Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

N̄KPARAWA OWO ẸBỤP

Nso ke N̄kpọdiọn̄ọ Mbemiso Nnọde Owo Etop ke Telefon?

Nso ke N̄kpọdiọn̄ọ Mbemiso Nnọde Owo Etop ke Telefon?
  • :-) Ndida fon nnọ mme owo etop ekeme ndinen̄ede mfọn edieke ọdiọn̄ọde se anamde.

  • :-( Edi edieke mûkpemeke, se afo ewetde ekeme ndibiat fi enyịn̄ inyụn̄ iyakke mme owo ẹnam aba ufan ye afo.

 Utọ owo emi ọkpọnọde etop

Akpan usụn̄ kiet emi ediwak n̄kparawa ye n̄kaiferi ẹdade ẹneme nneme idahaemi edi ndinọ owo etop ke fon. Emekeme ndida fon nnọ owo ekededi emi ọdiọn̄ọde etop ibọhọke ete ye eka fo inyịmeke.

“Ete mi isimaha ami ye udun̄wan eka mi ineme nneme ye n̄kparawa ke fon. Enye ọdọhọ edieke isụk iyomde ndineme, yak ineme ke ufọtufọk ke ini mme owo ẹdude.”—Lenore.

Se anade ọfiọk: Edieke edide ama okokụt owo afo ọnọ nọmba fo, emekeme ndikot edịm mbọn̄ idem.

“Edieke edide ama okokụt owo afo ọnọ nọmba fo, ben̄e idem ndibọ etop m̀mê ndise emi mûdumaha.”—Scott.

“Edieke akparawa esiwakde ndinọ n̄kaiferi etop ke fon, ima ekeme ndisọsọp ndụk enye ibuot tutu mîkwe enye itiehe. Ntre n̄ko ke edi ye n̄kaiferi emi esiwakde ndinọ akparawa etop ke fon.”—Steven.

Bible ọdọhọ ete: Owo mbufiọk ada okụt afanikọn̄ ndien edịbe.” (Mme N̄ke 22:3) Edieke ekpemede se anamde, ududụkke mfịna.

Se iketịbede: Mma nnen̄ede mmehe ye akparawa kiet, nsinọ enye etop ke fon kpukpru ini, enye onyụn̄ ọnọ mi. N̄kọdọhọ ke nnyịn inyụn̄ idi ufan. Ntre, n̄kekere ke inyeneke se idiọkde do tutu usen kiet, akparawa emi ọdọhọ ke imama mi. N̄kpọfiọk n̄kpekemeheke ntre ye enye m̀mê ndinọ enye ofụri etop oro n̄kesinọde.—Melinda.

Kere ise: Afo ekere ke Melinda edida akparawa oro didie idahaemi? Ndi edisụk ida enye nte ufan?

Fiak kere ise: Nso ke Melinda akpakanam mbak owo mmọ ndomokiet idinyene n̄kpọ ke esịt?

 Utọ etop emi ọkpọnọde owo

Esimem utom ndinọ owo etop ke fon, esinyụn̄ enem ndibọ. Edi mme owo isitịghi ke etop emi inọde owo ekeme ndinam owo ekere n̄kpọ en̄wen.

Se anade ọfiọk: Etop emi ọnọde owo ke fon ekeme ndinam owo ekere n̄kpọ emi afo mûkukereke.

“Etop fon ekeme ndinam owo ekere ke amama imọ ke ini mûkereke-kere utọ n̄kpọ oro.”—Briana.

‘Mmọfiọk n̄kaiferi emi etop emi mmọ ẹsinọde n̄kparawa ke fon anamde mme owo ẹda mmọ nte ndiọi nditọ.’—Laura.

Bible ọdọhọ ete: Nti owo ẹsitetie ẹkere n̄kpọ kan̄a mbemiso ẹbọrọ.” (Mme N̄ke 15:28, Good News Translation) Nso ke emi ọwọrọ? Ọwọrọ ke ekpenyene ndikot mfiak n̄kot etop emi ewetde mbemiso ọnọde owo.

 Ini emi ọkpọnọde owo etop

Emekeme ndida ifiọk emi Abasi ọnọde fi ebiere ini emi ọkpọnọde owo etop ye ini emi mûkpọnọhọ.

Se anade ọfiọk: Edieke mûdiọn̄ọke ini emi ọkpọnọde owo etop, mme owo ẹdikere ke udiọn̄ọke idem m̀mê ke usukponoke owo, ndien emi idiyakke enyene ufan.

“Owo ekeme ndisọp mfre ini emi enye mîkpọnọhọ owo etop ke fon. Ndusụk ini esidi ke nneme nneme ye owo mîdịghe ke ndia udia ye owo, ke nnọ owo etop ke fon.”—Allison.

“Ndiọkn̄kan edi ndinọ owo etop ke ini osụk awatde moto sia emekeme ndiwot idem m̀mê owo en̄wen ekpri sekon emi efepde enyin ke usụn̄.”—Anne.

Bible ọdọhọ ete: Ẹmenịm ini ẹnọ kpukpru n̄kpọ, . . . ini eke ẹdopde uyo ye ini eke ẹtịn̄de ikọ.” (Ecclesiastes 3:1, 7) Oro esịne ini emi ẹnọde owo etop ke fon.

 Ekikere en̄wen

Utọ owo emi ọkpọnọde etop

  • ;-) Kop se ete ye eka fo ẹtịn̄de.Colossae 3:20.

  • ;-) Sasat eke ọnọde nọmba fo. Edieke mûnọhọ owo nọmba fon fo ntịme ntịme, m̀mê nditịn̄ se mûkpetịn̄ke ye owo ekededi emi okụtde, ayakama ido emi okpon.

  • ;-) Kûyak ọkpọsọn̄ mbre anam ọnọ owo etop ima. Edieke ayakde ima odụk fi m̀mê owo oro ibuot, ọwọrọ mfịna ke oyom oro.

“Ete ye eka mi ẹdiọn̄ọ ke nsidaha fon mi mbre ndisịme, ntre mmọ isifịnade idem m̀mê nọmba anie idu ke fon mi.”—Briana.

Utọ etop emi ọkpọnọde owo

  • ;-) Mbemiso ewetde etop ke fon fo, bụp idemfo ete, ‘Ndi utọ etop emi ke n̄kpọnọ owo ke fon?’ ‘Ndi ikpakam ifọnke n̄kokot enye mîdịghe mbet tutu ikụt iso ye iso?’

  • ;-) Kûwet n̄kpọ emi mûkputịn̄ke-tịn̄ edieke ẹkụtde iso ye iso. Sarah emi edide isua 23 ọdọhọ ete: “Edieke ikọ odobide fi ke inua, kûwet unọ owo ke fon.

“Edieke owo ọnọde fi ndisịme ke fon, tịn̄ nọ ete ye eka fo. Emi idiyakke owo abiat fi, oyonyụn̄ anam ete ye eka fo ẹkụt ke edi eti eyen.”—Sirvan.

Ini emi ọkpọnọde owo etop

  • ;-) Biere ini emi edinịmede fon fo ye ini emi mûdukamake fon. N̄kaiferi emi ekerede Olivia ọdọhọ ete: “Nsikamake fon ke ini ndiade udia m̀mê ke ini n̄kpepde n̄kpọ. Mmesinịme fon mma ndodụk mbono esop man nditop enyin nse.”

  • ;-) Kere ban̄a mbon en̄wen. (Philippi 2:4) Kûnọ owo etop ke ini osụk enemede nneme ye owo.

“Nsinọhọ owo etop ke ini ndude ye mme owo ibọhọke edi ata akpan n̄kpọ emi mîkemeke ndibet. Nsinyụn̄ nnọhọ owo emi mmemmeheke nọmba mi.”—Janelly.

 

 

Kpep N̄kpọ En̄wen

N̄kparawa Owo Ẹbụp, Eboho 1

Ẹneme ibuotikọ nte n̄kpọsọn̄ mmịn ye n̄kpọsọn̄ ibọk, idan̄, uwọrọ an̄wa ye uyom ima.