Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

N̄KPARAWA OWO ẸBỤP

Ndi Akpana Idian̄ade?—Ikpehe 1

Ndi Akpana Idian̄ade?—Ikpehe 1

Ndusụk ini, mme ufan ndidian̄ade esinyene ufọn. Da Jill ke uwụtn̄kpọ. Eyenan̄wan emi ọdọhọ ete: “Ke akpa, ibuot ama esikpon mi nte ufan mi ekesibụpde mi ke ubọk ke ubọk m̀mê ndu ke m̀mọ̀n̄, m̀mê nnam nso, m̀mê ndu ye anie. Edi ekem ko, enye iyakke-yak ndu ye mbon en̄wen—oyom ndu ye enye ikpọn̄. Enye ama esikam ayat esịt ke ini ndude ye mbonubon nnyịn—akpan akpan n̄kpodu ye ete mi. Ke ima ikadian̄ade, eketie nte ẹbiomode mi ata akamba mbiomo!”

Se ikonyụn̄ itịbede ye Sarah edi oro. Enye ama ọtọn̄ọ ndikụt ke John ufan esie esiyịre n̄kpọ akaha, ọsọn̄ ido, inyụn̄ ikponoke owo. Sarah ọdọhọ ete: “Usen kiet, John ama edi ufọk nnyịn ke hour ita ẹma ẹkebe tọn̄ọ ke ini oro ikenịmde. Enye ikọkọmke eka mi emi ekebererede usụn̄ ọnọ enye, edi ọdọhọ ete: ‘Di idaha ke imabiat ini ikaha.’ Enye ikọdọhọke ke imọ ikabiat ini, edi ke nnyịn ikabiat ini. Akpakana enye ekpe mi ubọk, mîdịghe etịn̄ se ikanamde enye edi ke idiọk ini. Se ikakam ibiakde mi ikan edi ke enye ikokponoke eka mi!”

Edi iwọrọke ke ana ufan adian̄ade edieke owo anamde ndudue m̀mê enyenede ido emi mîyehe. (Psalm 130:3) Sarah akadian̄ade nsan̄a ye John ke ini enye edide edifiọk ke nte John esinamde n̄kpọ ye mme owo edi oro.

Nso ke akpanam edieke ekerede ke idifọnke ọdọ ufan fo ke ntak ido esie, kpa nte Jill ye Sarah ekekerede? Edieke edide ntre, kûnam nte n̄kpọ itịbeke! Okposụkedi mîsimemke, etie nte mfọnn̄kan n̄kpọ ekpedi mbufo ndidian̄ade. Mme N̄ke 22:3 ọdọhọ ete: “Owo mbufiọk ada okụt afanikọn̄ ndien edịbe.”

Imọfiọk ke ekeme ndidi idimemke mbufo ndidian̄ade. Edi ndọ idịghe n̄kpọ mfịn ye n̄kpọn̄. Ọfọn ọyọ ubiak idahaemi akan nditua n̄kpọfiọk ke ofụri eyouwem fo!