Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

N̄KPARAWA OWO ẸBỤP

Ndi Ọdiọk Ami Ndiwet N̄kpọ ke Idem?

Ndi Ọdiọk Ami Ndiwet N̄kpọ ke Idem?

 Nso isinam utọ n̄kpọ emi ọdọn̄ owo?

Akparawa kiet emi ekerede Ryan ọdọhọ ete, “Ndusụk n̄kpọ emi mme owo ẹsiwetde ke idem esiye etieti.”

Se inamde oyom ndiwet n̄kpọ ke idem ekeme ndinam fi ekere ke uwet n̄kpọ ke idem idiọkke. N̄kaiferi kiet emi ekerede Jillian ọdọhọ ete: “Enyene eyenan̄wan kiet emi ikesikade n̄wed kiet. Eka esie akakpa ini emi enye edide eyenọwọn̄, edi ke enye ama akakabade n̄kaiferi, enye ama ewet enyịn̄ eka esie ke obotitọn̄ esie. N̄kereke ke utọ enye oro ọdiọk.”

Nsio nsio ntak odu emi esinamde owo oyom ndiwet n̄kpọ ke idem, edi nen̄ede tie kere kan̄a mbemiso ewetde n̄kpọ emi mûdukemeke ndisọhi mfep ke idem tutu amama! Nso ke okpobụp idemfo mbemiso ewetde n̄kpọ ke idem? Mme itie Bible ewe ẹkeme ndin̄wam fi ebiere m̀mê ọkpọfọn ewet?

 Nso ke okpobụp idemfo?

Ndi n̄kpọ emi ekeme ndinam mi n̄kpọ? Kop se ẹtịn̄de mi ke ikpehe Intanet Mayo Clinic: “N̄kpọ emi ẹsidade ẹwet owo n̄kpọ ke idem ẹsisep owo idem. Emi ọwọrọ ke ẹkeme ndibiat fi idem mîdịghe ẹnam udọn̄ọ odụk fi idem. Ndusụk ini, mben itie oro ẹkewetde owo n̄kpọ esitie mfat mfat. Ndiwet n̄kpọ ke idem ekeme ndinịm fi mbọn n̄ko. Edieke edide ẹma ẹdada ukwak emi ẹwetde fi n̄kpọ ke idem ẹwet owo emi enyenede udọn̄ọ, udọn̄ọ esie ekeme ndibe fi.”

Mme owo ẹdida mi didie? Edide emenịm m̀mê unịmke, ẹsida nte owo etiede ẹbiere utọ owo emi enye edide. Nte afo etiede ke mme owo ẹdida idiọn̄ọ m̀mê ọmọdiọn̄ọ idem, m̀mê osụk anam n̄kpọ nte eyenọwọn̄, m̀mê emedi se owo adiande idem m̀mê udịghe. N̄kaiferi kiet emi ekerede Samantha ọdọhọ ete: “Mma n̄kụt owo ewetde n̄kpọ ke idem, nsibat enye nsịn ke otu mme ọn̄wọn̄-n̄kpọ-owo ye mbon club.”

Melanie emi edide isua 18 ọdọhọ ete: “Se owo ewetde ke idem isiyakke ẹkụt ndammana uyai esie, inyụn̄ iyakke ẹdiọn̄ọ ata owo emi enye edide. Esitie mi nte mbon emi ẹwetde n̄kpọ ke idem iyomke mme owo ẹdiọn̄ọ ata owo emi mmimọ idide, enye anam mmọ ẹwet n̄kpọ ẹyọhọ idem.”

Ndi se n̄wetde oyodorode mi usen kiet? Nte ini akade, usọn̄ m̀mê ubom esinam se owo ekewetde ke idem iyehe aba. Akparawa kiet emi ekerede Joseph ọdọhọ ete: “Mmokụt owo emi ekewetde n̄kpọ ke idem ke ini akparawa, se enye ekewetde oro enyene nte etiede idahaemi.”

Allen emi edide isua 21 ọdọhọ ete: “Se ẹsiwetde ke idem esiwak ndidorode owo nte ini akade. N̄kpọ emi eketiede nte ke owo mînamke ọmọn̄ akpa, ekeme ndidorode owo nte ini akade.”

Ata akpan n̄kpọ ke Allen etịn̄ oro. Owo esikpụhọ nte enye okponde aka, ikereke aba n̄kpọ nte enye ekesikerede, inyụn̄ imaha aba ndusụk n̄kpọ emi enye ekesimade. N̄kaiferi emi ekerede Teresa ọdọhọ ete: “N̄wetke n̄kpọ ndomokiet ke idem mi, sia nduakke ndinam n̄kpọ ekededi emi edide mma nti nte ini akade, ami ntua n̄kpọfiọk.”

 Mme itie Bible ewe ẹkeme ndin̄wam fi?

Ọdiọn̄ọ-idem-owo esitetịm ekere mbemiso enye ebierede ndinam n̄kpọ ekededi. (Mme N̄ke 21:5; Mme Hebrew 5:14) Se mme itie Bible emi ẹtịn̄de ẹkeme ndin̄wam fi ebiere m̀mê akpana ewet n̄kpọ ke idem.

  • Colossae 3:20: “Mbufo nditọ, ẹkop uyo ẹnọ mme ete ye eka mbufo ke kpukpru n̄kpọ, koro emi etịmde enem Ọbọn̄ esịt.”

    Edieke odụn̄de ye ete ye eka fo edi umaha ndinam se mmọ ẹdọhọde, ekere ke n̄kpọ editie didie ye afo?

  • 1 Peter 3:3, 4: “Ẹkûyak mbanaidem mbufo edi enyọn̄ enyọn̄ edidọk idet ye edisịne n̄kpọmbana gold m̀mê edisịne ndiye ọfọn̄, edi ẹyak edi ndedịbe owo eke esịt emi edide edisịnen̄kpọ eke mîkemeke ndibiara, kpa sụn̄sụn̄ ye ifụre ifụre edu.”

    Ekere ke nso inam Bible ọdọhọ ke se owo edide ke esịt idem edi akpan n̄kpọ akan?

  • 1 Timothy 2:9: “Nyom iban ẹbana idem [nte] . . . etịmde odot, owụtde iso o-bụt ye eti ibuot.”

    “Iso o-bụt” oro ẹtịn̄de ke itie Bible oro ọwọrọ nso? Ntak emi ndinam n̄kpọ ye iso o- bụt idahaemi edifọnde ye afo ke ini iso ikan ndiwet n̄kpọ ke idem?

  • Rome 12:1: “Ẹda idem mbufo ẹnọ Abasi nte odu-uwem uwa emi asanade, emi Abasi onyụn̄ enyịmede ndibọ, kpa edisana utom emi ẹdade ukeme ukere n̄kpọ mbufo ẹnam.”

    Ntak emi se afo anamde ye idemfo ebehede Abasi?

Se ẹwetde ke itie Bible ifan̄ oro ye mme mbụme oro ẹbụpde ẹdian anam ediwak owo ẹbiere ke mmimọ idiwetke n̄kpọ ke idem. Mmọ ẹkam ẹbiere ndinam n̄kpọ emi ọfọnde akan ndiwet n̄kpọ ke idem. Teresa, emi ima iketetịn̄ iban̄a ọdọhọ ete: “Ekpedi enyene ikọ emi afo enen̄erede ama, nanam ikọ oro. Ekpedi enyene owo emi afo enen̄erede ama, nam enye ọdiọn̄ọ. Nam se afo ọdiọn̄ọde ke ọfọn, kûwewet ke idem.”