̄wamde?1 Corinth 10:24.

 ZACHARY

Ke ini n̄kedide isua 16, mma nnyene kansa mfre. Mme dọkta ẹkedọhọ mi ke ọfiọn̄ itiaita ama ebe ke nyakpa. Tọn̄ọ oro ke ntetịme m̀mê nyokụt uwem ndu.

Udọn̄ọ emi owot mi n̄kan̄ nnasia idem ofụri ofụri. Ana owo odu ke ufọk kpukpru ini man an̄wam mi nnam se nyomde ndinam sia mmen̄kemeke ndisan̄a ke idem mi.

Idem mi ke ọdiọk aka; idahaemi n̄kemeke nditịn̄ ikọ ọfọn aba. Mma nsibre basketbọl, vọlibọl, nnyụn̄ nda ubom mbre mbre ke mmọn̄. Ndi Ntiense Jehovah, mma nsinyụn̄ n̄ka n̄kọkwọrọ ikọ nnọ mme owo. Imemke utom ndidi owo do eketie etise enye ikemeke aba ndinam mme n̄kpọ emi ẹnemde enye. N̄kereke ke se iwọrọde mi an̄wan̄a ediwak owo.

Se Isaiah 57:15 etịn̄de esidọn̄ mi esịt koro enye anam mi mfiọk ke Jehovah Abasi ama mi, ye nte ke enye isifreke mbon emi ‘spirit mmọ anuahade.’ Isaiah 35:6 anam mi mfiọk n̄ko ke Jehovah ayanam mi mfiak nsan̄a man nnam n̄kpọ nnọ enye.

Okposụkedi emi esisọn̄de mi ndusụk ini ndiyọ utọ udọn̄ọ emi, mmenịm ke Jehovah ke an̄wam mi. Mmesibọn̄ akam nnọ enye ke ini idem ememde mi m̀mê ke ini ndịk anamde mi ke ntak udọn̄ọ mi emi nnyụn̄ ntịn̄ nnọ enye nte etiede mi ke idem. Inyeneke n̄kpọ ndomokiet emi ekemede ndinam mi ntre ndima Jehovah.Rome 8:39.

Zachary ama akpa ke ini edide isua 18, oro edi ọfiọn̄ iba ke enye ama eketịn̄ ikọ emi. Tutu esịm usen n̄kpa esie, enye okosụk enenịm ke Abasi ayanam imọ iset ididu ke Paradise ke isọn̄.

Kere ise: Didie ke akam ekeme ndin̄wam fi aka iso ama Abasi, nte akan̄wamde Zachary?

 ANAÏS

Ke ini n̄kedide eyen usen ifan̄ kpọt, iyịp ama ọwọrọ mi ke esịt mfre. N̄kpọ emi ama abiat mi idem, akpan akpan ukot mi mbiba.

Idahaemi, mmekeme ndikama eto nsan̄a ekpri, edi ediwak ini n̄kpọitie mbon n̄kpọnnam esin̄wam mi n̄keme ndinam se nyomde ndinam. Ndusụk ini, esidiọk tutu n̄kemeke ndiwet n̄kpọ.

Usọbọ emi ẹnọde mi esinam uwem ọsọn̄ ye ami n̄ko. N̄kpere ndika ufọkibọk kpukpru usen nnyụn̄ ntịghi aba m̀mê n̄kọtọn̄ọ isua ewe n̄ka. N̄kedi isua ition akpa ini emi n̄kasiakde idem. Tọn̄ọ oro mmasiak idem ikata kan̄a. Akpatre usiakidem ye enye emi n̄kanamde mbemiso oro ikememke. Ke ini nsiakde idem mma, mma nyom itie n̄kodu kan̄a ọfiọn̄ ita man idem ọsọn̄ mi mbemiso mfiakde nnyọn̄ ufọk.

Mbonufọk nnyịn ẹn̄wam mi etieti. Mmọ ẹsinam mi nsak imam ndien emi esin̄wam mi ke ini idem ememde mi. Eka mi ye nditọeka mi iban ẹsibana mi idem man ntiene nye sia mmen̄kemeke ndinam emi ke idem mi. Inemke mi nte mmen̄kemeke ndisịne anyan ikpaukot. Ini emi n̄kedide eyenọwọn̄, mma ndomo ndisịne. Mma ntan̄ ubọk ndọn̄ ke anyan ikpaukot nnyọni. Ekedi ata n̄kpọ imam.

Nyakke ekikere udọn̄ọ mi emi emen mi emen. Ke n̄kpep ndisem nsio nsio usem. Se n̄kpamade n̄kan edi ndibre mbre ke mmọn̄ m̀mê ke snow edi sia udọn̄ọ mîyakke, nsiwọk ewọk. Ami ndi Ntiense Jehovah ndien mmesima ndikwọrọ Ikọ Abasi nnọ mbon en̄wen. Etie mi nte mme owo ẹsinen̄ede ẹkpan̄ utọn̄ mma n̄kwọrọ ikọ nnọ mmọ.

Ke ini n̄kedide eyenọwọn̄, ete mi ye eka mi ẹma ẹdọhọ mi ke udọn̄ọ emi ididịghe ke nsinsi. Tọn̄ọ oro, mmọbuọt idem ke Jehovah nnyụn̄ nnịm ke usen kiet enye ayanam kpukpru ufen etre, kpa ye ufen emi mbọde. Mme n̄kpọ ntem ẹsisọn̄ọ mi idem.Ediyarade 21:3, 4.

Kere ise: Akpanam nso mbak ekikere udọn̄ọ fo idimen fi imen, nte Anaïs anamde?

 JULIANA

Mmenyene udọn̄ọ emi esifịnade mi ke esịt, obufre, ye iyịp. Udọn̄ọ emi odụk ekpụt mi idahaemi.

N̄kedi isua duop ke ini ẹkedọhọde mi ke ndọn̄ọ lupus. Udọn̄ọ emi asan̄a ye ubiak. Esikak mi ke idem. Esinyụn̄ edi ke n̄kop inemesịt ekem ntọn̄ọ ndifụhọ. Ndusụk ini, esitie mi nte n̄wọrọke n̄kpọ.

Ke ini n̄kedide isua 13, Ntiense kiet ama edi ufọk nnyịn edikwọrọ ikọ. Enye ama okot Isaiah 41:10 emi Jehovah Abasi ọdọhọde ete: “Kûkop ndịk, koro ami ndude ye afo. . . . Ami nditreke ndida ubọk nnasia edinen ido mi nsọn̄ọ mmụm fi n̄kama.” Ini oro ke n̄kọtọn̄ọ ndikpep Bible ye Mme Ntiense Jehovah. Isua itiaita ẹdi emi tọn̄ọ n̄kọtọn̄ọ ndinam n̄kpọ Abasi ke ofụri esịt. Mmebiere ke ndiyakke udọn̄ọ emi akpan mi ndinam se n̄kpanamde. Mmenịm ke Jehovah ọnọ mi “odudu eke ebede ukeme owo,” man n̄ka iso n̄kop inemesịt.2 Corinth 4:7.

Kere ise: Didie ke Isaiah 41:10 ekeme ndin̄wam fi aka iso okop inemesịt, nte akan̄wamde Juliana?