Be ka se isịnede

Ndi Kpukpru Ufọkabasi Ẹdi Kiet? Ndi Kpukpru Mmọ Ẹkpono Ata Abasi?

Ndi Kpukpru Ufọkabasi Ẹdi Kiet? Ndi Kpukpru Mmọ Ẹkpono Ata Abasi?

Se Bible ọdọhọde

Bible ọdọhọ ke kpukpru ufọkabasi idịghe kiet. Bible onyụn̄ etịn̄ se isinamde Abasi okûma ufọkabasi. Ufọkabasi oro Abasi mîmaha ẹdi utọ iba.

Akpa: Ẹkpono nsunsu abasi m̀mê abasi ubọkowo

Bible ọdọhọ ke ndikpono nsunsu abasi, m̀mê abasi ubọkowo, edi “ikpîkpu n̄kpọ,” etie nte “ibifịk oro ẹduọkde,” ye nte “n̄kpọ oro mînyeneke ufọn ndomokiet.” (Jeremiah 10:3-5; 16:19, 20) Jehovah * Abasi ama owụk nditọ Israel eset ete: “Kûnyene abasi efen ukọrọ ye ami.” (Exodus 20:3, 23; 23:24) ‘Jehovah ama esiyat esịt etieti’ ke ini mmọ ẹkpọn̄de enye ẹkekpono abasi en̄wen.—Numbers 25:3; Leviticus 20:2; Judges 2:13, 14.

Abasi isụk inemke esịt ye mbon emi ẹtuakde ibuot ẹnọ nsunsu abasi. (1 Corinth 8:5, 6; Galatia 4:8) Enye ọnọ uyo ete yak mbon emi ẹnen̄erede ẹyom ndikpono imọ ẹwọrọ ke nsunsu ufọkabasi. Enye ọdọhọ kpukpru owo ete: “Ẹwọn̄ọ ke otu mmọ, ẹnyụn̄ ẹdian̄ade ẹda.” (2 Corinth 6:14-17) Edieke kpukpru ufọkabasi ẹdide kiet, kpukpru ẹnyụn̄ ẹtuakde ibuot ẹnọ ata Abasi, ndi Abasi ọkpọdọhọ mme owo ẹwọn̄ọ ke mmọ?

Ọyọhọ iba: Ẹkpono ata Abasi edi idịghe nte enye oyomde

Ndusụk ini nditọ Israel ẹma ẹsimen n̄kpọ mme okpono ibọk, m̀mê eke mme okpono ndem, ẹdisịn ke n̄kpọ Abasi. Jehovah Abasi ikamaha utọ n̄kpọ oro. (Exodus 32:8; Deuteronomy 12:2-4) Jesus ama asua ọnọ ikpọ owo ufọkabasi mme Jew ke eyo esie. Nte mmọ ẹkesikponode Abasi akanam Jesus asua ọnọ mmọ; mmọ ẹkesima ndinam n̄kpọ Abasi enyịn owo, ẹnyụn̄ ẹfre ẹban̄a “ikpọ n̄kpọ ke Ibet, oro edi, unenikpe ye mbọm ye edinam akpanikọ.”—Matthew 23:23.

Tutu mfịn, n̄kukụre ufọkabasi oro anamde mme owo ẹkpere ata Abasi edi enye emi ẹkpepde mme owo ata akpanikọ—ata akpanikọ ke Bible. (John 4:24; 17:17; 2 Timothy 3:16, 17) Kpukpru ufọkabasi, m̀mê otu ekededi emi ẹdọhọde ke ikpono Abasi, emi mîkpepke mme owo ata akpanikọ ke Bible ẹdadian̄ade mme owo ẹkpọn̄ Abasi. Ediwak ukpepn̄kpọ—utọ nte ukpepn̄kpọ Abasi-Ita-ke-Kiet, ukpọn̄ ikpaha ke nsinsi, ye ikan̄ hell—emi mme owo ẹkerede ke oto Bible, ẹdi ukpepn̄kpọ emi mbon oro ẹkesikponode abasi ubọkowo ẹkesiode ẹdi. Mbon emi ẹkpepde utọ n̄kpọ oro, ẹtuak ibuot ẹnọ Abasi ke “ikpîkpu,” se mmọ ẹnamde ẹnọ Abasi inyeneke ufọn, sia mmọ ẹkpep ekikere owo utu ke se Abasi oyomde.—Mark 7:7, 8.

Mbubịk emi ufọkabasi ẹnamde etek Abasi esịt etieti. (Titus 1:16) Idịghe ndikere enyịn̄ ufọkabasi nnyụn̄ ntiene ubono-n̄kpọ emi mme owo ẹkesion̄ode ẹdi ekpedi utom ufọkabasi; nnennen ufọkabasi esikam an̄wam mme owo ẹdu eti uwem ke usen ke usen man ẹnen̄ede ẹkpere Abasi. Ke uwụtn̄kpọ, Bible ọdọhọ ete: “Edieke owo ekededi abatde ke imọ idi ata andituak ibuot ndien mîfarake edeme esie, edi aka iso ndibian̄a esịt esie, orụk utuakibuot owo emi edi ikpîkpu. Orụk utuakibuot oro asanade mînyụn̄ ideheke ke enyịn Abasi Ete nnyịn edi: ndise mban̄a nditọakpa ye mme ebeakpa ke ukụt mmọ, ndinyụn̄ n̄kpeme idem nnana ntọi ke ererimbot.” (James 1:26, 27) Bible King James esịn “usụn̄ ukpono Abasi oro ananade ndo,” emi mîsan̄ake ye mbubịk, ke itie emi ọdọhọde utuakibuot oro asanade.