Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Ete ye Eka Mi Iyakke Ntiene Ndia Uwem

Ete ye Eka Mi Iyakke Ntiene Ndia Uwem

Kere ban̄a emi ise:

Enyene usọrọ emi oyomde ndika, edi udiọn̄ọke m̀mê ete ye eka fo ẹyeyak. Nso ke akpanam?

  1.  KÛKPAKPA NDISIAN MMỌ—KA N̄KPỌ FO

  2.  KÛSIAN MMỌ—KÛNYỤN̄ UKA

  3.  SIAN MMỌ ISE M̀MÊ ẸYEYAK AKA

 1. KÛKPAKPA NDISIAN MMỌ—KA N̄KPỌ FO

Se ikpanamde oyom ndinam emi: Oyom ndiwụt mme ufan fo ke imọ idụhe ke idak owo ndomokiet. Ekere ke ọmọfiọk n̄kpọ akan ete ye eka fo, mîdịghe ekere ke mmọ ikemeke ndibiere n̄kpọ nnọ fi.—Mme N̄ke 14:18.

Utịp: Eyenem mme ufan fo, edi mmọ n̄ko ẹyefiọk ke afo edi owo abian̄a. Edieke ekemede ndibian̄a ete ye eka fo, ọwọrọ emekeme ndibian̄a mme ufan fo. Esịt ayayat ete ye eka fo edieke mmọ ẹdide ẹdifiọk ke ama abian̄a mmimọ, mmọ idinyụn̄ inọhọ fi ifụre aba nte ẹkesinọde.—Mme N̄ke 12:15.

 2. KÛSIAN MMỌ—KÛNYỤN̄ UKA

Se ikpanamde oyom ndinam emi: Emekere aban̄a usọrọ oro onyụn̄ ebiere ke idịghe utọ usọrọ oro ke akpama ndika, mîdịghe ke ndusụk mbon oro ẹdidude ke itie usọrọ oro idịghe nti nsan̄a. (1 Corinth 15:33; Philippi 4:8) Ekeme ndidi ke ọdọn̄ fi ndika, edi ndịk iyakke obụp ete ye eka fo m̀mê akpana aka.

Utịp: Edieke afiakde usọrọ oro ke ntak emi ebierede ke idemfo ke idịghe eti usọrọ, ọwọrọ eyenyene se edibọrọde mme ufan fo ke ini mmọ ẹbụpde fi. Edi edieke afiakde sia ndịk mîyakke obụp ete ye eka fo m̀mê akpana aka, editie fi ke idem mfịna mfịna, nte n̄kpọ eke ẹdọhọde ke ofụri ererimbot ke ẹdia uwem, edi afo mi ke akpa ndobo.

 3. SIAN MMỌ ISE M̀MÊ ẸYEYAK AKA

Se ikpanamde oyom ndinam emi: Emi owụt ke odu ke idak ete ye eka fo ye nte ke emenyịme mmọ ẹbiere n̄kpọ ẹnọ fi. (Colossae 3:20) Amama ete ye eka fo unyụn̄ uyomke ndiyat mmọ esịt ke ndidedịbe n̄wọrọ ntiene mme ufan fo. (Mme N̄ke 10:1) N̄ko, emenyene ifet nditịn̄ se oyomde ndika nnọ mmọ.

Utịp: Ete ye eka fo ẹyefiọk ke amama onyụn̄ okpono mmimọ. Ndien edieke mmọ ẹkerede ke se oyomde ndika idiọkke, mmọ ẹkeme ndinyịme aka.

Se Ikemede Ndinam Ete ye Eka Fo Ẹdọhọ Okûka

Ukem nte mbon oro ẹsinyan̄ade owo ke esụk ẹsisọpde ẹda ẹkụt ke mmọn̄ ọmọn̄ emen owo, ntre n̄ko ke ete ye eka fo ẹsisọp ẹda ẹkụt afanikọn̄ oro afo mûkwe

Imekeme ndida uwụtn̄kpọ emi ntịn̄ ntak kiet: Edieke ẹkpedọhọde fi emek, ekeme ndidi akpama ndisiwọk ewọk ke esụk oro ẹnyenede mme owo emi ẹsinyan̄ade mbon oro mmọn̄ oyomde ndimen. Ntak? Sia ini oro osụk okopde inem mmọn̄ do, udufiọkke ini oro n̄kpọ oyomde ndinam fi. Edi mbon emi ẹsinyan̄ade owo mi ẹkeme ndisọp nda n̄kụt ke n̄kpọ ọmọn̄ anam fi. Kpasụk ntre, sia ete ye eka fo ẹdude uwem ẹbịghi ẹnyụn̄ ẹnyenede ifiọk ẹkan fi, mmọ ẹkeme ndikụt mme n̄kpọndịk emi afo mûkwe. Ete ye eka fo ẹtie nte mbon emi ẹsinyan̄ade owo ke esụk—idịghe nte ke mmọ iyomke adia uwem—mmọ ẹkam ẹyom ndin̄wam fi efep mme n̄kpọ oro ẹkemede ndinam fi okûkop inem uwem.

Se ntak en̄wen mi: Ete ye eka fo ẹnen̄ede ẹyom ndikpeme fi. Ima esinam mmọ ẹnyịme fi anam ndusụk n̄kpọ, enye n̄ko esinam mmọ ẹdọhọ fi okûnam mme n̄kpọ eken. Ama ọdọhọ mmọ ẹyak fi anam n̄kpọ, mmọ ẹsibem iso ẹkere m̀mê iyekeme ndiyọ se idiwọrọde fi edieke iyakde anam n̄kpọ oro. Edieke mmọ ẹdade ẹse ke n̄kpọ idinamke fi ke ama anam se oyomde oro, mmọ ẹyenyịme anam.

Se Akpanamde man Ete ye Eka Fo Ẹnyịme Fi Aka

Se afo ekemede ndinam

Tịn̄ akpanikọ: Bụp idemfo ise: ‘Nso inen̄ede inam nyom ndika n̄kpọ emi? Ndi se ẹdinamde do ọdọn̄ mi, mîdịghe ndi nyom nditie nte mme uke mi? Ndi n̄ka sia owo oro mmade oyodu do?’ Tịn̄ ofụri akpanikọ nọ ete ye eka fo. Enyene ini emi mmọ n̄ko ẹkedide uyen, ndien mmọ ẹnen̄ede ẹdiọn̄ọ fi. Anaedi mmọ ẹyefiọk se ikam inamde oyom ndika. Mmọ ẹyema asian mmimọ se idude fi ke esịt, afo n̄ko ọyọbọ ufọn oto ifiọk mmọ. (Mme N̄ke 7:1, 2) Edi edieke abian̄ade mmọ, emi idiyakke mmọ ẹnịm fi ke akpanikọ, ndien etie nte mmọ idinyịmeke aka ebiet oro oyomde.

Ka ke ini oro ọfọnde: Kûka ubịne ete ye eka fo ke ndondo oro mmọ ẹnyọn̄de utom ẹdi ukûnyịk mmọ ete ẹnyịme anam n̄kpọ, kûnyụn̄ uka ke ini mmọ ẹsụk ẹnamde n̄kpọ ke ubọk. Ka ke ini mmọ ẹduọkde odudu. Edi kûbet tutu enen̄ede ekpere ini oro oyomde ndinam n̄kpọ mbemiso akade ekenyịk mmọ ete ẹnyịme fi anam se oyomde ndinam. Ete ye eka fo idimaha ndibiere se ẹkpebọrọde fi itọk itọk. Babak sian mmọ se oyomde ndinam, nọ mmọ ini ẹkere se ẹkpebọrọde fi.

Kûdịp mmọ n̄kpọ: Sian mmọ ofụri se idude. Tịn̄ nnennen n̄kpọ oro oyomde ndinam. Mme ete ye eka isimaha nditọ mmọ ẹdọhọ “Mfiọkke,” akpan akpan ke ini mmọ ẹbụpde ẹte: “Mmanie ẹdidu do?” “Ndi odu akamba owo oro edisede enyịn ke se ẹdinamde?” m̀mê “Ini ewe ke edinyọn̄ idi?”

Nte akpanamde n̄kpọ ye mmọ: Kûkere ke ete ye eka fo ẹsasua fi. Da mmọ nte mbon oro ẹkam ẹyomde-yom ufọn fo, sia edieke etịmde ekere, se mmọ ẹdide edi oro. Edieke adade ete ye eka fo nte mme ufan, udutiehe utọk utọk ye mmọ, mmọ ẹnyụn̄ ẹkeme ndinyịme se afo etịn̄de.

Wụt ete ye eka fo ke emenyịme se mmọ ẹbierede ye nte ke ayanam se mmọ ẹdọhọde. Edieke anamde ntre, mmọ ẹyekpono fi. Ini en̄wen, mmọ ẹkeme ndinyịme anam se oyomde.