Be ka se isịnede

Be ka udiana n̄kpọ

Mme Ntiense Jehovah

Efịk

Andikpep Nnyịn Imaha Mi

Andikpep Nnyịn Imaha Mi

Kere kan̄a ise!

Kere ban̄a se iketịbede inọ Rachel. Ibọrọ udomo esie ama esifọn etieti. Edi nte ini akakade, oro ama okpụhọde. Rachel ọdọhọ ete: “Andikpep nnyịn ama anam ofụri se ekekeme mbak ndibe udomo esie.” Ntak-a? Andikpep oro ama osio se ikesịnede enye ke esịt etịn̄ ọnọ Rachel ye eka esie ete ke imọ imaha ido ukpono mmọ.

Ukem nte oyomde owo odori ukot ke ikpọ itiat emi ẹdọn̄de ke mmọn̄ man enye asan̄a ebe, ntre n̄ko ke oyom eyen ufọkn̄wed anam n̄kpọ man andikpep an̄wam enye ọfiọk se enye mîkọfiọkke

Nso iketịbe? Rachel ọdọhọ ete: “Ekesitie nte andikpep nnyịn iyomke mbe udomo nte akpanade mbe ke ntak oro enye mîkamaha ido ukpono nnyịn, ntre eka mi ama esitiene mi edi ufọkn̄wed edineme n̄kpọ emi ye enye. Ke akpatre, enye ama ọtọn̄ọ ndima mi ndien.

Edieke osobode orụk mfịna emi, tịn̄ nọ ete ye eka fo. Nte eyịghe mîdụhe, mmọ ẹyema ndineme mfịna emi ye andikpep oro, ndien edieke oyomde, ẹyeneme enye n̄ko ye mbon oro ẹsede n̄kpọ ẹban̄a ufọkn̄wed man ẹse ẹban̄a mfịna oro.

Edi akpanikọ ke udukemeke ndise mban̄a kpukpru mfịna oro enyenede ye mme andikpep uforo uforo. Oyoyom ọyọ ndusụk n̄kpọ. (Rome 12:17, 18) Tanya ọdọhọ ete: “Andikpep nnyịn kiet ama esinyene ata idiọk edu. Enye ama esisụn̄i nnyịn onyụn̄ ọdọhọ ke nnyịn idi ndisịme. Ke ntọn̄ọ ntọn̄ọ, mma nsitua etieti, edi nte ini akade, mma ndifiọk ke idịghe ami ikpọn̄ ke enye esisụn̄i. Mma nnen̄ede nsịn idem nnam utom ufọkn̄wed mi, nsinyụn̄ nnam se enye ọdọhọde ẹnam ke ini enye edide edikpep nnyịn n̄kpọ. Ntre, enye ikenen̄ekede ifịna mi aba, ndien mma nsịne ke otu ibat ibat owo oro ẹkenen̄ede ẹbe udomo esie. Ke isua iba ẹma ẹkebe, ẹma ẹbịn andikpep oro ẹsio ke ufọkn̄wed nnyịn.

Ikọ item: Ndikpep nte ekemede ndinam n̄kpọ ye andikpep oro ọsọn̄de ido ayan̄wam fi edieke edinamde utom ye eteutom oro ọsọn̄de ido. (1 Peter 2:18) Oro n̄ko ayan̄wam fi enen̄ede ama nti andikpep.