Be ka se isịnede

Didie ke N̄kpa Jesus ‘Afak Ediwak Owo’?

Didie ke N̄kpa Jesus ‘Afak Ediwak Owo’?

Se Bible ọdọhọde

Uwa Jesus ke Abasi edida inyan̄a nnyịn isio ke idiọkn̄kpọ ye n̄kpa. Bible ọdọhọ ke iyịp oro Jesus ọkọduọkde ke ẹda ẹfak nnyịn. (Ephesus 1:7; 1 Peter 1:18, 19) Ntak edi oro Jesus ọkọdọhọde ke ikedi man inọ uwem imọ “nte ufak ke ibuot ediwak owo.”—Matthew 20:28.

Ntak emi akanade ẹnọ “ufak ke ibuot ediwak owo”?

Adam, akpa owo emi Abasi okobotde, ama ọfọn ama. Enye okpokodu uwem ke nsinsi, edi enye ama akpa sia enye ọkọsọn̄de ibuot ye Abasi. (Genesis 3:17-19) Edi mbemiso enye akpade, enye ama enyene nditọ, ndien nditọ esie ẹkedada idiọkn̄kpọ ẹmana. (Rome 5:12) Ntak edi oro Bible ọdọhọde ke Adam ama ‘anyam’ idemesie ye nditọ esie ẹsịn ke ufụn idiọkn̄kpọ ye n̄kpa. (Rome 7:14) Ntre, sia mmọ mîkọfọnke ima, mmọ ikekemeke ndifak idemmọ nsio ke ufụn idiọkn̄kpọ ye n̄kpa.—Psalm 49:7, 8.

Abasi ama atua nditọ Adam mbọm ke ntak emi enye amade mmọ. (John 3:16) Edi, sia Abasi amade unenikpe, enye ama anam nnennen se akanade enye anam mbemiso osiode nditọ Adam ke ufụn idiọkn̄kpọ ye n̄kpa. (Psalm 89:14; Rome 3:23-26) Abasi ama nnyịn etieti, oro akanam enye anam n̄kpọ man efen onyụn̄ ọsọhi idiọkn̄kpọ nnyịn efep ofụri ofụri. (Rome 5:6-8) Se Abasi akanamde ekedi ndinọ eyen esie edikpa ọnọ nnyịn.

Didie ke uwa Jesus afak nnyịn?

Ke ini ẹtịn̄de ẹban̄a “ufak” ke Bible, enye esịne n̄kpọ ita emi:

  1. Ekọmurua oro ẹkpede.Numbers 3:46, 47.

  2. N̄kpọ emi ẹnọde man ẹsana owo m̀mê n̄kpọ ẹyak.Exodus 21:30.

  3. Edi ukem ekọmurua ye n̄kpọ oro ẹkpede nte isop. *

Yak ise nte n̄kpọ ita emi ẹnamde ifiọk se n̄kpa Jesus Christ anamde ọnọ nnyịn.

  1. Ekọmurua oro ẹkpede. Bible ọdọhọ ke “ẹkedep [nnyịn] ke ekọmurua.” (1 Corinth 6:20; 7:23) Ekọmurua oro edi iyịp Jesus, emi enye adade “edep mme owo osion̄o ke kpukpru esien ye usem ye obio ye idụt, ọnọ Abasi.”—Ediyarade 5:8, 9.

  2. Ẹsana owo m̀mê n̄kpọ ẹyak. Uwa Jesus ‘afak nnyịn osio’ ke ufụn idiọkn̄kpọ.—1 Corinth 1:30; Colossae 1:14; Mme Hebrew 9:15.

  3. Ukem ekọmurua. Mfọnmma uwem emi Jesus akawade edi ukem ye mfọnmma uwem emi Adam akayakde atak nnyịn. (1 Corinth 15:21, 22, 45, 46) Bible ọdọhọ ete: “Kpa nte okotode ke ntụtutọn̄ owo kiet [Adam] ẹnam ediwak owo ẹdi mme anamidiọk, kpasụk ntre n̄ko otode ke n̄kopitem owo kiet [Jesus Christ] ẹyenam ediwak owo ẹdi ndinen owo.” (Rome 5:19) Omokụt do nte n̄kpa owo kiet ekemede ndifak ediwak mme anamidiọk. Jesus ọkọnọ idemesie nte “n̄kemn̄kem ufak ke ibuot kpukpru owo” oro ẹnamde n̄kpọ man Abasi ada uwa esie anyan̄a mmọ.—1 Timothy 2:5, 6.

^ ikp. 7 Ikọ Hebrew ye ikọ Greek oro ẹkabarede “ufak” ke Bible ọwọrọ ekọmurua, m̀mê n̄kpọ emi enyenede ekọmurua, oro ẹkpede. Ke uwụtn̄kpọ, ikọ Hebrew oro ka·pharʹ ọwọrọ “ndifụk,” ndien ẹsiwak ndida enye ntịn̄ mban̄a ndifụk m̀mê ndifen idiọkn̄kpọ. (Psalm 65:3) Ikọ Hebrew en̄wen emi ẹsidade ẹtịn̄ ẹban̄a ufak edi koʹpher, emi ọwọrọde ekọmurua emi ẹsikpede man ẹsana owo m̀mê n̄kpọ ẹyak. (Exodus 21:30) Kpasụk ntre, ẹkeme ndikabade ikọ Greek oro lyʹtron, emi ẹsiwakde ndikabade “ufak,” nte “ekọmurua emi ẹkpede man ẹfahade n̄kpọ.” (Matthew 20:28; The New Testament in Modern Speech, eke R. F. Weymouth). Mbon Greece ẹkesida ikọ emi ẹtịn̄ ẹban̄a se ẹkpede man ẹsana owo n̄kpọkọbi ẹyak m̀mê ẹsio owo ke ufụn.