Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

N̄KPARAWA OWO ẸBỤP

Nso ke N̄kpanam Edieke Ndọn̄ọde?—Akpa Ikpehe

Nso ke N̄kpanam Edieke Ndọn̄ọde?—Akpa Ikpehe

Ndi ọmọfiọk uyen emi ọdọn̄ọde ata idiọk udọn̄ọ? Ndi afo emenyene udọn̄ọ emi mîyakke okop inem uwem nte mme ubọkn̄ka fo ẹkopde?

Edieke enyenede, emi ekeme ndinam idem emem fi ndusụk ini. Edi Bible etịn̄ n̄kpọ iba emi ẹkemede ndinen̄ede ndọn̄ fi esịt.

  • Jehovah Abasi emi okobotde fi ọfiọk se iwọrọde fi. N̄kpọ efen edi ke enye enen̄ede ‘ekere aban̄a fi.’—1 Peter 5:7.

  • Jehovah Abasi aduak ndikọk kpukpru orụk udọn̄ọ! Emekeme ndikot emi ke Bible ke Isaiah 33:24 ye Ediyarade 21:1-4.

Se in̄wamde ata ediwak n̄kparawa emi ẹdọn̄ọde edi ndibuọt idem ke Abasi ye ke mme un̄wọn̄ọ esie. Kere ban̄a uwụtn̄kpọ inan̄ emi.

 YEIMY

Toto ke ini n̄kedide isua 11, n̄kesisan̄a ke n̄kpọitie mbon n̄kpọnnam n̄ka n̄kpọ. N̄kemeke ndinam ata ekpri n̄kpọ nte edimenede n̄kpọ.

Ke ini n̄kedide isua ition, abiausọbọ ama okụt ke mmenyene ata idiọk udọn̄ọ emi mîyakke mi n̄keme ndinam n̄kpọ ndomokiet. Ndusụk ini, esịt isinemke mi sia mmen̄kemeke ndinam se mme ubọkn̄ka mi ẹnamde. Edi ete ye eka mi ye Mme Ntiense Jehovah ke esop nnyịn ẹsin̄wam mi ẹnyụn̄ ẹsịn udọn̄ ẹnọ mi. Nsikwọrọ ikọ kpukpru ini, ndien ekemmọ Mme Ntiense ẹsisan̄a ye ami ke ini n̄kade ndikpep mme owo Bible.

Jesus ọkọdọhọ ke afanikọn̄ usen ekem ye usen. (Matthew 6:34) Ntre, nsinam se n̄kemede ke usen ke usen, nsidaha afanikọn̄ eke n̄kpọn̄ ndidian ye eke mfịn. Idotenyịn mi edi ke obufa ererimbot Abasi emi ndidude “ata uwem,” emi udọn̄ọ mîdidụhe aba.—1 Timothy 6:19.

Kere ise: Se in̄wamde Yeimy edi ‘ndinam se enye ekemede.’ Nso idin̄wam fi ndinam se ekemede?—1 Corinth 9:26.

 MATTEO

N̄kọtọn̄ọ ndikop ubiak edem ke ini n̄kedide isua itiokiet, ndien mbiausọbọ ẹkẹdọhọ ke idịghe mfịna, ke n̄kọri anam. Edi ke mma n̄kesịm isua 7, abiausọbọ ama okụt ke mmenyene mbufụt ke ọkpọ asakedem.

Ẹma ẹsiak mi idem, edi owo ikekemeke ndisio mbufụt oro ofụri ofụri. Ke ọfiọn̄ iba kpọt ama ekebe, mbufụt oro ama afiak akada nte akadade. Tọn̄ọ oro, mmasan̄a ufọkibọk ediwak ini, edi idụhe abiausọbọ emi ekemede ndikọk mi.

Ndusụk ini, mbufụt emi esinam etie nte ẹkama ikwa ẹkịm mi ofụri idem, akpan akpan ke edem ye ke esịt. Edi nsiyakke oro afịna mi akaha. Mmesiti ke ediwak owo nte ami ẹsobo se ikande oro, edi iyakke oro afịna mmọ akaha. Se inamde n̄kûyak udọn̄ọ emi enen̄ede afịna mi edi sia mmenyene mbuọtidem nte ke usen kiet ke Jehovah Abasi eyetre kpukpru ufen nte enye ọn̄wọn̄ọde.—Ediyarade 21:4.

Kere ise: Didie ke ndikere mban̄a un̄wọn̄ọ Abasi ekeme ndin̄wam fi ọyọ se iwọrọde fi ukem nte an̄wamde Matteo?—Isaiah 65:17.

 BRUNA

Sia mmembietke owo udọn̄ọ, ediwak owo ẹkeme ndikere ke ndi ifu. Edi udọn̄ọ emi anam uwem ọsọn̄ ye ami tutu n̄kemeke ndinam n̄kpọ ke ufọk, ndikpep n̄kpọ, m̀mê ndidaha nda ke bed.

Ke ini n̄kedide isua 16, mbiausọbọ ẹma ẹkụt ke mmenyene ata idiọk udọn̄ọ emi mîyakke n̄keme ndinam n̄kpọ ndomokiet, m̀mê ndiyak ntiene n̄ka ukwọrọikọ nte n̄kpamade ndika. Mmesima ndikot 1 Peter 5:7, emi ọdọhọde ‘itop kpukpru editịmede esịt nnyịn inọ Abasi koro enye ekere aban̄a nnyịn.’ Se isisọn̄ọde mi idem edi ndifiọk ke Jehovah ekere aban̄a kpukpru nnyịn. Se isọn̄ọde mi idem tutu esịm emi edi oro.

Kere ise: Didie ke nditop editịmede esịt fo nnọ Jehovah ekeme ndin̄wam fi nte an̄wamde Bruna?—Psalm 55:22.

 ANDRÉ

Ndusụk owo ẹsinam n̄kpọ ye ami nte n̄kpọ eke ndide eyen isua duop. Nduọhọke mmọ sia mbiet eyen isua duop.

Toto ke ini n̄kedide eyen isua iba, ata idiọk kansa ama odụk mi ọkpọ asakedem, ekem ebe odụk mfre. Mbiausọbọ ẹma ẹnọ mi usọbọ man udọn̄ọ emi okûsuana odụk mi kpukpru idem, edi usọbọ oro ama etịp n̄kọri mi. Ami ndi ikpat inan̄ ye ubak kpọt. Mma ndọhọ ke ndi isua 18, ediwak owo ẹsikere ke mbabian̄a.

Edi Mme Ntiense Jehovah ẹsinọ mi ukpono. Mmọ isisakke mi nte eyenọwọn̄ ẹsisakde. Nsiyakke idaha mi afịna mi akaha. Ke akpanikọ, mmenyene akakan n̄kpọ emi owo ekpenyenede ke ererimbot emi—mmọfiọk Jehovah! Ntre, se ededi oro ọwọrọde mi, mmenen̄ede nnịm ke Jehovah idikpọn̄ke mi tutu amama. Nditie n̄kere mban̄a obufa ererimbot emi Jehovah Abasi ọn̄wọn̄ọde esidọn̄ mi esịt.—Isaiah 33:24.

Kere ise: Ukem nte André, ntak emi ifiọk Jehovah edide “akakan n̄kpọ emi owo ekpenyenede ke ererimbot emi”?—John 17:3.