Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

N̄KPARAWA OWO ẸBỤP

Ndi Idan̄ Inua Osụk Edi Idan̄?

Ndi Idan̄ Inua Osụk Edi Idan̄?

Ke United States, itieutom emi ẹsitịn̄de se ẹkpenamde mbak udọn̄ọ edisuana ẹma ẹnam ndụn̄ọde ye mme uyen emi ẹdide isua 15 esịm 19. Ẹdọhọ ke mbahade iba ke otu mme uyen emi ẹdọhọ ke mmimọ imesinam idan̄ inua. Sharlene Azam, emi ewetde n̄wed emi ẹkotde Oral Sex Is the New Goodnight Kiss, ọdọhọ ete: “Edieke afo enemede nneme ye mme uyen [aban̄a idan̄ inua] mmọ ẹdidọhọ ke inyeneke se idiọkde do. Ke nditịm ntịn̄, mmọ idaha enye nte idan̄.”

 Afo ekere didie?

Bọrọ ih m̀mê ihih ke mme mbụme emi ẹtienede mi.

  1. Ndi idan̄ inua ekeme ndinam owo oyomo?

    1. Ih

    2. Ihih

  2. Ndi idan̄ inua ekeme ndinam owo ọdọn̄ọ?

    1. Ih

    2. Ihih

  3. Ndi idan̄ inua osụk edi idan̄?

    1. Ih

    2. Ihih

 Nso idi nnennen ibọrọ?

Men ibọrọ fo domo ye mme ibọrọ oro ẹnọde mi.

  1. Ndi idan̄ inua ekeme ndinam owo oyomo?

    Ibọrọ: Ihih. Emi edi kiet ke otu ntak emi anamde ediwak owo ẹkere ke idan̄ inua idiọkke.

  2. Ndi idan̄ inua ekeme ndinam owo ọdọn̄ọ?

    Ibọrọ: Ih. Owo emi anamde idan̄ inua ekeme ndimen udọn̄ọ edidiana ekpa, ata idiọk mfat-etịtifuọ, udọn̄ọ ikịm, n̄kwaiyọ, udọn̄ọ HIV, ye akpasak.

  3. Ndi idan̄ inua osụk edi idan̄?

    Ibọrọ: Ih. Ndibre mbre ye ndido idan̄ owo en̄wen edi kpa idan̄. Emi esịne ata ata idan̄, idan̄ inua, idan̄ etịtifuọ, ye ndifiọn̄ọ ndido idan̄ owo en̄wen.

 Ntak emi ebehede fi?

Yak ineme mme itie Bible emi ẹnyenede n̄kpọ ndinam ye idan̄ inua.

Bible ọdọhọ ete: “Emi edi uduak Abasi . . . ete mbufo ẹbet use.”1 Thessalonica 4:3.

Ikọ Greek oro ẹkabarede “use” aban̄a kpukpru orụk idan̄ emi owo anamde ye owo emi mîdịghe n̄wan m̀mê ebe esie, ndien emi esịne ata ata idan̄, idan̄ inua, idan̄ etịtifuọ, ye ndifiọn̄ọ ndido idan̄ owo en̄wen. Owo emi anamde use ọyọbọ utịp, ndien ndiọkn̄kan ke otu emi edi ke enye ididịghe aba ufan Abasi.1 Peter 3:12.

Bible ọdọhọ ete: “Owo eke akade iso anam use anam idiọkn̄kpọ edue idem esie.”1 Corinth 6:18.

Idan̄ inua ekeme ndinọ nnyịn udọn̄ọ inyụn̄ iyakke nnyịn idi aba ufan Abasi. Enye ekeme n̄ko ndinam nnyịn ikûkop inemesịt. N̄wed emi ẹkotde Talking Sex With Your Kids ọdọhọ ke idịghe ata idan̄ kpọt esinam owo ekere ke imọ iwọrọke n̄kpọ m̀mê ndinam owo atua n̄kpọfiọk. N̄wed emi ọdọhọ n̄ko ke kpukpru se isiwọrọde owo emi anamde ata ata idan̄ ke ini enye mîdọhọ ndọ ekeme ndinyụn̄ n̄wọrọ owo emi anamde utọ idan̄ ekededi. Idan̄ edi idan̄.

Bible ọdọhọ ete: “Ami Jehovah, ndi Abasi fo, Enye emi ekpepde fi man afo ọbọ ufọn.”Isaiah 48:17.

Ndi ekere ke ibet emi Abasi ọnọde aban̄a idan̄ edi ke ufọn fo mîdịghe ekere ke ibet emi iyakke anam se akpamade ndinam? Man ekeme ndibọrọ mbụme emi, kere ban̄a usụn̄ mbakara emi moto awakde etieti, ndien ẹwet nsio nsio idiọn̄ọ emi owụtde nte ẹkpewatde ọsọp eketre, mme ebiet emi ẹkpetuakde ẹda, ye mme ebiet emi ẹkpewatde ata sụn̄sụn̄. Ndi akpama mme idiọn̄ọ emi m̀mê akpasasua mmọ? Ndi ekpekere ke mmọ iyakke awat nte akpamade ndiwat mîdịghe ekpekere ke emi akam edi ke ufọn fo? Nso iditịbe edieke afo ye mme awat-a-moto eken mînamke se ẹwetde ke mme idiọn̄ọ oro?

Ibet uwat idiyakke awat nte akpamade, edi ibet emi edi ke ufọn fo. Kpasụk ntre, ibet Abasi iyakke odu uwem nte akpamade, edi ibet emi edi ke ufọn fo

Ukem oro ke edi ye ibet Abasi. Edieke afo mûnamke se ibet Abasi ọdọhọde, ọyọdọk se ọtọde. (Galatia 6:7) N̄wed emi ẹkotde Sex Smart ọdọhọ ete: “Edieke etrede ndinam se afo ọdiọn̄ọde ke ọfọn, akabade anam se afo ọdiọn̄ọde ke ifọnke, editie fi nte edi nditen̄.” Edi edieke odude uwem nte Abasi ọdọhọde, udûnamke oburobụt ido. Se ikam ifọnde ikan edi ke esịt idimiaha fi ufen.1 Peter 3:16.

Kpep N̄kpọ En̄wen

Ndi Ọdiọk Owo Emi Mîdọhọ Ndọ Ndinam Idan̄?

Se se Bible etịn̄de aban̄a ndinam idan̄ ke ini owo mîdọhọ ndọ ye mme mbubiam ido eken.