Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Akpana Ntre Ndika N̄wed

Akpana Ntre Ndika N̄wed

Se se anade ekere aban̄a

Ibet idụt mbufo ọdọhọ ẹbiat isua ifan̄ ke ufọkn̄wed? Ndi amaka n̄wed esịm ibat isua oro? Edieke ofụmide item Bible emi ọdọhọde “ẹsụk ibuot ẹnọ odudu oro okponde akan” onyụn̄ ọkpọn̄de ufọkn̄wed mbemiso esịmde isua oro ukara ẹnịmde, ọwọrọ etre n̄wed uken̄.—Rome 13:1.

Ndi emenyene se ikanamde fi aka n̄wed? Nso ikanam aka ufọkn̄wed? Ndi ufiọkke? Akpana ọfiọk! Edieke mûfiọkke, afo ebiet owo emi odụkde tren edi ifiọkke ebiet emi enye akade. Ntre sụhọde tetie ye ete ye eka fo neme ikpehe oro “ Se Inamde N̄ka N̄wed,” ke idak emi. Edieke ọkpọn̄de ufọkn̄wed mbemiso enyenede se ikanamde fi aka n̄wed, ọwọrọ etre n̄wed uken̄.

Nditre n̄wed uken̄ etie nte ndifrọ n̄wọrọ ke tren mbemiso esịmde ebiet emi akade

Ntak emi nyomde nditre n̄wed? Ekeme ndidi ekewet ke iyom nditre n̄wed man an̄wam ubon mbufo ke okụk m̀mê man anam utom unyịmesịt. Idiọk ntak ẹkeme ndidi mbak udutie udomo udunyụn̄ unam utomufọk. Ata akpan n̄kpọ edi ndibiere se ikam inamde oyom nditre n̄wed, ndinyụn̄ mfiọk m̀mê edi eti ntak m̀mê idiọk. Edieke etrede n̄wed man ọbọhọ mfịna, ekeme ndidi se iditịbede ayakpa fi idem.

Nditre n̄wed uken̄ etie nte ndifrọ n̄wọrọ ke tren mbemiso esịmde ebiet emi akade. Ekeme ndidi umaha nte n̄kpọ etiede ke esịt tren oro, onyụn̄ ekeme ndidi mbon oro ẹsịnede ye afo imaha fi. Edi edieke ọfrọde ọwọrọ ke tren, udusịmke ebiet emi akade, omonyụn̄ ekeme ndinen̄ede nda unan. Ukem ntre, edieke etrede n̄wed uken̄, ekeme ndidi udûsọpke unyene utom. Idem edieke enyenede, ekeme ndidi owo idikpehe fi ọfọn nte emi ẹkpekpede edieke okpokokụrede n̄wed.

Utu ke nditre n̄wed uken̄, nyene ime nyụn̄ se ban̄a mme mfịna oro osobode ke ufọkn̄wed. Edieke anamde emi, eyekeme ndinyene ime oyonyụn̄ ekeme ndise mban̄a utọ mfịna oro ama anam utom.

 Se Inamde N̄ka N̄wed

Kiet ke otu akpan ntak oro anamde aka n̄wed edi man enyene utom emi edidade ese aban̄a idemfo ye ubon fo. (2 Thessalonica 3:10, 12) Ndi emebiere orụk utom emi akpamade ndinam, ndien didie ke akpada ini oro odude ke ufọkn̄wed eben̄e idem ọnọ oro? Man ọfiọk m̀mê se ekpepde ke ufọkn̄wed ayanam enyene se ikanamde aka n̄wed, bọrọ mme mbụme oro ẹtienede mi:

  • Nso ke n̄keme ndinam? (Ke uwụtn̄kpọ, ndi emesidian idem ye mbon en̄wen? Ndi emesida ubọk fo anam utom m̀mê ndida ifiọk ibuot fo nsio mbufa n̄kpọ ndi? Ndi emekeme ndidiọn̄ n̄kpọ? Edieke n̄kpọ etịbede, ndi ekpekeme ndidụn̄ọde se iketịbede oro nnyụn̄ ntịn̄ nte ẹkpekọkde mfịna oro?)

  • Utom ewe ediyak nnam mme n̄kpọ emi n̄kemede ndinam mi?

  • M̀mọ̀n̄ ke n̄keme ndinyene utom ke edem nnyịn?

  • Nso ke n̄kpep idahaemi man n̄kpenyene utom oro nyomde?

  • Nso n̄kpọ en̄wen ke n̄kpekpep man nnyene se nyomde uforo uforo?

Ti ke aka n̄wed man ọbọ ukpep oro edinyenede ufọn ọnọ fi ke ama okokụre n̄wed. Ntre kûka n̄wed ke nsinsi! Emi ekpetie nte owo ndidụk tren ndien inyịmeke ndiwọrọ sia mîyomke ndikanam utom ke ufọk.

 

Kpep N̄kpọ En̄wen

N̄kparawa Owo Ẹbụp, Eboho 1

Ẹneme ibuotikọ nte n̄kpọsọn̄ mmịn ye n̄kpọsọn̄ ibọk, idan̄, uwọrọ an̄wa ye uyom ima.