Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Ete ye Eka Mi Inyeneke Mbuọtidem ke Idem Mi

Ete ye Eka Mi Inyeneke Mbuọtidem ke Idem Mi

Se afo ekemede ndinam

Kere ise: Okûdi nte odude uwem akam anam ete ye eka fo ẹkûnyene mbuọtidem ke idemfo?

Ke uwụtn̄kpọ, Paul ekewet ete: “Nnyịn [iyom] ndinam akpanikọ ke kpukpru n̄kpọ.” (Hebrew 13:18) Bụp idemfo ete: ‘Ndi mmesitịn̄ akpanikọ nnọ ete ye eka mi ke ini ẹbụpde mi ebiet oro n̄kade ye se nnamde?’

Mek kiet ke otu mbụk iba emi ebietde okwo.

 Lori  Beverly

 Lori

Mma nsinọ etop ilektrọnik ẹsọk akparawa kiet emi n̄kamade. Ete ye eka mi ẹma ẹdidiọn̄ọ ẹnyụn̄ ẹdọhọ ntre. Mma ndọhọ ke nyetre, edi n̄ketreke. Mma n̄ka iso ndinọ enye etop ke ofụri isua kiet. Esidi mma nnọ enye etop yak ete ye eka mi ẹdifiọk, nyekpe mmọ ubọk nnyụn̄ ndọhọ ke ndinọhọ aba, edi ekem mfiak nnọ. Nte ini akakade, ete ye eka mi ikenịmke ikọ ndomokiet oro ntịn̄de aba!

Afo ekere ke nso ikanam ete ye eka Lori ẹkûnyene mbuọtidem aba ke idemesie?

Edieke afo ekpedide ete ye eka Lori, nso ke akpanam, ndien ntak-a?

Nso ke Lori akpakanam man ete ye eka esie ẹka iso ẹnyene mbuọtidem ke idemesie ke mmọ ẹma ẹkeneme n̄kpọ oro ye enye?

 Beverly

Ete ye eka mi ikenyeneke mbuọtidem ke idemmi ke ini ndude ye n̄kparawa, edi an̄wan̄a mi idahaemi ntak emi mmọ mîkenyeneke. Mma mma n̄kparawa iba emi ẹkedade isua iba kpọt ẹsọn̄ọ mi ndisịme ndisịme. Mma nsitịn̄ ikọ ye mmọ ke telefon mbịghi, ndien n̄kesineme nneme ye mmọ kpọt ke mme itie usọrọ. Ete ye eka mi ẹma ẹbọ mi telefon mi ke ọfiọn̄ kiet, ndien mmọ ikayakke nsika ebiet emi n̄kparawa oro ẹdidude.

Edieke afo ekpedide ete ye eka Beverly, nso ke akpanam, ndien ntak-a?

Ndi emekere ke ama ọfọn ete ye eka Beverly ndibọ eyen mmọ telefon nnyụn̄ ndọhọ enye okûsuka ebiet emi n̄kparawa oro ẹdude? Ntak emi ekerede ntre?

Nso ke Beverly akpanam man ete ye eka esie ẹfiak ẹnyene mbuọtidem ke idemesie?

Se Akpanamde man Ẹfiak Ẹnyene Mbuọtidem ke Idemfo

Se afo ekemede ndinam

Ndikọri n̄kabade akwa owo etie nte ndisan̄a ke udịghi ukot ndọk ufọkenyọn̄

Akpa, sịn idiọn̄ọ ke anamde emi mîyakke ẹnyene mbuọtidem ke idem fo.

  • Ndisinyọn̄ ndisịm ufọk ke ini emi ẹkenịmde

  • Ndisinam se n̄kọn̄wọn̄ọde

  • Ndisika n̄kpọ ke eti ini

  • Ndidiọn̄ọ nte mbiatde okụk

  • Ndisinam utom esịtufọk n̄kụre

  • Ndisidemede idap ke ini

  • Ndisinịm ubet mi asana

  • Ndisitịn̄ akpanikọ

  • Ndisida telefon ye kọmputa nnam n̄kpọ ye eti ibuot

  • Ndisinyịme ndudue mi nnyụn̄ n̄kpe ubọk

  • N̄kpọ en̄wen

Ọyọhọ iba, nam ubiere. Biere ndinam n̄kpọ man edi se ẹkemede ndiberi edem ke mme n̄kpọ oro esịnde idiọn̄ọ do. Nam item Bible emi ọdọhọde: “Ẹsio akani owo ẹduọk, emi ekemde ye ido uwem mbufo eke eyo oko.” (Ephesus 4:22) Nte ini akade, kpukpru owo—esịnede ete ye eka fo—ẹyekụt ke amanam ukpụhọde.—1 Timothy 4:15.

Ọyọhọ ita, neme se ebiere ndinam ye ete ye eka fo. Utu ke ndikụni nte ke ana mmọ ẹnyene mbuọtidem ke idemfo, sụhọde idem bụp mmọ se afo akpanamde.

Item: Kûkere ke ete ye eka fo ẹyenam se oyomde ke ebe oro. Mmọ ẹyema ndise m̀mê afo ayanam se ọn̄wọn̄ọde. Da ifet emi wụt mmọ ke mmọ ẹkeme ndiberi edem ke idemfo. Nte ini akade, ete ye eka fo ẹyenen̄ede ẹnyene mbuọtidem ke idemfo ẹnyụn̄ ẹnọ fi ifụre. Se iketịbede ye Beverly oro iketịn̄de iban̄a edi oro. Enye ọdọhọ ete: “Isisọn̄ke ndinam mbon en̄wen ẹtre ndinyene mbuọtidem ke idemfo, edi esisọn̄ ndinam mmọ ẹfiak ẹnyene. Ete ye eka mi ẹnyene mbuọtidem ke idemmi idahaemi, ndien emi enem mi tutu!”

Ikọ item: Nte anamde akpanikọ, ntre ke edinyene mbuọtidem ke idemfo.