Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

N̄KPARAWA OWO ẸBỤP

Nso ke N̄kpanam man Esidọn̄ Mi Ndisịn̄ede Idem?

Nso ke N̄kpanam man Esidọn̄ Mi Ndisịn̄ede Idem?

Bible ọdọhọ ete: “Edisịn̄ede idem enyene . . . ufọn.” (1 Timothy 4:8) Edi isidọn̄ke ediwak uyen ndiwọrọ n̄kesịn̄ede idem kpa ye oro mmọ ẹdiọn̄ọde ke akpana inam oro.

  • “Idem ayakpa fi ndifiọk ke ediwak nditọwọn̄ ikesibehe udomo edisịn̄ede idem ke ini n̄kodude ke ufọkn̄wed sekọndri. Edi udomo enye oro ekesimem akan!”—Richard, eyen isua 21.

  • “Ndusụk owo ẹsikere ẹte, ‘Ufọn ndifehe itọk n̄kanade an̄wa ke ufiop eyo tutu ibibiak emen fi idem, idem onyụn̄ emem fi ke ini edide emekeme ndibre mbre vidio nnyụn̄ nnam nte efehe itọk ke mbre vidio oro?’”—Ruth, eyen isua 22.

Edieke etiede fi ntre n̄ko, kere ban̄a ufọn ita emi edibọde edieke esịn̄erede idem kpukpru ini.

Ufọn 1. Ndisịn̄ede idem idiyakke ọsọp ọdọn̄ọ. Rachel emi edide isua 19 ọdọhọ ete: “Ete mi ekesidọhọ ete, ‘Edieke mûnyeneke ini usịn̄ede idem, fiọk ete ke eyenyene ini ọdọn̄ọ udọn̄ọ.’

Ufọn 2. Ndisịn̄ede idem ayanam ekikere ana fi sụn̄. Emily emi edide isua 16 ọdọhọ ete: “Mma mfehe itọk, ekikere esina mi sụn̄ akpan akpan ke ini esịt etịmerede mi. Esinem mi ke idem, ndien esịt esina mi sụn̄.

Ufọn 3. Ndisịn̄ede idem esinen̄ede enem. N̄kaiferi kiet emi ekerede Ruth ọdọhọ ete: “Ndisịn̄ede idem esinem mi, ntre mmesiwọrọ nsan̄a isan̄, n̄ka ewọk, nnyụn̄ n̄wat enan̄ukwak.

Se Idinamde Okụt Unen: Ikata ke urua, sio minit 20 ke nsụhọde n̄kaha da nam nsịn̄ede idem emi esimade.

Se mînaha efre: Okposụkedi emi owo ekemede ndidada udọn̄ọ mmana ke ntak ubon emi otode, nte enye odude uwem ekeme ndinam enye afiak okop inem idem. Ntre, ke ini ekerede ke akpana esịn̄ede idem, diọn̄ọ ete ke idụhe owo emi edisịn̄erede idem ọnọ fi, afo enyene ndinam n̄kpọ fo!